Monday, December 3, 2007

اللفـــــــــــــــــو


كلمة نرددها وايد ويتضايقون منها وايد


بداية خل نذكر بعض الحقائق

=================

1-بالكويت كان في عوائل وقبائل وايد عايشين فيها قبل الصباح ومو صحيح مثل ماتقول ميمونه الصباح انهم اول ناس انخلقوا بالكره الارضيه..صح اسمها ميمونه؟المهم مو وقتها راح ارد لها تالي

2-وحتى بعد هذا وايد قبايل وبدو وعيم وغيرهم يوا الكويت قبل وايد عوايل من اللي يسمون نفسهم عيال عوايل أو أصيلين أو عروقهم بالماي أو عيال بطنها مع كل الاحترام لكل الفئات اللي ذكرتها انا هني مو قاعد انتقص من احد وطولوا بالكم لوسمحتوا لحد يأول كلامي .واضح ياشباب؟ نكمل

3-مثلا كان في بدو من عمر الدنيا بالكويت معروفين يسمونهم بدو الكويت ولهم اماكنهم اللي تسمت عليهم وهم العيم اصلا من اول الناس اللي فتحوا مدارس بالكويت

4-هم الحضر او النياده او الزبيريه كلهم او اغلبهم يرجعون الى قبائل عربيه أو أصلهم بدو

انزين خلصنا شالمقصود؟

المقصود اني لما ايي اعرف اللفو مابي احد يفهم غلط..ماشي؟

========================

بسم الله

أول كنا نتحلطم

البدو والحضر..العيم والعرب..الشيعه والسنه..الكويتيين والبدون..الخ

لين هالفئه اللي موجوده من زمان برزت اكثر واكثر وصارت حديث الساعه

من هم اللفو؟

1-حديثي النعمه

2-عديمي الولاء والانتماء..اللي قلبهم مايحتر على الكويت..اللي مايحسون بعدم الأمان لما الكويت تتهدد من جيرانها..

3-عديمي الاخلاق والتربيه..ماعندهم سنع ولا احترام للعادات والتقاليد..

4-الانتهازيين..يوا الكويت "عمدا" لما عمها الخير مو صدفه يعني..وطلعوا منها وقت الغزو "عمدا ومن غير اي عذر"..ورجعوا يطالبون بأقصى التعويضات ومكافآت الصمود..

5-اهم اللي ينهبون بالكويت ومن خيراتها ويسرقون بكل انواع السرقه من الصغيره الى الكبيره ويأخذون مالايستحقون ويشوفون ان هذا من حقهم وليس سرقه..

6-اهم ناس مايفيدون الكويت بذرة..ويضرونها بألف ذره..

7-اهم اللي عندهم بدال الجنسيه الف..

8-اهم اللي يشجعون على خراب الكويت ويدخلون لها العماله السيئه والمخدرات وغيره..

9-هم عبيد للشيوخ..

10-هم من يسيء لرموز الكويت ولاعندهم احترام الا لصاحب المال..هم من يسيء لتاريخ الكويت ورجالاتها..

11-هم من يحقد على الكويت واهلها مع انهم يحملون جنسيتها..

باختصار..

هم من يعتبرون الكويت البقره الحلوب فقط لاغيرو اللي من تزول عندهم بدالها الف مكان ومكان بديل

على فكره



اللفو مالهم مناطق معينه..ولا عروق معينه..ولا مذاهب معينه..ولا اشكال معينه..ولا لهجه معينه..

اللفو اهم خليط من كل فئات المجتمع



==================
أمثله على اللفو

بس طبعا راح أغير تصريف كلمة لفو عشان لافي ولافيه ولافين مايزعلون

1-حرمه ورفيجتها..يروحون مجلس الأمه ويصرخون بأعلى صوت..ويسبون بأعلى صوت..وبدون أدب..يغلطون على عوايل الناس..والسبب؟ عدم اسقاط القروض..عدم اسقاط قرضها اللي راحت فيه لندن وباريس وجينيف مع قروبات سفريات الدبوس..وفوق هذا تصور كل اللي سوته مفتخره..هذيله لفو..

2-عايله طالعه بمكان عام..الأبو يتكلم عربي مكسر..والأم تصرخ على عيالها وتكلمهم بالإيراني مع ان جنسيتها كويتيه..والبنات يسبون بصوت عالي وبوقاحه ماجنهم بمكان عام..هذيله لفو

3-شباب بمجمع..يلحقون بنت ويا أهلها ويغازلونها جدام أبوها وأمها ويوصلونهم لي السياره..وممكن يتمسخرون على الأهل ويتهاوشون مع أبوها بكل وقاحه وجرأه..هذيله ماتربوا ولاعرفوا عادات الكويتيين ولاتقاليدهم..هذيله لفو

4-مسؤول يطلع بالجرايد كل يوم..يدافع عن أي وافد أو أجنبي يغلط على الكويت بحراره..ويطالب بتجنيس كل اللي ممكن يستفيدون منهم اهو واهله وجماعته فقط ويضرون الكويت..هذيله لفو

5-المره اللي تقعد ويا اخوها تنطر جدام عيادة الطبيب وتقوله والله انك مينون..هاد ألمانيا وياي الكويت وتطب بالكويت مع انها كانت ميته عليها لين خذت جنسيتها قبل جم سنه..ألحين قامت اتفلسف..واخوها يأيدها واهو اصلا ماراح هناك الا على حساب الديره..هذيله لفو

6-الممثله غير الكويتيه اللي تمثل مسلسلات كويتيه على انها كويتيه وتنشر صوره غلط ماتمثل ولا احد بالكويت غيرها وغير فكر المنتج والمؤالف والمخرج الوقح اللي رضوا يتكسبون على حساب سمعة الكويت..كلهم هذيله لفو

7-الكويتي اللي يسافر بره ويشوف نفسه على كل الدنيا وحسباله ملك الكره الارضيه ومايبقى احد مايسفل فيه علبونا كويتي هذا موشايف خير وقاعد يعطي سمعة سيئه عن الكويت..هذي الفئه هم من اللفو

8-الكويتي اللي يتاجر بشغله معينه وينصب على الناس ويبوقهم وماعنده ذرة شرف أو أمانه أو صدق..هذا من اللفو

9-اللي يحتقر باقي الناس لمجرد انه ولد هالعايله او عندهم هالكثر فلوس هذا موشايف خير ومن الشباب اللفويين

10-اللي يشتريلك شغله معينه أو توصيه على شي بمبلغ بسيط وزهيد بو جم دينار وايي يطالبك بالفلوس بشكل وقح وجنه موشايف خير وجنه مايثق فيك مع انه مستغني ومو بحاجة الدينار أو الخمسه هذا أيضا من لفو أكاديمي

11-اللي انت واقف بمكان بتنجز معامله او واقف دور ايي ويخطر بكل وقاحه وعينه بعينك وساعات يدزك هذا لفوي درجه اولى من الاشراف بعد

12-الشباب اللي يرقصون ماكارينا عند اللعبه اللي يسمونها القرقاشه بحديقة الشعب المغرب يوم الخميس أيام ماكان الخميس عطله..هذيله دبل شوت لفو مره للرقصه بمكان عام مومستحين ومره لتسمية اللعبه

13-اللي يدش مكان مايعرف فيه أحد ويبدا يغلط على الاكو والماكو هذا لفوي

14-اللي يطلع مع صاحبته بمكان عام ومعروف وتكون اهي اوقح منه ويخزون الناس يعني اللي مو عاجبه يطق راسه بالطوفه لا ويمكن يتلاممون او عاد كيفكم تعرفون هذيله أنجس لفو

===================

بعد؟

تبون كلام أكثر؟ أمثله أكثر؟أعتقد وصلت النقطه

عاد انتوا قيسوا عليها وبتشوفون كمية اللفو بالكويت

آنا لي هني وأوقف

37 comments:

فريج سعود said...

هلا بالي لافاني يا هلا به
صدقت اللفو اصحاب التصرفات البايخة المسألة مو متى ياي الكويت
واذا على حسبتهم
الدكتور شفيق الغبرا اكبر لفوي
بالله هذا حجي

ButterFlier said...

جميل يا جميل

Q8Disaster said...

بوست اكثر من رائع

انت طلعت حرتي بكل هاللفو

زين تسوي فيهم

وعلى قولة اخوانا المصريين انقولهم ( جتكم القرف مليتو البلد ) لوول

ويعطيك العافيه

J Daily said...

ياساتر (:

bo9ali7 said...

بحسبة بسيطة
هي علاقة عكسية بمدى حبك للكويت

IreLanDi said...

واذا اجتمعت اكثر من صفة في شخص واحد..!!

الله يكون بالعون

شكراً اً اً

فتى الجبل said...

تسلم على البوست
وصح كلامك...اللفو ماله عايلة ولا جنس
اللفو اهوا واهيا اللي ما يعرف يحترم الكويت وأهلها ويحترم بقية خلق الله
___________
لابد من تحرك ينتشلنا من هذي الأوضاع السيئة

Anonymous said...

اللفو الي يحط بلوج ويقعد يسب الناس ويتفلسف ويعتقد انه فاهم كل شي لانه من خريج امريكا هذا لفووو حد اللفوووو

bass said...

نعم اللفو قد يكون أصيل و غير أصيل سني أو شيعي الفو الي ما يحترم أنسانية الغير و بعد ألي يستغل منصبة و يبوق و بعد ألي يظلم اللفو هو الانسان و في نفس الوقت ما يستحق يكون أنسان

حلم جميل بوطن أفضل said...

و هل أصبحت المواطنة بالأصل أو زمن الوصول للكويت. يجب أن لا ننسى أن الجميع وصلوا الى الكويت حفاي و منتفين و كل ما تراه من مظاهر العظمة هو من خير هذه الأرض فعفية على هالأرض اللي سوت اللي ما يسوي آدمي .. و اللي يقول بغير هالكلام و يقول أنه أتى للكويت و لديه المال و أن المكان الذي قدم منه راقي و متحضر فيمكنه و بكل بساطة أن يرجع الى المكان الذي قدم منه

مفهوم المواطنة في هذا الموضوع

http://7ilm.blogspot.com/2007/07/blog-post_13.html

علشان يكون النقاش علمي و بعيد عن العنصريات

الزين said...

بعد بعد

في نماين وايد

مثلا اللي يشوفك راكب سياره ما يقدر عليها والحسد والغيره ذابحينا

وبأعلى صوته يقول شدعوة مو مأجرتها

شكو انت؟؟

اللي يقعد يحجي بأصله وفصله

وابوه واهله

عباله الأصل بالإسم

ونسى ان آدمى ما عنده أخلاق

واسمه ما يشيله

هذا اذا كان له اسم

اللي لي قعد وياك يسأل انت من ولده

فلان الأصيلين؟

بالله هذا سؤل

اففف

وتقول لي لفو

يعين الله

العرزالــــــه said...

فريج سعود
وانت الصاج تصرفات وقحه ماتدل ان صاحبها متربي
:))

butter
:)

disaster
اي والله ملوها وعلى سالفة "اخوانا" المصريين انصحج تزورين مدونة فريج سعود معلق على هالنقطه
:)

يعقوبوو
صاحبك مال ال15 الف منهم؟
:p

bo9ali7
بالضبط انت قلتها بكل اختصار
:)

irelandi
المشكله ان اغلب الاوقات تجتمع الصفات مثل ماتفضلت!

فتى الجبل
وين واحنا متفرقين اخوان سلف ليبراليين مستقلين بدو حضر سنه شيعه مادري شنو واحنا كلنا على بعضنا مانيي مليون

anonyous
بالضبط :)

بس
اي والله صدقت
:)

حلم جميل
يبيلك بوسه على تعليقك
صج اللي مو عاجبه ترا كاهي الحدود مفتوحه حتى العراق فتحنا حدودنا وياها
وعلى سالفة المواطنه هم وهم وهم راح ارد لها ان شاء الله
:)

zozota
اول شي يالقاطعه
بعدين الحسد ماشاء الله تارس الديره تقول حفاي وميتين يوع ماجنه كل واحد عنده اللي يستاهله واكثر

mtfa2el said...

اطق لك تحية على تعريف اللفو بهالأسلوب
هذيل اهم الفو بالضبط

على نفسها جنت براقش said...

عبرت عن اللى بقلبى
تسلم و يسلم كي بوردك

و اعجبتنى دبل شوت لفو

بستخدمها وايد
:)

Anonymous said...

موضوع رائع و ممتع بنفس الوقت, و لكن يا زميلي إسمحلي أختلف معك في بعض المفاهيم.

أولاُ بصريح العبارة اللفو هم بغض النظر عن أصولهم و من أين تنحدر تلك الأصول ....أنا أراهم
"عمره ما تبخر تبخر و إحترق" أي محدثي نعمه و توه يحوشهم الخير


و النقطة الثانية اللي أختلف معك فيها في بعض المشاهد اللي ذكرتها
على سبيل المثال عندما توصي واحد على شئ و يطالبك بسعره أو فلوسه..فهذه ليست وقاحة بقدر ما هي حرص على الفلوس.. مانول "جعصنه" و لكن فعلا هناك بالكويت ناس ما تنعطى ويه و ما يعرفون مثل ان صاحبك عسل لا تاكله كله,, و قد صارت فيني هذه الشغلات كثيرا ان واحد يوصيني على سوالف اسعارها فوق ولا يعتبر إن لدي إلتزامات...
المشهد الثاني سالفة عندما يخرج واحد مع مرته او صاحبته او صديقه و يستمتعون بوقتهم بكل إحترام دون الإلتفات على أي كويتي ثاني..فهذا شئ جميل لنبذ العادة الجديدة للكويتيين و هي اللقافة و بلاغة الشف و المخازز..شفيها اذا الواحد مع زوجته راحوا سينما و ماسكها من خصرها و لمها و باسها...شفيها اذا الواحد مشى مع زوجته او صديقته و ماسك ايدها و فحانين ببعض و مالهم شغل بالناس طالما يحترمون القانون و الذوق العام
ما اقصد السرسرية اللي يمشون مع بعض و طاقين الناس بالحيطة و لكن اقصد الناس العاديين.....
فعلا هناك مفاهيم للفو و لكن يجب ان نكون منصفين شوية و نعرف كيف نوزع تلك الصفات على من يستحقها

Madrii said...

ببساطه،اللي ما عنده لا ذمه ولا ضمير,, خوش بوست.. قواك الله

العرزالــــــه said...

متفائل
تسلم حبيبي :)

براقش
عاد تصدقين؟ لما كتبتها قلت هذي حق براقش اكيد راح تعجبها

عتيج الصوف
هلا والله :)

بالنسبه للموقفين انا اتفق معاك 100% بردك لأنك يمكن ما فهمتني بهالنقطتين :)

النقطه الاولى لوتلاحظ انا قلت جم دينار او خمسه وحددت المسأله وطبعا قصدي اذا احد تعرفه مثلا بالدوام ويبتله شغله بدينار او اثنين ماراح تطلبهم منه اذا مره وحده سويتها له صح؟!
اما اللي يطلب اشياء غاليه وبشكل وقح ومتكرر ومايدفع لا هذا اكيد تاخذ حقك منه مو عيب

الموقف الثاني انا كنت اقصد اللي انت قلته اخر شي
الصاحب وصاحبته اللي بكل وقاحه يتمشون ويتلزقون ابعض والبنت مولابسه شي الصدر كله طالع ويسوون حركات جدام الناس والعوائل بأماكن عامه ومحتشمه

هذا اللي انا اقصده مو واحد ويا زوجته او غيرهم من اللي محترمين نفسهم
:)
مادري
حياك الله والله يقويك :)

Eng_Q8 said...

كفو والله

وفي رواية اخرى يسمون الالمان

عدل :)))

الي لفو وايد ماادري اشلون بنفتك منهم

AnGlOpHiL said...

وايد اشياء ذكرتها تخص حثالة زبالة المجتمع !

Anonymous said...

انا فيني حساسية من كلمه عاداتنا وتقاليدنا او ثوابت امتنا

العرزالــــــه said...

eng
حاضرين للطيبين :)
فيل
مو المشكله انهم قاموا يزيدون
حمودي
الثوابت مالي شغل فيها
والعادات والتقاليد ما اقصد المستمسكات اللي يزنون عليها المتخلفين
اقصد الاشياء اللي نعرفها بالفطره ان عادي او عيب

Salah said...

محاولة جيدة لتغيير وتعديل وتزيين مصطلح تفوح منه رائحة العنصرية

الأفضل رفض المصطلح من الأساس

ولا أزيد على كلام حلم جميل فقد أصاب كبد الحقيقة

العرزالــــــه said...

لفو = لفى = أتى من مكان آخر

الكلمه بحد ذاتها مو مسبه

انيي الحين على النيات

اللي نيته عنصريه مايحتاج هالكلمه

واللي يستعملها بعنصريه ايضا محد ملزوم فيه

لما نقول لفو نقصد ان عنده عادات وتصرفات دخيله ومشينه ماتعودنا عليها بمجتمعنا

انا قاعد اعرف الكلمه حسب وجهة نظري اللي اعتقد كثير من الناس يشاركوني فيها والدليل الردود

مع كل الاحترام لوجهة نظرك :)

Salah said...

كل أهل الكويت أتوا من أماكن مختلفة

وكل العوايل ممكن يطلع منهم واحد أو أكثر عند تصرفات من هالنوع

يعني ما أعتقد أن المصطلح له علاقة بالتصرفات

يعني لو تقول عن واحد ولد عايلة لفو الناس بتضحك عليك

لان المتعارف عليه ان النيادة مو لفو

العرزالــــــه said...

وجهة نظرك على راسي

والاختلاف بالراي لايفسد بالود قضيه

وان شاء الله محد يضحك علي

وبعدين وينك عن موضوع القروض؟

سألتك سؤال ليلحين مارديت علي!

:)

Selezya said...

هو بالنهايه الشخص اللاأخلاقي
عدل ولا مو عدل :)
اتمنى مشاركتك لي بموضوعي البسيط في المدونه تبعي :)

Q80MINI said...

"الكويتي اللي يسافر بره ويشوف نفسه على كل الدنيا وحسباله ملك الكره الارضيه ومايبقى احد مايسفل فيه علبونا كويتي هذا موشايف خير وقاعد يعطي سمعة سيئه عن الكويت"


ويا كثرهم بمصر:)

سدرة العشـــاق said...

صاج

و نسيت تعريف آخر للفو اهما اللي مقيمين غير قانونيين و راح يحاسبون على القانون و ووكلاء توزيع الخدرات

و الناس تبينا نترحم على حالهم من باب الإنسانية

و أتمنى ألقى تعليق و لو بسيط على موضوعي:

http://sedrat-el3eshag.blogspot.com/2007/12/blog-post_03.html

العرزالــــــه said...

سيليزيه وسدره
لي الشرف اني اعلق لديكم وعندكم :)

خوش بوستات :)

مني
اخخ يالقهر..سوتها قطر!!

Q8Disaster said...

الله يعداك خليتني وحده ههههههههههه

اي جيكت عالبلوق يعطيك العافيه :>

شقران said...

أخي العزيز العرزالة

تحية طيبة

لقد قرأت موضوعك وأغلب الردود عليها

وبداية اود أن اشكرك على طرحك للموضوع لأن المشكلة أصبحت الآن أكبر من الفساد أوغيره أوعلى قولة المثل (الطق وصل اللحية

فالمشكلة أصبحت في الوطنية أصبحنا نعيش أزمة هوية ، فالهوية الكويتية تتنازعها رهبان القبيلة والمذهب والعائلة والمصالح

خذ مثال على ذلك أحد رؤساء تحرير جريدة يومية معروفة جدا ينتمي الى اسرة كريمة جذورها ضاربة في التاريخ الكويتي ونكن لها كل الود والتقدير والاحترام ، يقول لوفد من الكونجرس

أن اميره هو حقل برقان؟؟؟؟

وهنا اتفق مع رد الأخ العزيز صالح حين قال لو كان من أخطأ ولد عائلة فإن كلمة (لفو) لن تستوعبها لأن الناس لن تستوعب ما شرحته باسهاب واوضحته لنا

لذلك نريد كلمة تسع هذه المجاميع كلها دون اختزال

واني اشكرك مرة اخرى على طرحك للموضوع بهذه الصورة الواضحة والموغلة في الشرح

ملاحظة:اللحية المقصودة في المثل أعلاه لاتعني لحية (المطاوعة) وإنما لحية الرجال الكبار في العمر ورجال العائلات واللتي كانت تدل على الهيبة والحكمة..هذا كان سابقا طبعا ونوعا ما حاليّاً

ولك مني خالص التحية القلبية

أخوك المحـــــب/

شــقـــــران

شقران said...

العزيز العرزالة

فاتني أن أقول لك أن الصورة معبرة ومضحكة على واقع محزن

تحياتي

المحــــب

شــقـــــران

العرزالــــــه said...

عزيزي شقران

شكرا على مرورك وتعليقك

بالنسبه لسالفة ولد عايله والا غيره فهذا التقسيم موجود وفي ناس مثل ماقلت انت وصالح تستنكر انك تقول عنهم لفو حتى لو اتوا بشي مستنكر ومستغرب

كلمة لفو يجب ان تطلق على الشيء الدخيل بالافعال لا الاصل

هذي مشكلتهم..احنا ناس نحاول نكون واعين ونطلق اللقب على المستنكر من الافعال لا الاصول او المذهب

تحياتي :)

Salah said...

صلاح
:)

العرزالــــــه said...

صالح ونعم وستين نعم بس يبا في بوصالح اثنين ضيعوني اسمحلي

:)

Salah said...

ينعم بحالك

بس اسمي

صلاح

مو صالح

أدري نفس الأحرف بس الترتيب يختلف

تحياتي

العرزالــــــه said...

لووووووووووووووووووووووووووووووووول والله من كثر ماني متخسبق هم رديت وكتبتها صالح بالتعليق اللي طاف
كان قصدي اكتبها صلاح لأني فهمتك

حبيبي يابصلوح