Friday, November 30, 2007

إسقاط القروض..حقائق

بداية..الاقتراض مو عيب..والحاجه هم مو عيب..
العيب هي الحقائق التاليه..

-1-
بره الكويت في عوايل عايشه من 7 و 10 اشخاص على 50 و100 دينار وبغرفه وحده
مالنا شغل فيهم؟ أوكي نروح للي وراها

-2-
بالكويت..أقل معاش للمتزوج مو أقل من 600 دينار هذا على أقل أقل أقل تقدير واللي ماتعب على نفسه..ماني متكلم عن ال 900 وفوق وبالاضافه إلى بدل الأجار 150 دينار وغير البدلات اللي أغلب أصحاب القروض اهم أذكى ناس فيها وعندهم بدال البدل 1000 وكلهم مايستحقونهم

-3-
بالكويت فقط!! الطالب المتزوج يوصل معاشه لين 500 دينار وعلى قولة أوبرا تقول هذا البلد اللي يعطيك فلوس إذا قعدت بالبيت!!!

-4-
بالكويت..كل راس ياهل يعطون عليه 50 دينار غير الزوجيه وهذي تكفي بني آدم للعيش إلا إذا بتشتريله أغلى بامبرز وحليب وملابس هذا شي ثاني

-5-
بالكويت..مافي ضرائب..التلفون مجاني..الكهرباء والماء تقريبا مجانا..التعليم مجاني..الصحه مجانيه..السكن مجاني-بيوت الحكومه لاوتبيعه تالي- او يعطونك قرض بدون فوائد وبقسط زهيد وفوقه قسيمه!..البانزين رخيص مقارنة بأغلب دول العالم..الأكل رخيص مقارنة بأغلب دول العالم..الجمعيات ودعمها للمنتجات حتى مع الغلاء اليديد هم أرخص من وايد دول بالعالم..غير الأشياء اللي توفرها الدوامات للموظفين خصومات على النقال سياره وغيرها يعني المعيشه "الاساسيه" من الناحيه الاقتصاديه مريحه الا اذا نتكلم عن مقترض وبنفس الوقت يبي يخمط نص المجمعات وطايح بدبي والسيايير هذا شي ثاني لأن هذي معيشة "كماليات"

-6-
بالكويت..الأغلبيه الساحقه الماحقه من المقترضين كانوا يقدرون مايقترضون..اللي يبي يسافر واللي يبي يشتري سياره واهو محتاج وفي ناس اقترضت 24 و 30 ألف دينار عشان تشتري سياره راح يطيح موديلها وسعرها بعد سنه او ثنتين واهو يدري انه راح يرد القرض مضاعف وراح يدفع 500 دينار لمدة 15 سنه ويرد ال 24 الف 42 الف وال 30 الف 50 الف

-7-
بالكويت..محد طق أحد على إيده وغصبه يقترض وعلى الأقل 99.99% كانوا يقدرون مايقترضون (تذكروا قاعدين نتكلم عن المعيشه الأساسيه)..ياخي مو شرط تركب أيدد سياره..ولاشرط يكون لك بيت كبير..ولاشرط يكون لك بيت أًصلا!اسكن ويا اهلك! مايكفي؟ شفيها الشقه؟ لا جد جد ميخالف فكروا فيها..واحد شهادته أنا بالروضه ويشتغل حارس أمن اييبله دستة يهال وفوقها يبي يبني أحلى بيت بأحلى منطقه وفوقها يبي يسافر أوروبا كل سنه وفوقها يبي يشتري سيايير للبيت نصهم كشخه آخر شي يقول آنا مسكين طيحوا قروضي؟ ياخي من طقك على إيدك!!
-8-
بالكويت ..في ناس دمها بارد وماعندها ذرة مسؤوليه وماتبي تتحمل تبعات قراراتها..اخذ الحين وفكر بعدين وانهب من الديره لين تقول بس..وفي ناس عايشه على قدها وعارفه شلون تمد ريولها على قد لحافها ولاترضى تخسر الدوله

-9-
بالكويت..في ناس عايشه على أساس ان الديره زائله وجيب فلوس كثر ماتقدر..وفي ناس تحب الكويت وماترضى تعتبرها كيكه قاعد تخلص حتى لوعلى حساب راحتهم

-10-
بالكويت..في ناس مقترضه ألف دينار وفي ناس مقترضه 100 ألف دينار
بالكويت..في ناس مقترضه للحاجه وفي ناس مقترضه للمتعه
بالكويت..في ناس مقترضه وتقدر تسدد وفي ناس مقترضه وماتقدر تسدد

-11-
عن نفسي ما اقدر افتي بزيادة الفوائد واذا المقترضين كان عندهم خبر ان الفوائد ممكن تزيد بأي لحظه

-12-
بالكويت..في ناس مقترضه وتقول انتوا حاسدينا! اللي مو مقترض حاسد اللي مقترض ومتوهق ! ليش حاسدينكم؟؟ على شنو؟ الشغله الوحيده اللي يمكن حاسدينكم عليها اهي برودة دمكم وانتوا تنهشون بما تبقى من لحم الكويت وهي تموت امام اعينكم! ليش حاسدينكم؟؟منو طقكم على ايدكم وقالكم اقترضوا!

-13-
بالكويت..بعض الناس المقترضه تقول كا تبرعات الكويت لكل الدنيا شمعنا احنا؟ نقولهم نعالج الغلط بالغلط؟؟
بالكويت..يقولون كا اللي طيحتوا قروضهم ايام الغزو! ونقولهم ليش الغزو يشبهه شي ثاني؟؟

-14-
بالكويت..ماتعرف تميز بين أغلب نعم أغلب المقترضين وبين غيرهم لأنهم أكشخ ناس!!! تبجي على القروض وجنطتها LV وساعتها Rolex وسيارتها مرسيدس!!

-15-
خلاصة الكلام..لحد يقولي في ناس مساكين وظروفهم وسكنهم وصحتهم وعيالهم و و و و..ولحد يقولي تحمد ربك لاتصير مثلهم الف حمد وشكر لك يارب عسانا ماصرنا جذي لكن كل واحد يجني ثمار جهده وتعبه أوإهماله..كل واحد يجني ثمار قناعته وحسن تخطيطه أو طمعه ولامبالاته..هذيله الناس اللي تقولون مساكين صج مايعدون نسبه ضئيله أما الباقين محد طقهم على إيدهم..اللي اقترض وقاعد يسدد على راسي من حقه ومو عيب..واللي يبي ينهب نقوله الله فوقك واحنا وراك مانهدكم تنحرون اللي بقى بالكويت..ياجماعه..ناس راحت تدرس وتشتغل وترفع اسم الكويت بره وماحصلت شي..واللي قعد مرتاح ابيتهم يقترض بالالاف وياخذ كل شي؟؟ وين العدل؟؟

-16-
تذكروا..قاعد أتكلم عن "غالبية" اللي المقترضين..أو اللي يبون يطيحون القروض

-17-
الحل؟ دراسة الحالات القليله الصعبه ومساعدتهم احنا مانقول كلهم حراميه والا كلهم مايحسون لكن مو معناته يختلط الحابل بالنابل
مثل التجنيس كلمن دش بالسالفه قال يمكن تشنص وياي..مثل بعد الغزو لما كانوا يوزعون 500 دينار على الصامدين دشوا بعض غير الصامدين من اللي خبري خبرك وصفوا بالدور! ياجماعه بطاقاتكم المدنيه مخرمه يعني داشين من الحدود!مثل عطية سالم العلي هم الكل دش يجرب حظه وانت رايح هالفئه مشكلتها انها تبي تنهب من كل صوب يدشون علاج بالخارج بدلات عطايا قروض كل شي لوبيدهم ياكلونا احياء

-18-
لا تعليـــــــــــــــــــــــــــــــــــــــــــــــــــــــــــــــــق
الصوره منقوله من مدونة

36 comments:

على نفسها جنت براقش said...

لان احنا ديرة كماليات
و يبون يشترون كل شى من باب لا يخلون بخاطرهم شى

مو لانهم محتاجين

الدوله لو ما تبرعاتها الخارجيه جان الكويت ما ردت
و الا دوله مثل جزر القمر بالامم المتحدة تدافع عنا ليش

انا ضد اسقاط القروض و اذ يبون يسقطونها
يحطون حساب بال - حق اللى ما اقترض

يحليلهم
جنهم يهال لازم الدوله ترقع لهم
صج المعاشات ما تكفى و اذا الدوله ما تبى تزيدها
تسوى ضبط على التجار و تدعم بعض المنتجات
و لا يصير عندنا تضخم بالاسعار
و منكثر الشعب الكويتى انصح بتحديد النسل

:)

مو صج طبعاً

وهههه اخيراً شفنا ولادة موضوعك المتعسر
لوووول

على نفسها جنت براقش said...

اى نسيت الاخت اللى ما ظلت مسبه ما قالتها
الكاميرا تبى توثق مسبتها
يمكن فى يوم تكتب مذكراتها
عقب ما تسوى لها حركه
اسمها
ططاو

AnGlOpHiL said...

لكل داء دواء يستطب به -- ألا الحماقه اعيت من يداويها


شوف انت بيع عرزالتك و انا ابيع عشتي و خل نفتح بنك..على طاري البنك الحين موسم البلغاري..و اجكجك و اكسر


قلتها قبل و اقولها الحين...محد ميــــت يوع

da Vinci said...

اولاً: صح لسانك و يسلم قلمك( كيبوردك)صدقت
ثانياً: التحلطم احد فنون الكويتيين محدثي النعمة ...اللى صاروا يتبارون في الثراء السريع خصوصاً من اغسطس1990 وحتي الآن
ثالثاً: دير بالك على صحتك ترا محد راح يفيدك ياخوي و ما عندنا احنا زملاؤك واسطة نبعثك للعلاج و النقاهة في الخارج
رابعاً: لو تظل تنادي في هذا الموضوع محد راح يسمعك لانهم يسيرون على هذا النهج و لقوا من يسمعهم و يجيب طلباتهم يا خوي
خامساً: لا تشغل التفكير بامور غير تنمية نفسك و اسرتك لانهم اللبنة و الأساس اللى راح نرتكز عليه في المستقبل
سادساً : الله يحفظك

تحياتي

ButterFlier said...

hehehe

حلم جميل بوطن أفضل said...

عمي مافي داعي تشرح و تيرر و تعلل

لا لإسقاط القروض و بس
!!

و سنحاسب كل نائب يشترك في هذه الجريمة

Mishari said...
This comment has been removed by the author.
Mishari said...

عزيزى
اعترف باني سابقا كنت احد المؤيدين لهذا الاقتراح ولكن اليوم اقول لا وانا معاك بكل كلمة تفضلت فيها
ولكن

هناك فساد اقتصاد عام على الدولة
مع وجود نقد فائض مقارنة بالخدمات السيئة التى تفضلت فيها
انا ضد العطايا والهبات ومع اصلاح الوضع العام
يعني بس تخيل عملية دعم المنتجات الوطنية
او انشاء مشاريع سكنية
وينها؟
مو المشكلة التخطيط معدوم وعطي المجال حق هالناس انها تطالب بهالمطالب

حمودي said...

هيلق بعيد عنك

العرزاله said...

براقش

بالضبط..جنهم يهال..جنا الكويت يايبتهم وناسيتهم معتمدين اعتماد كلي على الكويت
اما اللي تسب..فهذي اهداء حق اللي مايحب تسمية اللفو :))


anglophil

ماكو شغل كل شي عاد ولا هالعرزاله مالي غيرها :))

اي والله..محد ميت يوع!!

Da vinci
الله يسلمك حبيبي وتشكر على النصايح الحلوه :)
انا والله موفاضي لهم وايد ومثل ماتفضلت الواحد يحاول يطور من نفسه بس تدري ساعات الواحد ايمع ايمع ويبي ينبط بمكان..ماكو الا هالعرزاله :))


butterflier
:p

حلم جميل
تصدق انا كنت جذي مطنش بس امس ماقدرت شفت بسايت واحد يقول انتوا حاسدينا على القروض!! انا هني اصابيعي قامت تغني راب على الكي بورد وانا اكتب الموضوع ماقدرت


مشاري
وانا بعد معاك حبيبي وصح كلامك لازم نحل الموضوع من اساسه مو بس نكتفي بالاجراءات الترقيعيه
بس هم مالازم نخلي الاستغلاليين اللي ماشين على طريقة ان البلد سايب ويبا انت تحلم بالقانون مش شغلنا بس ..مانبي هالناس تستغل هالظروف وتطعن الكويت اكثر


حمودي
شلأ

فتى الجبل said...

الديرة فيها بيزتين والكل يبي يخمط منهم شي حق عمره

العرزاله said...

مو هذي المشكله مال الله يخمط روسهم

شـقـــــران said...

أخي العزيز العرزاله
تحية طيبة

اشكرك على طرح هذا الموضوع المهم جدا واللي أخونا نيو طرحه في مدونته أيضا..ولكن تم الطرح باسهاب هنا ففضلت المشاركة في مدونتك وهذا لايقلل من مجهود أخي الكريم (نيو) في مدونة أم صده

بداية أنا معارض حتى الثمالة مبدأ اسقاط القروض ولكن...هنا يجب ان اوضح نقطتين مهمتين

الأولى:
هناك اناس معسرين عن السداد وهم قلة (كما ذكرت في مدونتك) وهؤلاء حسب ما عرفت من أشخاص إن من 50% الى 60% من رواتبهم تذهب لأقساط القرض والسبب هو ارتفاع الفائدة وبنفس الوقت ارتفعت اسعار السلع الأساسية فاصبحت حالتهم يرثى لها وأنا هنا أؤيد ايجاد حل لهم ولكن ليس باسقاط قروضهم وانما حل يكون فيه نوع من المساعده ،مثل أن يتم شراء المديونية واعادة جدولتها على مدة اطول فتقل قيمة القسط (وهو مبدأ معروف في عالم الاقتصاد والمال) وهو مايقوم به صندوق التنمية الكويتي في التعامل مع بعض ديونه

أما ثانيا:
وعطفا على ماذكره الأخ مشاري
من ان غياب الرؤيا الحكومية تجاه استغلال الفوائض المالية في مشاريع تنموية كبرى بالاضافة الى توزيع الدولة الأموال على أناس ودول كان موقفهم مخزي لأصعب محنة تمر على أي وطن وهي محنة الإلغاء كما حدث معنا أبان الغزو الغاشم، فأبو مازن نتبرع له بمئات الملايين واليمن ينهل منّا بما مثله والسودان حدّث ولاحرج ، ولبنان نضع له مليار دولار بشخطة قلم وحتى دون دراسة كما عوّدونا ، وأرجو أن لايقول لي أحد أن هذه سياسة خارجية ،فالسياسة الخارجية لها أصول تبنى عليها ولها أسس ومعايير متبعة وليس من ضمنها أن نتحول الى بقرة حلوب حتى صرنا اضحوكة للدول ، وهذا كله زاد من عدد المستغلين لهذه المشكلة للتربح الانتخابي الرخيص

وأسأل الله أن يفرج عن (المعسرين) والذين يعانون الأمرّين بين حكومة لا وجود لها على أرض الواقع وبين مزايدات انتخابية رخيصة

أخي الكريم
إن غياب رؤية الدولة ومفهومها الشامل لدى الحكم والحكومة وتفتيت الدوائر (سابقا) الى كانتونات قبلية وطائفية وعائلية تقودها طفيليّات المعاملات والمصالح التجارية ، جعلت المستوى السياسي ينحدر في مستواه الى الدرك الأسفل ، فظهرت لنا هذه المطالب واللتي لا هم لها سوى التكسب السياسي الرخيص على حساب الوطن والمواطن.


وأرجو أن تسامحني على الاطالة حيث أني سوف احول هذه المداخلة الى مقالة في مدونتي بعد الاضافة عليها


ولك مني خالص التحية القلبية

أخوك المحـــــــب/

شــقـــــران

بو حامد said...

صح لسانك

اسقاط القروض جريمه ، ولا عدالة فيها

هناك حلول اخرى اكثر عمليه ويستفيد منها الجميع

kila ma6goog said...

:(

Eng_Q8 said...

اولا انا ضد اسقاط القروض

لكن خلنا نكون واقعيين ترى احنا بديره غنيه والحمدلله مو قاصرنا شي

والله عيب لما يقول احد عيش على قد حالك يا اخي شنو عيش على قد حالك ليش احنا خيرنا ممتد لي بره الكويت

وبعدين احنا تعودنا على الكماليات وهذا من حقنا فلوسنا وكيفنا ليش الحسد

وبعدين ترى كل شي غالي بالديره شتبي الناس يسوون يعني ؟؟ ما تبيهم يبنون ما تبيهم ياكلون ما تبيهم يلبسون ما تبيهم يعيشون العيشه الي المفروض يكونون عايشينها

تدري شنو المشكله المشكله ان ديرتنا ديرة تجار وللاسف هذيل اهم ساس الخراب بالديره مع المطاوعه طبعا
الحبيب يرفع الاسعار ولا في احد يحاسبه ويبي ينهب الناس ويداقلهم على الفلس مع العلم ان ماكو ضرايب ولا شي واهم جذيه ... هذي الفئه من الناس الي للاسف نصهم كانوا هيلق يبون يسوون الطبقيه بالكويت .. انا اقول خل يستريحون احسنلهم الروس نامت والعصاعص قامت .. مقيوله ولد الفقر لي استغنى يطغى

وبالنسبه للضرايب من حلاة الصحه والا التربيه والا والا والا ... ماكو شي مثل خلق الله بهالديره من كثر البوقات
ناس قاعده تغرف الفلوس من الديره وناس لانهم شرفاء الدينار عليهم بالحسره

هل تتوقع ان القانون لو كان مطبق على الكل جان شفت ناس تقترض او تقول طيحوا القروض ... لازم اتشوف اسباب الاقتراض قبل لا تنتقد اسقاط القروض


وبالنسبه للناس الي راحوا المجلس وسوا البلبله هذي هيلق لان الكويتي حتى لو ماعنده فلوس يقول عندي ولا يتشكى اما هذيل المتجنسين الله يفكنا منهم

سوري على الاطاله

لا لاسقاط القروض ونعم للمساواة ونعم لتطبيق القانون

العرزاله said...

شقران
مداخله قيمه :)

بالنسبه للنقظه الأولى أتفق معك قلبا وقالبا..مع العلم ان بعض "المعسرين" لايزال لايحسن معالجة "حالته"
البعض لازال يملك الأمل في حلول غير منطقيه..ينتظر إلغاء الديون..يبحث عن منحة سالم العلي..ينزل إعلان بالجرايد..ولديه أفخم السيارات..انزين بيعهم! عليه قسط أجهزة إلكترونيه وغيرها..إنزين تخلص منهم! عنده شهاده زينه ويشتغل شغله بسيطه غير متعبه لكن راتبها قليل..انزين اتعب على روحك شوي!
ما اقولك هذيله كلهم بس قصدي ان في حلول "جذريه" وفي حلول ترقيعيه
بعض البرامج الأمريكيه تبين شلون المقدم يختار ناس معسرين ويبدي يعيد ترتيب حياتهم "الاقتصاديه"..شوف شلون يتبدل حالهم من الديون ورهن البيت الى حاله مريحه!

أما بالنسبه للنقطه الثانيه فتعليقي للكل
ياجماعه بغض النظر عن آراءنا حول العطايا "وانا أتفق معاك" وبغض النظر عن النهب الحاصل وبغض النظر عن كل الفساد..هذا كله نبي نحله وقاعدين نحاول لكن مو معناته خلاص "نفلها"!
اسقاط القروض ياجماعه له أثر خطير خطير خطير هذي راح تسبب نقله نوعيه بضمائر الكويتيين الباقيه ولامبالاتهم وراح يصير منطق اخذ اخذ اخذ وريح بالك على نطاق اوسع واشمل..خلاص الديره بتصير مسخره الكل بيعتبرها جذي دام القروض طاحت!
اللي اقترض بيرد يقترض ألف مره واللي ما اقترض بيقترض والحبل على الجرار!


على فكره..
مدونتك قيمه..واصل :)

بوحامد
بالضبط والله انها جريمه بحق الكويت والكويتيين

kila ma6goog
يالقاطع..

تروح نقترض قبل لايقرون القانون؟
:)

q8_eng

ليش عيب ان الواحد يقول عيش على حالك؟
ياخوي صج الدوله نفطيه وصج ثروات الوطن للمواطنين بس الدوله والكويت لها التزامات معينه تجاه المواطنين..بعد هذا كل واحد مسؤول عن نفسه!
يعني مو معقوله نييب النفط ونوزعه على كل واحد ونسوي الكل أغنيا مايصير! ولاراح يكفي أصلا!
فصج..كل واحد يعيش على قده مو معقوله بعد نصير شيوعيين الكل غني او الكل فقير..اسمحلي وانا اسف على هالكلمه بس حتى الحيوانات بينها فرق!
+++++++++++++++++++++++++++++

الله سبحانه وتعالى الناس تفرق عنده بالتقوى ماكو شي اسمه كلكم مسلمين كلكم تدشون نفس المكان بالدنيا!

بالنسبه للتجار والوضع الفاسد احط ايدي بيدك واتفق معاك واقولك اللي قلته للأخ شقران

أما الضرائب فبغض النظر عن جودة الخدمات..تبقى الخدمات قاعده تقدم غرضها الاساسي على الاقل..ولغالبية الناس على الاقل ايضا! فكونهم مجانيين هذا يقلل من اعذار المقترضين وهذا اللي ابي اوصله اما الفساد اللي فيهم فأرد واقولك والله اني معاك حبيبي بكل كلمه قلتها

وبالنسبه للقانون..لو مطبق جان محد قال طيحوهم بس جان ليلحين في ناس تقترض لأن الاقتراض بالكويت مو مرتبط بالقانون كثر ارتباط الناس بالمظاهر وبرغبتهم بحياة ماتعبوا عشان يحصلونها ويمكن ماجربوها من قبل عشان يقولون احنا متعودين على هالمستوى من المعيشه! الناس بالكويت عندها تعريف "مضروب" للحياة!

عموما..يكفيني انك مأيدني بالفكره الأصليه عاد كل شي ولا مهندسينا :)))

ماتبون كادر؟
:p

..... الفنطـــاس said...
This comment has been removed by the author.
..... الفنطـــاس said...

يمعود يقولك حاسد انا كفروني ليش قلت معارض :)

الحق طالع القناة الاولى.....بس الي مخليني اسمع وماطالع لانه فيها سعدون حماد حاضر الاخ طفايه ماقال شي

وجاسم السعدون بدع بمكالمته عجبني بصراحه اختصرها

..... الفنطـــاس said...

اخخخخخ هذا واحد اخليه يطالب بشي هههه والله فشله احطه على الهوا اهو والاخ الي يمه!!!!؟
عاشور يقول هزا تلاعب 2004 قرضه على20 سنة والقانون للمركزي يقول 15 سنه يعين حاظر مقابله يطلب بشي لادارس قوانين ولا يدرون شالسالفه حاظرين يناطحون بقضية فيها مستقبل وطن على كلام دواوين!!!
والاخ سعدون يسألونه يقولون له وين وجه العداله للي سدد والي ماقترض يقول هذول الله مساعدهم ....تافه وسفيه

Madrii said...

لا طيحوا القروض بتلاقي كل واحد يطالب له ببير نفط يكتب عليه اسمه.. هذا اللي ناقصنا.. ! كل واحد يمد ريله على قد لحافه.. لا تصرف وانت مو قادر! و ايي بعدين يقول طيحوا عني قرضي! كل واحد ينهش هالديره من صوب و ماهمهم شاللي بيصير عقب...

شـقـــــران said...

أخي العرزاله

اشكرك على ثنائك على مداخلتي وعلى مدونتي المتواضعه

والأهم أننا متفقون على رفض اسقاط القروض وايجاد حل للمعسرين (وهم قلة) بطريقة أو بأخرى ولكنها تحقق العدالة المنشودة لكي نحافظ على اسر تورطت

المحــــب /

شــقـــــران

العرزاله said...

الفنطاس

تدري شالمشكله؟ والله ياجماعه خل نفكر بهالشي ونتمعن..احنا دايما ننتقد النواب ونضحك بس فكروا شوي..

إذا هذيله النواب..شلون ناخبينهم؟؟؟
يعني خلك من سعدون حماد على الاقل وجه فوتوجينك جنه مخترع الذره بس تعالي على مؤسس رلبطة القادسيه طفاية المجلس المحترم..راعي الفحمااااااء..بالله عليك ماتقولي شلون صايرين مفاتيحه الانتخابيه؟ لا لا لا ابيك تقولي عن ناخبينه؟ سوي عرس؟
خلها على الله بس..فقع فقع مادري من وين طلعوا واخر شي يزعلون لما نقول لفو


madri
معك قلبا وقالبا ورايي من رايك بس وين اللي يسمع :))

شقران

حياك الله ونتشرف فيك وبرايك بأي وقت :))

..... الفنطـــاس said...

وجهه فوتو كلك ويت فوتو جانك جنه الشرير الي مع بباي!!!!
وراعي الفحما ماينلام لانه دائرته 150% ناس مقترضه يا شاري حلال ((بعارين)) والا حاطله محميات بالمزرعه وياخذ عليهم دعم ويصرخ من الفقر!!!!واذا الفحما لفو
شنقول عن الباجين عيل !!!!!!!!@@

Someday said...

In most cases they don’t “need” the money!!! Bs el salfah ena 9arat 3adey culturally acceptable thing to do!!! Ma adrey how did our dear society evolved to this??!!!, 3aysheyn fake lives claiming it’s theirs!!!!, walla eytarawaly ena people should learn in schools to be who they are and live THEIR lives!!!??!

العرزاله said...

الفنطاس

الشرير اللي مع بباي لوووول

someday
I totally agree with you. They should teach the kids how to accept their level or to change it with their "EFFORTS" n not "STEALING"

:)

شـقـــــران said...

أخي العزيز العرزالـــــــه

احنا اللي لنا الشرف

والتواصل لا ينقطع بإذن الله

لكن لي تعليق أخير

معنى اللي لفو هل هنا المقصود جميع البدو...؟؟

لأني سوف أكون من اللي لفو حسب هذا الاصطلاح المطّاطي


أما سعدون حماّد وراعي الفحماء فاذا تنتقدهم مرّه فإننا ننتقدهم ولانريدهم أعضاء ألف مره


ولكن اريد أن افهم ما دخل اللي لفو أو البدو تحشرونهم في مسألة القروض؟؟؟

ابتعدوا عن الهمز واللمز سامحني وسامحكم الله

فالكويتيون متساوون بالحقوق والواجبات ، فالدستور كلٌ لا يتجزأ ، فنأخذ مانريد ونهمل الباقي على حسب اهوائنا

فالبعض يرى أننا نعيش أزمة حرّيات ولكننا نعيش قبلها أزمة مواطنة مع الأسف

في الكويت لا أحد عاجب أحد..الله يعينّا

اتمنى من كل قلبي أن ترى مداخلتي في مدونة أخي العزيز eng_Q8 حيث تكلمت عن هذا الجانب
الرابط
http://kuwait61.blogspot.com/2007/11/blog-post_28.html

وفي النهاية يبقى رأيك حتى لو كان همز ولمز ، ولكن اسأل نفسك لصالح من نقعد نعاير بعضنا؟؟؟؟

اللهم احفظ الكويت واهلها

وتقبل مني خالص الاحترام والتقدير

أخوك المحــــب/

شــقـــــران (من اللي لفو

العرزاله said...

توني ياي بنزل موضوع يديد بس عشانك أرد عليك أول :))

المهم

الله يهداك انت سألتني شقصد باللقو وبدون لا أجاوبك افترضت اجابتي وصنفت نفسك منهم..يصير جذي؟ :)

اذا انت بأدبك الجم وأخلاقك لفو..انا شطلع؟

حقائق قبل لا أشرح لك معنى اللفو

كنت أدرس بره وكان أحد زملائي بالسكن بدوي

عندي ربع وأخوان بدو يمكن أكثر من اللي تعرفهم مع انك تقول انك بدوي :)

مثل ما قالك مهندسنا الكويتيين وايد منهم يرجعون إلى قبائل وانا منهم :)

بعض البدو سكنوا الكويت قبل الصباح وقبل وايد كويتيين من اللي "عروقهم بالماي"..

بعد شتبي اقول قبل لا اشرح؟ :)

اي..اللفو مو معناته البدو وان شمل "بعضهم" التعريف كما يلي:

اللفو: حديثي النعمه..عديمي الولاء والانتماء..عديمي الاخلاق والتربيه..الانتهازيين..يوا الكويت "عمدا" لما عمها الخير مو صدفه يعني..وطلعوا منها وقت الغزو "عمدا ومن غير اي عذر"..ورجعوا يطالبون بأقصى التعويضات ومكافآت الصمود..وهم قاعدين ينهبون بالكويت ومن خيراتها ويسرقون بكل انواع السرقه من الصغيره الى الكبيره ويأخذون مالايستحقون ويشوفون ان هذا من حقهم وليس سرقه..اهم ناس مايفيدون الكويت بذرة..ويضرونها بألف ذره..اهم اللي عندهم بدال الجنسيه الف..اهم اللي يشجعون على خراب الكويت ويدخلون لها العماله السيئه والمخدرات وغيره..هم عبيد للشيوخ..هم من يسيء لرموز الكويت ولاعندهم احترام الا لصاحب المال..هم من يسيء لتاريخ الكويت ورجالاتها..


باختصار..هم من يعتبرون الكويت البقره الحلوب اللي من تزول عندهم بدالها الف مكان ومكان بديل

على فكره

اللفو مالهم مناطق معينه..ولا عروق معينه..ولا مذاهب معينه..ولا اشكال معينه..ولا لهجه معينه..

والله العظيم دايما اقول اول كنا نقول حضر وبدو..شيعه وسنه..كويتيين وبدون..لين طلعولنا هاللفو اللي اهم خليط منهم كلهم

الله بهداك كنت بنزل فيهم موضوع خربته علي :)))

الحين ارد أسئلك..انت منهم؟

انا اجاوبك..حاشاك وحاشا من يعز عليك

تحياتي :))

شـقـــــران said...

اخي العزيز العرزاله

تحية طيبة

شكرا من القلب على التوضيح واللي اتفق معاك فيه قلبا وقالبا

واعتذر منك على سوء فهمي وافتراضاتي الخاطئه..

آســــف مره أخرى

وعن اذنك بقرأ موضوعك الجديد :)

أخـوك المحــــب/

شــقـــــران

العرزاله said...

ماله داعي تعتذر انت كنت تتساءل ومن حقك لو انا مكانك جان سويت نفس الشي

بالعكس انا اشكرك على سعة صدرك بالاستفسار وايد ناس كان ممكن انها تنفعل قبل ماتتحقق :))

وحياك الله بأي وقت مثل ماقلت لك نتشرف فيك ياشقران
:)

Eng_Q8 said...

حبيبي والله

الاختلاف بالراي لا يفسد بالود قضيه



على ايدك لووووووووووووووووووول وين الكادر

Salah said...

بعد قراءة كل الردود

أنا مع الأخ العزيز شقران بكثير من النقاط

لكن هل المعسرون أقلية

وهذا يعتمد على كيفية تحديد فئة المعسرين

النائب المحترم أحمد المليفي قال أن نسبة المعسرين لا تتجاوز عن 2% وهذا كلام قد يكون صحيح ولكن من غير الصحيح مقارنته مع بقية العالم وذلك لأسباب عدة. من الواضح أن المعسر حسب تعريف المحامي أحمد المليفي هو كل من يتوقف عن دفع الأقساط التي عليه. اذا كان بالفعل هذا التعريف المستخدم فمن الطبيعي تجد النسبة متدنية عندنا في الكويت. لأن من لا يدفع الأقساط يسجن في الكويت بخلاف ما هو حاصل في الدول الغربية بحيث يستطيع أي شخص على الاعلان عن افلاسه وبهذه الحالة يتم التهرب من المديونية التي عليه من دون أن يسجن. فمن الطبيعي أن ترتفع النسبة في دول يحترم فيها حقوق الانسان ولا يواجه المعسر عقوبة لا يستحقها الا المجرمين.

تحياتي

Salah said...

تذكرت شي

بالنسبة للعدالة
هذا رأيي كتبته في ديرة جات وانقله هنا (مع رد الأخ بشار) لاني ما غيرت رأيي الى الان
www.deera-chat.com

Salah Says:

October 23rd, 2007 at 5:01 pm
With regard to fairness and justice, it is the government’s duty to help poor people and to close the gap between poor and rich. Not only it should give the poor but it should take from (tax) the rich as well.

You can argue that getting yourself involved with the loans is not the government’s problem especially if the reason of the loan is to live in luxury. But if this attitude is widespread among citizens then the government should consider this as a real problem and its responsibility to find (or to create) solutions.

Thanks

Bashar Says:

October 23rd, 2007 at 5:27 pm
Salah: Don’t you think that identifying the poor among our community is a very difficult thing? With all those luxurious debatable loans. Who is poor and who is not? And do I pay tax because I don’t have a loan. If so, then I will take a loan. Big one as well, and ask for it to be waived as I am now categorized as poor.

Salah Says:

October 23rd, 2007 at 8:39 pm
Bashar:

I’ve oversimplified the issue by mentioning “The gap between the rich the poor”. Actually I don’t think there are any Kuwaitis who are really poor. However, there are very fortunate people and many less fortunate people in Kuwait. Like in other countries, the less fortunate have many problems include financial, health, social problems… etc. It’s clear that a big proportion of Kuwaitis are from this class and they need help. This help is not necessary to be by waiving the loans. The government should find the solution not me. It can be education, throwing money on them, or both.

Here in the west, rich people pay tax but the poor live on the welfare. Do you think this is injustice? I don’t.

Many thanks.

Bashar Says:

October 24th, 2007 at 7:33 am
Salah: I see what you mean. But taxes in general go to government, and our government does not need more money. It’s a matter I believe of utilizing the existing money wisely. I don’t wanna give examples here.

As for helping the poor, we have Zakat that will go to the poor and it’s obligation in Islam which is not available in western world, thus was born the welfare which you pointed out. Any more self gifting is always good, but another stream of extra mandatory tax to help them I think is awkward if we keep in mind we have zakat as obligation for poor already. And also, because the problem with the government is not where to get the money from again, but where they want to spend it and how.

Cheers

Salah Says:

October 24th, 2007 at 12:54 pm
Bashsar:
Interesting views regarding the taxes and the zakat though I don’t agree entirely. I may discuss this on another occasion as the focus of this episode of Deera-Chat is on the loans issue.

I think we both agree now that it is fair to give some people more money than others according to their needs even if this comes from the public money. The problem now how we identify the people who are mostly in need. Definitely not by the amount they owe to the bank!

Cheer you,

شـقـــــران said...

السلام عليكم
سوف أعلق مرة أخرى على الموضوع بعد مداخلة الأخ العزيز صالح

يبدو اننا جميعا متفقون من حيث أن هناك مشكلة تسمى المعسرون عن السداد، وحسب معلومات أولية بسيطة فإن نسبة المعسرين لا تتجاوز 20% الى 25% ، وهؤلاء تم التغرير بهم من ثلاث اتجاهات

الاتجاه الاول
من انفسهم حيث أن شهوة المال اسقطتهم في المحظور

الاتجاه الثاني
اخفت البنوك عنهم -عن طريق التعمد- قضية ارتفاع سعر الفائدة ولم تبين لهم انواع القروض حسب تصنيف البنك المركزي حيث ان بعض القروض غير مرتبطه بسعر الفائدة ولاتزداد قيمة القسط معها ، خالفت تعليمات البنك المركزي بمبالغ القروض ومددها

الاتجاه الثالث
تجاهل البنك المركزي مخالفات وتجاوزات البنوك في منح القروض الى اكثر من سبعين ضعف الراتب وزيادة مدة السداد الى اكثر من عشرين سنة ولم يوقف هذا الأمر إلآ قبل شهور قليلة من الآن

شخصيا عندي كم اقتراح لحل قضية المعسرين
ولكن سوف اطرح اقتراح واحد هنا


الاقتراح:

تعريف المعسر:
أ-شخص يعتمد على الراتب في رزقه وليس هناك أي مصدر رزق آخر

ب-نسبة القسط تتجاوز 50% أو 55% من الراتب محذوف منها علاوة الأبناء فقط (فالابناء هم اجيال المستقبل لذلك وجب علينا ان نبقيهم خارج المعادلة حتى نضمن حد ادنى من استمرارية تلبية احتياجاتهم الاساسية

طريقة المعالجة:
أ-تقوم الدولة بانشاء صندوق مالي -يكون تحت رقابة ديوان المحاسبة حتى نضمن عدم التلاعب-
ب-يقوم هذا الصندوق بشراء المديونية من البنوك ويعيد جدولتها على المعسرين
ج-تكون نسبة القسط مابين 20% الى 30% حتى نضمن الأمن الاجتماعي والاقتصادي للعائلة الصغيرة

من شروط اعادة الجدولة:
أ-الزام المدين بعدم أخذ أي قرض حتى يتم سداد الدين العام الذي عليه

ب- ج- د الخ الشروط

وبهذه الطريقة نضمن ان الدولة سوف تسترجع اموالها بعد فترة من الزمن وبنفس الوقت حللّنا قضية المعسرين عن السداد

هذا اقتراح متواضع ولكن عند الحل يتدخل أهل الاختصاص والشأن لوضع الطرق والحلول المثلى

مع خالص التحية

أخوكم المحـــب/

شــقـــــران

العرزاله said...

بوصلوح..بس عشان أفهم..انت تبي الدوله تفرض ضرايب على الاغنياء وتعطي الطبقه اللي على قد حالها (مو المعسيرين) فلوس استثنائيه؟

ماعليه بس تعليقين وشوي مو مثبت ياليت اذا تسمح تلخص لي الزبده :)

شقران

اتفق معك قلبا وقالبا جذي مافيها مشكله

يعقووبوو said...

معاي واحد بالدوام ماخذ 15 الف ويرجعهم 31.. مع العلم متوظف عالمتوسطه
معاشه يعني مايتعدى الـ320

اقوله شنو سويت فيهم؟
يقول كل مره ازيد القرض
وكل مره يسافر يشتري سياره وجذي
والحين ماعنده شي من الـ15 شي
حتى سيارته شفر قدييم

ويصارخ لازم تطيح القروض وهذا غلط يدفعون للي براا ومايعطونا
وعذره ان الفايده تزيد
والربا حرام
الفايده زادت جم على المبلغ الاساسي؟
الف الفين؟

وتوك تصحى وتدري ان الربا حرام؟ (:


ومع العلم مره ثانيه
مايداوم (:

وموضوع جيد