شفيكم يالربع

انسوا مشاركة حدس بالحملة على رئيس الوزرا او انها اهي اللي منظمتها من تحت لي تحت
انسوا ان الشيك انصرف من حساب رئيس الوزرا اثناء مزاولته لعمله لنائب اثناء فترة نيابته
انسوا ان فيصل المسلم فيه ومافيه وشنو دوافعه
انسوا قانونية تسريب الشيك او نشره ووضوحه من عدمه ومن المستفيد من ذلك
انسوا ناصر الصباح وضلوعه من عدمه
انسوا قانونية المطالبه برحيل المحمد او الحمله من عدمها
انسوا الدستور وتفسيره
انسوا ان المجلس تعبان
انسوا كل خلافاتكم الشخصيه
وانسوا كل شي
هو سؤال بسيط ومادري ليش قاعد ندخل بنقاشات جانبيه
هل انت راضي على اداء الحكومة؟٩
اذا كنت راضي اذكر ادلتك
وان كنت غير راضي وبنفس الوقت ضد الحمله هم اشرح ليش!٩

باختصار

عندك عامل
كل ماتعطيه شغله يسويها..يخربها
جربته مره مرتين ٦ مرات
بعد كل هالفرص تقوله يبا بس ما ابيك
هل من المنطق والعقل
ان اييك واحد ويقولك يا اخي انت شلون حكمت على هالعامل واهو ما مداه يسويلك شغلتك؟٩
تقوله ياحبيبي انا مو متسرع ولا يحتاج اعطيه فرصه لاني مجربه وادري انه بيخربها مثل ماسوا بالمرات الست اللي قبل
يقولك معليش عطه بعد فرصه لاتتسرع بالحكم
يا يبا اي اتسرع! اقولك مجربه ست مرات!٩
والله من وراء القصد
:)

خلااااااااص

الصراعات والعناد المؤقتين بين المسؤولين دائما مايتحملها المواطن وتتحملها التنميه
هذا بكل دول العالم
اما بالكويت
نتميز بان هالصراعات لو تستمر بعمر المسؤولين اللي ماشالله مايخلص
فمافي اي مشكله
يحترق المواطن
يحترق البلد باللي فيه
ويتم الصراع
مثل الرياضه اللي كنا نتميز فيها
من اكثر من عشر سنين
واحنا مابين الخلافات وسوء الفهم وركبت الراس والعناد بين عيال العم على الفداوية
واللي على اثرها انحرم جيل كامل من ممارسة ومتابعة هالرياضه
===========
اليوم رحت اسوي جم معامله
شي مستحيل
الفساد وصل درجه ان مراقبين الدوامات مو مداومين بكذا وزاره
والوضع اصبح لايطاق
الدول الطاردة لابناءها عادة تكون فقيرة اوديكتاتوريه
الا الكويت
============
على الهامش موضوع متصل
من زمان ابي اكتب عن فساد البعض بالداخليه
اللي يهدون دواماتهم بالاماكن الحساسه اللي يصير فيها احتكاكات ومشاكل
مثل المستشفيات والملاعب وغيرها
ويتفرغون لملاحق البنات والتفاتيش صوب القز
وهالصوره اللي خذيتها من مدونة ولد الديره تشهد
شوفوا الهوشه
وشوفوا الصمنديقه مادري السمنديقه اللي نازل من دوريته وواقف ورا وحاط ايده بمخابيه
والله عيب عليه
بتقولولي شسوي بروحه
اقول على الاقل يحشم نفسه ويقعد بدوريته
وين الاسناد عنه
وبعدين حتى لو بروحه
شاللي بيخلي احد يتعرض له ومايحترم بدلته
غير اللي شجع هالحوش على عدم احترام القانون وان يبا سو اللي تبيه واحنا نطلعك بواسطه

LOL

سؤالين محيريني

السؤال الاول
اذا وافقت الحكومة على تجنيس البدون بشرطين: انهم مايصوتون قبل ٣٠ سنه و ان اللي متبنين قضيتهم مايترشحون لمجلس الامه..فكم سيبقى من المتاجرين بهذه القضيه؟٩

السؤال الثاني
هل المتاجرين بقضايا تجنيس البدون واسقاط القروض وايقاف ازالة التعديات فعلا يريدون الحلول؟ ام ان تلك القضايا هي مفاتيح فوزهم بالانتخابات ويترتب على حلها كشف عورتهم؟٩

على الهامش: من بين الالاف المؤلفه اللي تمسكنت بقضية القروض ماتقدم لصندوق المعسرين الا شويه تدرون ليش؟ من احد شروطه ان المعسر مايقترض مره ثانيه لمدة عشرين سنه! وواحد من المقترضين طالع بالتلفزيون وسألوه اذا اسقطوا القروض بترد تقترض؟ قال اكيد!!٩