Sunday, August 1, 2010

انا خربت وياي


بتقولون مو طبعك بتقولون مو عوايدك اهم كلمتين بالقلب بقولهم واللي يعجبه حياه الله واللي مايعجبه يطق راسه بالطوفه.٩
.
لما الوقحه مي الفرج رمت بالجنسيه على الارض، قامت مجموعه من الحضر بالدفاع عنها من باب انها مو صاحيه مع ان كل من احتك فيها يعلم انها مو مجنونه للدرجه التي تسمح لها بمثل هذا الفعل الشنيع.٩
.
لما مات المقبور عماد مغنيه وهو المشتبه الاول به في خطف طائرة الجابريه وقتل من فيها سواءا بالمشاركه المباشره ام لا، قامت مجموعه من الشيعه بالدفاع عنه وان ماعندكم دليل قاطع وكأن في أحد سامع أو شايف صدام حسين بنفسه وهو يأمر بالغزو.٩
.
الآن لما خالد المريخي اعلن عن تنازله عن الجنسيه الكويتيه على الهواء وقام بالتفوه ببعض العبارات المسيئه للكويت، قامت مجموعه من البدو بالدفاع عنه وان نطروا القصه كامله وماتدرون شنو الاسباب وكأن المفروض نصب له الجاي ونقوله آمر بعد في سبه ماقلتها بخاطرك في شي تبي تضيفه.٩
.
مسخره مابعدها مسخره!٩

هالديره اللي عطتنا اكثر مما نستاهل ورزتنا وسوتنا اوادم من بعد ماكنا حفاي منتفين

هالحبيبه اللي عمرها مابخلت علينا بالغالي والنفيس واحنا اللي اكثرنا ماسوالها ولاشي

هالارض الطيبه اللي ماتبي منا شي ولا اصلا في واجبات او حقوق لها علينا متعبه ونقدر نبين فيها حبنا واخلاصنا لها

هالغاليه اللي اكثر وافدينها اهم اللي يشتغلون فيها واكثرمواطنيها يتميزون عنهم بس انهم يستلمون معاش "كويتي"٩

الحين حتى الدفاع البسيط المتواضع بالكلمه صار وايد؟!!٩

ياللي ماتستحون على ويوهكم انزين حتى دفاع ماتبي منكم بس كفوها شركم!! اكلوا من خيرها ونتفوها ولاتقدمون لها شي بس الكلمه السيئه والافكار الخبيثه احتفظوا فيها لنفسكم!!..هذا هم صار وايد؟ ماكفاكم ماكليتوا هم تبون تطعنون فيها زياده؟ وعشان منو..ولد عمي والا ولد خالتي والا ولد طائفتي؟٩
.
الا شاهت الوجوه
.
ثم شاهت الوجوه
.
ثم شاهت الوجـــــــــــــــــــــــــــــــــــــــوه
.
والله العظيم حرام فيكم الهوا اللي تتنفسونه منها

22 comments:

حنطفيس said...
This comment has been removed by the author.
حنطفيس said...

مو طيبه الابراهيم اللي رمت الجنسية

Blog 3amty said...

جلّت حيا

العرزالــــــه said...

حنطفيس

تم التعديل شكرا

العرزالــــــه said...

blog 3amty

اي والله

violinist_q8 said...

حبيبي الي يرضى الاهانه على غيره بحجة حرية الراي ويرضاها على نفسه كيفه قلة ادب ويتصرفون مع بعض
بس الي يرضاها عالكويت ياكل ت..ن
الكويت فوق روسهم واي كلمة ضدها احنا نوقف مع الكويت بالحق لما واحد واطي يقل ادبه عالكويت بتسجيل صوتي وهم يدافعون عنه هذول شنو؟ مافرقوا عن الكواوله والزلمات الله ياخذهم

kuwaiti_cool said...

الله يلوم من يلومك
صدقت بكل ماقلت

فريج سعود said...

حب الكويت الحقيقي يسكن القلب وتعرف مقداره وقت السفر والازمات

هذيل الي قاعد يدافعون عنه او حتى يلينون الكلام انما يدافعون عن نفسهم لانه ما قال الا الي بخاطرهم

EXzombie said...

للأسف من ردى اهلها

Hope said...

السلام عليكم و رحمة الله و بركاته

و اللي يحر اكثر و اكثر انهم يتغنون بالشعارات الوطنيه و نحب ديرتنا و نحبها .. و بس كلام .. ما دروا ان الحب بالافعال مو بالاقوال

الله المستعان

مَـــــعْــــمَــــعَـــــه said...

الشرهه على قناة الراي اللي مطلعينه والله لو بمكان ثاني جان القناة تسكرت والمعيدي عدموه

حياتي هدف مو عبث said...

اللي من هالنوع

كلهم دفعة مردي

:)

well_serviceman said...

عزيزي ، معلش ، لا تحرق دمك على هذول

ياخوي احنه للأسف هاليومين أبناءنا قاعد يتربون على الغلط ، نفس طائفي ونفس فئوي مو صج قاعد يطلعلنه من كل صوب

مثل ما قال بلوق عمتي ، جلة حيا

عاضـه said...

اخوي العرزاله
تذكر الشيخ على الجابر يوم يكتب مقالته عن الازدواجيه و الولاء ؟
و آنا لما ذكرت ان ما يعرف الأوادم هذا نوع من التأكيد
ان الشيخ عارف
بواطن الامور
و رد على اللي قاله منو انت اقصاك مواطن و روح اقعد
بمزرعتك عزايز و جابل حمامك الزاجل

اذكرك باللي قاله

قال ما يدافع عن المزدوجين
الا واحد من ثلاثه
يا اهو نفسه مزدوج
او واحد من اهله مزدوج
او واحد من ربعه او جماعته مزدوجين

و اللي يدافع عنهم هذا ولاءه مشكوك فيه او معدوم للديره

و الحين نصدق الشيخ علي و الا واحد ايي و يدافع
و يقول انما و حيثما و ربما و حرية راي و كيفه و اهو حر

اللي يدافع عن اي واحد قلل من شان الديره
نقوله ما نبي نعور راسنا معاك
روح جيل بيتك يايك رمضان .
و الكلام قالك اياه الشيخ على و احنا خالصين منك من زمان

عين بغزي said...

العرزالة أضحكتني

بدوي حضري شيعي سني كلنا كويتيين وعند الوطن كلنا نوقف وقفة وحده

لا تشكك في وطنية احد كلنا نحب الكويت

و مو معقولة الجميع يتفقون معاك بالراي أنا ياما علقت عندك أايدك و بموضوع الشاعر خالد انا ما عارضت رايك بس قلت لك لا تحكم علي شي مبتور ..

يعني شكو واحد صار سعودي احنا شكو فيه .؟؟
اذا رفيجة ولد أمير او أمير احنا شكو فيهم .؟؟

كبر عقلك

الناس ما تجي علي رايك ولا انت تجي علي رايهم

le Koweit said...

للاسف نسينا اننا كويتيين !

صرنا بدو وحضر وسنة وشيعة


متى نرد كويتيين فقط ؟

panadool said...
This comment has been removed by the author.
الزين said...

انت صحت معاك

ما خربت

:)

يقول الجويهل اني مزدوج said...

كلامك فيه تناقضات وايد


للاسف مو فاضي ارد عليك

بس قريت كلامك وقاعد اضحك

وشكرا

العرزالــــــه said...

اشكرك كل من علق بالتأييد

مش من باب التأييد بالطبع

لكن لاني اشوف الحق واضح واعتقد بما اقول

الله يزيدكم بصيره

:)

العرزالــــــه said...

عين بغزي

اهي مو عانيه يوم توافقني ويوم اوافقك

١+١=٢

اقولك للمره المليون يختار الجنسيه اللي يبيها اهو حر

لكن بهدوء

اما يطلع عالهوا ويستخف بالكويت

اسمحلي اضحك كثر ماتبي بس ليلحين الموضوع جايد

العرزالــــــه said...

الجويهل

سلم