Thursday, March 26, 2009

مرسي الزناتي اتهزم يارجاله

قبل جم يوم قريت موضوع عند كويت الخير

انه موضوعه مال الباسكن روبنز انباق

وحاطينه بمنتدى المؤشر بدون ذكر للمصدر

طبعا طقيت الصدر كالعاده وسجلت عندهم قلت بدش وبحتج

حضرتهم ماوافقوا على الاشتراك الا عقب 4 ايام

لما دشيت وحطيت تعليقي..مابغيت الا عمري

الكل يجامل راعية الموضوع ويدافع عنها على حسابي

وضرب فيني يمين يسار

تمسخر على استهزاء على شقولكم

شي يضحك

واحد يغلط علي لما ارد عليه يقولي انت مشترك جديد تعلم شلون تكلم الاقدم منك

واللي يقول اصلا الموضوع تافه مو من حلاته

واللي يقول انتوا داشين تسوون دعايه لمدوناتكم

ابي احد يطب وياي

ابي اشوف مدونجي

ابي احد شسمه

مااااااااااااكو

كله منتديجيه

وهات ياضرب

بس ابشركم

جات سليمه

لما شفت اسلوب القوه مافاد قمت اساحل

قلت يمكن يفيد واطلع بكرامتي

خاصه ان كويت الخير شكله ليلحين مايدري عن اللي قاعد اسويه

عاد انا طول عمري هذا طبعي

افزع للناس واهم مايدرون ولايهون اخوي كويت الخير

اقصد اتليقف واخر شي اكلها بروحي

شكو شكوووووووووووووووو

الريال ماعنده لسان يعني

والله حاله

عموما

كل اللي طبوا علي بالموضوع اللي طاف معاقبين

يمنع عليهم التعليق لمدة بوستين

هذا واللي وراه

اما اللي طبوا وياي فلهم جائزه

يختارون اي موضوعين وانا اكتبهم

ادري مو جريدة النيويورك تايمز ولاني محمد حسنين هيكل بس هذا الموجود

وانتوا وكيفكم عاد

:PP

45 comments:

Hussain said...

ههههههههههههه
والله يضحكون
ولا هذا الحبيب اللي يقول عدد بوستاتي اكثر احترمني

مادري الاخ حسسني جنه قع يقول انا اكبر منك
متى بنخلص من هالعقليات

Hashemy said...

لووووووووووووول هم حرامية هم يدافعون عنها

انا اقوول اذا السالفه فيها هوشه انا اكيد معاك ومع اخواني المدونجيه

وبتصك بين المدونجيه والمنتدويه

;p

الزين said...

لوووووووووووول


انت من صجك

هذولي حرامية متيمعة



وعلى فكرة المدونة نجمة سكرت بلوقها من القهر والأحباط والسبه لقت نصوصها مطشرة بعشرين منتدى

ماتت من الحرة


ولما حصلت معاي نفس السالفه
دخلت المنتدي واشتركت وكلمت المدير مالهم عشتاااو

بس الأمانة لله ما قصر

شال الموضوع
واعتذر مني
وطلعوا المشرف العام اللي اهو الحرامي
@@

غير هذا وذاك نزلت فيه بوست محترررررررم





انزين انا الحين طبيت وياك بالبوست اللي فات


بفكر لي في موضوع ما يخرش المية

وانت عليك الكتابه

:)



وياااا حبذا لو كان عن الحداق

همممممم

نشوف

molok said...

التطبيل اصبح عادة متأصلة في الشعب الكويتي ..

لله يستر :(

حسام بن ضرار said...

المنتديات هذي امراض نفسيه

معظمهم عقولهم عقول يهال و تصرفاتهم بنظام الفتوه و الشلليه

و الصوت عندهم ضايع و الحقانيه آخر ما يفكرون فيه

بإختصار... المنتديات مستعمرات من الامراض النفسيه و المشاعر السلبيه

Diver said...

الصراحة انت مسكين
دشيت على المنتدى و قريت شسوو فيك مادري ليش تذكرت البرانا في الامازون لما يقطون لهم شي مجروح

صبا said...

زينااااااتي


الله يقطعهم الحراميه
فوق شينهم قوات عينهم
اسمهم حراميه ما عليهم شرهه
خل يولووون
والهوشه اليايه بطب معاك
بس قولي فبلها ايييب العجره وديرنفيس لزوم الفهلوه
؛)

وانا ما طبيت فيك
بس قريت التعليقات توني ومت من الضحك
البنات فهمو قصدك غلط
وانت ما قلت شي ..وهذا وووواقع
على العموم
حصل خير
وانت قلبك كبير
:)

وانا ابيك تكتب موضوع عن
مواقفك الي تضحك مع المرضى او المراجعين الي يمرون عليك
:))

Hussain said...

صباااااا

شلونج

اقول شسالفة العجره والدرنفيس

!!!!!!!!!!!

ماقلتيلي انتي وين ساكنة
;p

بومريوم said...

من صجك انت؟:)
انا باطة جبدى هذى سويت ليلى..
تمشى و تنسخ
و مو اول مرة
عجزت و انا احكت مبيوق..بس ماكو فايدة
شى يحر

Eng_Q8 said...

انت من صجك ادش منتيادت لا واتناقشهم اساسا كل المواضيع ماخذينها من مكان ثاني حتى الاخبار ياخذها ويحطها ويقول مصدر موثوق

اخذ اي جمله من اي مدون وحدها بقوقل شوف جم منتدى حاطها ويقولون عشان يشهرون مدوناتهم يا عمي مرض

mtfa2el said...

شرايك انا مرة شايف كتاب ديني
بايق اشكره اخبره من كتاب ثاني ولا ثلت ارباع الكتاب
و كاشخ بالمقدمة و شلون تعب بالموضوع و بحث و أشكر كل من ساعدني و هالهذرة الزايدة
هذا و بالدين جذي يتكلم شلون موضوع عن باسكن روبنز
لا و اقوى شي اللي يقول يبون يسوون دعاية حق مدوناتهم
و مسوينها مدونجية و منتدوية
لوووول
اي و الله محترين من المنتديات شكلكم
:p

حاطب ليل said...

خفو على "المنتدجيه" شوي:)
ادري كله
قص ولزق
بس فيه "تنوير" من حيث لايعلمون:)
...
انا خريج منتديات على فكره..
وفادتني هالتجربه
..
بالانترنت واسم مستعار وتطمحون لحفظ الحقوق
مستحيل:)
..
خلو الناس تستفيد معدل اعمار الفعالين بالمنتديات
"بالطعش"
..
وادامك الله
فزاع
"للمدونجيه"
:)

حمودي said...

من ساب داره قل مقداره تهد البلوقات وتروح هناك ليش ؟

DiLLi O MiLLi said...

أنا كنت واقفه معاك بالبوست اللي فات
بس زعلـــــــت
لأنك شقحت تعليقي ورديت على اللي بعدي ولاااا رديت على تعليقي !!!!!!ء
:(


غـــــش بالتجارة

esTeKaNa said...

الله يجعلك ذخر للمدونين والمدونات
:Pp~
الحين يصير اضحك؟
هههههههههههههههههه
كسرت خاطري
!!
لا ينكسر خاطرك على نفسك
انت ما قصرت
وكل المدونين والمدونات في حمايتك
:PP~

Q8EL5AIR said...

حبيب قلبي والله :)

والرجال ماتعرف الا اذا اشتدت الشدايد .. وانا اشهد انك راعيها :)


اخوي العرزالة ..


اولا : كلمات الشكر لاتسعني على دفاعك للمبدأ الي تبنيته في المنتدى ومو غريبة عليك وعلى الي مثلك وشرواك ..
ولا قصور بالمدونيين والمدونات :)

فيعطيك العافية وعلى راسي والله ..



ثانيا :
امسحهه بوجهي اذا حاشك طشار من كلامهم الي يعكس تربيتهم واخلاقهم !!!!

ويامال صدرك العافية ان شاء الله :)



وخل عنك هالاشكال وانا اخوك لانهم مايستاهلون انك تشوفهم .. فما بالك تحاورهم على تدني وسوء أخلاقهم ..!!!

امش جدامك .. ولا يضرك الي وراك .. يطقون اصبع !!



وخل شعارك هالابيات :)

يخاطبني السفيه بكل قبح ... فاكره ان اكون له مجيبا

يزيد سفاهة فازيد حلما ... كعود زاده الاحراق طيبا

اذا نطق السفيه فلا تجبه ... فخير من اجابته السكوت

فان كلمته فرجت عنه ... وان خليته كمدا يموت



وهذي بعد :)


قالو سكت وقد خوصمت قلت لهم ** إن الجواب لباب الشر مفــتاح

والصمت عن جاهل أو أحمق شرفا ** وفيه أيضا لصون العرض إصلاح

أما ترى الأسد تخشى وهي صامتة ** والكلب يخسى لعمري وهـو نباح




وتحياتي ..
ويسلموااااااااااااااااااا :)

المتهـافت said...

إذا كنت ذا رأي فكن ذا عزيمة
إن فساد الرأي أن تترددى
;)

تحياتي لروبن هود الي يرد الحق لأصحابه ;p

-mate said...

قريت تعليق الاستقراطي عندما قال

انت عضو مستجد يالعرزالة و لما تتكلم مع اللي هم أقدم منك بالمنتدى حاول تكون عندك بعض اللباقة في الرد اللي ما أعتقد انك فاهم أي شي من اللي كتبته ،،، مشاركتين لك الأولى رفع موضوع و الثانية رد لا يأتي الا من طفل ،،، الأعضاء أخوان قبل كل شي ،،،

سفاهة وقبح وتفاهة .. ودي أدوس إب بطنه هالياهل

موضوع انباق، شالدفاع المستميت عن حرامية؟؟ تدش بلوقات الناس وكوبي بيست على بستاتهم وتحطه موضوع في منتدياتهم الهابطة. واللي قهرني الياهال كلهم يردون عليها مشكورة حبيبتي.. العفو حياتي

أما الصفة الثانية اللي أطلق على ليلى هي النفاق

إشلون تقول: في مشكلة أنقل من أصدقائي؟؟

يال كذبك ووقاحتك يا ليلى

أنتِ الآن حرامية ومنافقة!! في نفس الوقت

-mate said...

أما أنت يالعرزالة

فأشهد أنك رجل .. والرجال قليلو

Kuwait said...

@@
كلا ابسبـة قريبا وترقبوا :\
لا اتوب اتوب خلاص ما راح اعيدها ;p
والله المدونين مساكين كـل من يمشي ويخمط من أفكارهم سواء منتديات والا كتاب مقالات بالجرايد والا حتى الي عندهم صفحات ثانيه مني والا مناك وعلى طول حط البوست بإيميل وطرش جنـه الأخ تعبان فيـه :)
انا وحده من الي طقت جبدي من سوالف الايميلات :(
كل يوم انصدم ببوستاتي تفتر بالايميلات لا والمصيبـه اني مفضوحـه بإسلوبي وشغلات خاصه اتبين بالصور تدل على ان صاحبة الصور انا :\
وعاد استلم النغزات يا كويت انتي اتسوين ايميلات وتطرشينهم وانا قمـة الهبـل والتبهلل احم احم ;p
ودامك تقـول
" مرسي الزيناتي اتهزم يا رجاله "
أنا أقوووولـك ..
" بالإنـجليــزي "! ;p

بنت الشاميه said...

الاخ بومريوم ماقصر معاي
لقيت الاخت نفسها بايقه البوست بالكامل حتى الصوره ناقلتها نفسها
بس اللى غيرته شالت اسمى وحطت اسمها
وحاولت الاتصال بالمنتدي
واشتكيت عند واحد حاول معها
قالت له احنا ربع ومافيها شيئ ان ننقل من بعض وانا ما اعرفها اصلا
رد عليها قالها حطيى اسم اللى ناقله منه على الاقل ,,,,فحقرته وما ردت عليه
ومثل ما تفضلت كل ربعها وياها
الظاهر الاخت متعوووووووده على السرقات من المدونات ولاعبه لعب فينااااا
انا اقول احقرهم وخلهم يولون
الحراميه اشكال وانواع
وشكرا لك على حرصك لاخوانك المدونيين

كويــتي لايــعه كبــده said...

تقول لهم تيس يقولون لك احلبه

المقال مبيوق يا ناس يقول لك احترم الكاتبة
مو الكاتبة اللي بايقته
:)

بس مثل ما قلت للبقية من الأخوان والأخوات في هالحالات العديدة من قبل... حنا مو داشين للشهرة وما نبي الا انتشار الافكار بمساهمة متواضعة لنشر الوعي وكل واحد باق فكرة وعاد كتابتها اعتبره ساهم في نشر الفكر
:)

لا تحط دوبك دوب هذول

لو قبل عصر الانترنت كان لقيتهم راكبين قواري بالشوارع

العرزالــــــه said...

حسين

بالضبط!!

العرزالــــــه said...

هاشمي

شفت شلون

ويطلعوني انا الغلطان

العرزالــــــه said...

الزين

تعجبيني زين تسوين فيهم

وبوست الحداق جاي جااااي

العرزالــــــه said...

ملوك

التطبيل والانتصار للمجامله

العرزالــــــه said...

حسام ضرار

اتفق معاك بالوصف واختلف بالتعميم

بعدين انت من الاعداء مو قلنا عقاب

:P

لا اتغشمر حياك وتشرفني

العرزالــــــه said...

دايفر

ليش خليتني ينكسر خاطري على روحي اكثر

الله يالجمله اللي طافت شنو صعب صياغة الضمائر مو صج

العرزالــــــه said...

صبا

وانا اشهد لج انج من اللي فهموني وفزعولي

عساج ذخر

ومواضيع المرضى ماكو يعني ماكو

انا اكتب مواضيع عاديه الكل يقوم علي

:(

العرزالــــــه said...

بومريوم

الحجي مو بس اهي

اللي وياها مشكله

العرزالــــــه said...

مهندس

اي انا اسوي هالحركه وايد

جمله وادورها بقوقل مليون منتدى كل واحد يقولك حصريا

العرزالــــــه said...

متفائل

الاردى اللي يبوق برنامج ينزله مع الكراك ويقول لاتنسونا من دعائكم

والكل يدعيله شي يضحك

العرزالــــــه said...

حاطب

كلنا خريجين منتديات انا سنين الدنيا والدين اكتب

ومعليش اسامي مستعاره وماكو قانون يجرم هالسوالف بس اكو ذوق عام ومصداقيه للكاتب تضيع المفروض بهالسوالف

العرزالــــــه said...

حمودي

اي والله صدقت وصح لسانك انا الغلطان

العرزالــــــه said...

دلي

سوري والله سوري ورديت عليج هناك

معلش بس كان الضرب شغال علي

العرزالــــــه said...

استكانه

تضحكين علي ها

شوفي اذا احد باق مواضيعج منو يدافع عنج

:P

العرزالــــــه said...

كويت الخير

شدعوه احنا اخوان وماسويت الا الواجب

ومابينا شكر ماشكر

خلهم بس يتعلمون ويعرفون ان مو طوفه هبيطه

:)

العرزالــــــه said...

المتهافت

ضحكني تعليقك وايد

روبن هود عيل هاااا

العرزالــــــه said...

ميت

بعد جبدي

الحجي مو بس جذي

يقولون لها ماشاء الله بلاغتج بالموضوع قويه

تقول مشكورين ماقصرتوا..جنها اهي اللي كاتبته

مسخره

العرزالــــــه said...

كويت

انا مره واحد يقولي بدزلك ايميل قوي اقراه

اشوف والا بوستي بدون اسمي

عااااااااااااااادي

المشكله لما تطيح على البواق ويعاند وتلقى وياه اللي يطبله

العرزالــــــه said...

بنت الشاميه

حياج الله

والمشكله مثل ماقلت حق ميت

مايكتفون بالسرقه

بل بالشكر لمن يثني على مجهودهم بالكتابه جنهم اهم اللي كاتبين صج

واخر شي محد يسمع صوتك وياخذونك بالطوشه

العرزالــــــه said...

كويتي لايعه كبده

============
المقال مبيوق يا ناس يقول لك احترم الكاتبة
مو الكاتبة اللي بايقته
=============

لوووووووووووووووووووووول

فريج سعود said...

وانت اشلك بمنتديات اليهال ؟

الله يزيد النعمة

لا ويقولك الاخت عندها 14000 مشاركة

من يدري اشكثر منها مبيوق

بس صج اشتغلوا عليك

الظاهر ما يرضون عليها

بنية وكلهم متأملين انها حلوة وكتكوتة

بالله انت اشبتفيدهم في ؟

مستعدة said...

don't miss it !

http://ready4omah.blogspot.com/2009/03/dont-miss-it.html

العرزالــــــه said...

فريج سعود

شفت شلون

لو داش بنك بنيه احسن لي