Thursday, December 6, 2007

البدون: قضية انسانيه

بداية..

ماكان ودي اني اتطرق لهالموضوع الحساس
ولكن هالموضوع برز في الفتره الاخيره وكتبوا عنه الزملاء سيليزيه وسدرة العشاق وحمد-ميدان قلمي
فبودي ايضا اني انا اطرح وجهة نظري

بس قبل لا أبدي
لازم أبين إن مناقشة المواضيع الحساسه لاتعني العنصريه او الفوقيه او الغرور او او وبالعكس اذا كان النقاش باحترام ومافيه ابتذال فهذا من باب الحرص على المصلحه ويمكن يأتي بحلول مفيده
والتأييد الأعمى من باب الانسانيه أيضا لايعني لزاما الحكمه والطيبه والانسانيه بل قد يكون فيه مضره للبلد

اتمنى منكم التفهم ان هذا موضوع حساس لوايد ناس..فلا نخلي الاختلاف بوجهات النظر مدخل للطعن بالنيات والاحساس والتربيه
وتفهم ان وجود وجهة نظر مخالفه للرأي لايعني بحال من الأحوال تفوق الحس الإنساني لدى البعض عن البعض الآخر

وقبل لا أبدي
آنا عندي حكمتي الخاصه ان نص الكويتيين مايستحقون الجنسيه ونص غير الكويتيين يستحقونها
فماعندي مشكله مع الجنسيه

الزبده: لانحاول نزايد على بعض في انسانيتنا لأن بعضنا انساني بالافعال اكثر من انسانية البعض بالكلام
الموضوع: راح اتكلم عن معلومات شبه اكيده(ماني مسميها حقائق لأن محد عنده الحقيقه المطلقه حتى الان) وراح احاول اناقش الحلول واللي عنده راي ثاني حياه الله
=============================

البدون
بشر من كل مكان
من العراق من سوريا من الأردن من فلسطين من مصر من اليمن من السعوديه من ايران من دول الخليج الباقيه من السودان من الصومال من كل الدول العربيه من باكستان من الهند من افغانستان يمكن ومن كل مكان

هل في منهم من الكويت؟ (يجوز) لكن الى الان ماشفت حاله (انا ماشفت بس قد يكون في)وحده ثبتت انها من الكويت ولاسمعت من احد متأكد انهم من الكويت

مثل سالفة القروض الى الان ماسمعت قصه وحده مقنعه أو إن أحد قالي قصه ويعرف صاحبها شخصيا وظروفه الا ويطلع اخر شي صاحب القرض مهمل في جانب من القصه ويتحمل مشكلته

نرد للموضوع
لاتقولون اعرف واحد من سنين الدنيا اهله بالكويت بس يدهم كان ريال عود وجاهل وقال الورقه ماتسويني كويتي على ايام الاحصاء ومات وعياله صغار ويالله يسدون يومهم ورزقهم وما التفتوا لها لين طاح الفاس بالراس
ولاتقولولي اكو اخوان نصهم كويتيين ونصهم لا
قولولي يدي أو يدتي يعرفون ان هذيله كويتيين من عمر الدنيا ويقولون انهم يعرفونهم من عشرات السنين وجيرانهم
لازم في اثبات والا الحجي اقظب والمشكله وايد بدون مساكين اهلهم زارعين ابراسهم هالفكره الغلط وانكم كويتيين اصلا
ولأن احصاء 28 و1965 ما خلى احد حتى اللي يوا بالستينات واول السبعينات جنسوهم
==============================

انزين شلون تيمعوا بالكويت؟
الشياب الكويتيين يقولون: كنا نروح البر بالشتا..كشته..ولما كنا نروح فوق شمال الكويت كنا نشوف هالعشيش (بيوت من القش اذا ماني غلطان) وفيهم هالنازحين من الشمال شكثرهم وكنا نقول للي ويانا هذيله بسوون مشاكل بالكويت ومحد كان يصدقنا

نرد للسؤال..شلون تيمعوا؟ من وين طلعوا؟ فقع؟!
وانا اقول صح..مو فقع وهذا الشي يحسب عليهم وعلى حكومتنا وسياستها الدايخه

في قبايل وايد دخلت ناس تحت اسمها عشان يكثر عددهم

وقبل الغزو..الكويتيين والحكومه يدرون ان في خلاف مع العراقيين ويدرون انهم قاعدين يحشدون
ومع ذلك دخلوا عراقيين بالاميات علبونا وفود وهالوفود طال عمركم ماخلت مكان ماراحت
الجيش الشرطه النفط الدوائر الحكوميه
وانا قاري كذا كتاب عراقي بعد الغزو يقول الكويتيين وايد طيبين وسذج! يدرون ان قاعد نحشد واشكالنا عسكريين مو مال وفود نفط وحكومه ومع ذلك ماخلوا مكان ما ودونا ووايد سهلوا مهمتنا

ليش؟
الى اليوم مو في مشاكل بين ايران ودول الخليج؟؟
مو العراق مو مستقر؟
ماقريتوا الاخبار عن حالات التسلل والثغرات الحدوديه؟ هذا اللي درينا عنه وماخفى كان اعظم

لحظه..ماقريتوا بعد عدد التأشيرات العراقيه؟

اقسم بالله..مره دكتور قاعد يعالج مريض..طفل..ووياه امه وابوه..عراقيين اللهجه بس يقولون احنا سويديين وعندهم الجواز! فجأه والا 2 كويتيين بلباس مدني..كلموا الدكتور قالوله احنا مباحث و عندك هذيله اذا خلصت بناخذهم لأن داشين تهريب للكويت
شلون دروا؟ الجواز مافيه ختم خروج من السويد ومافيه ختم من اي مكان غير الكويت والسفاره السويديه تقول مو تبعنا
انزين الثور اللي دخلهم منو؟

انزين هذيله اللي عرفنا عنهم..واللي ماعرفنا؟
واذا قطوا جوازاتهم واوراقهم بالزباله تكرمون وقالوا احنا بدون..شلون؟

احد البدون وصلت معاملته لين التوقيع على الجنسيه خلاص
سبحان الله المسؤول (نحتفظ باسمه) كان شاك فيه
قاله تعالي بعدين
بالليل هالمسؤول قاعد ابيتهم يشوف التلفزيون..برنامج وزنك ذهب
طلع واحد عراقي متسابق وسأله المذيع عن اسمه والا نفس اسم صاحب المعامله بس فرق الاسم الاول!!
ثاني يوم ياله هالاخ من البدون جان يقوله المسؤول شيصيرلك فلان؟
صاحبنا يقولكم تبلعم وانهار واعترف اخ يا حظي!

الزبده: حفظ الأمن والحدود بالديره إلى اليوم خري مري
=========================
إذاً..البدون ماصار عددهم هالكثر وراح يتضاعفون الا لأن الديره والحكومه مسخره وأصلا اهم عاجبهم الوضع نظام باجي الدول العربيه..فرق تسد..وخل يعم الفساد محد بيلتفت صوب الحكومه والحكم وخو ربعنا شطار بدوها بالتجنيس وخلط المجتمع وتقريب ناس وابعاد ناس وانت رايح

وهم مازادوا الا لأن سعر البرميل كل يوم يزيد..ليش سمعتوا عن بدون بالهند؟ سمعتوا عن بدون بالبحرين؟ صج ان يجنسون بس مو لهالدرجه ولو في بدون جان ليلحين يبين عددهم حتى بعد التجنيس
=========================

المشكله شنو؟

البدون الان عندهم اجيال..الجد والابو والولد
الجد قول يدري
الابو يمكن
انزين الولد شذنبه؟؟
الولد لا يدري شالسالفه ولايدري شسووا اهله ولايدري انهم قطوا جناسيهم او اخفوها
كل اللي يعرفه ان انولد على هالارض ومايعرف غيرها ولاغير كلامها ولاناسها
ولايمكن بحال من الاحوال يفكر مجرد تفكير ان "قد" يكون له وطن ثاني
وهو صابر
صابر على الاهانات
صابر على الفقر
صابر واهو يشوف الثروات والنعم توزع يمين ويسار واهو ماعنده ياكل
صابر واهو ابن الشهيد
صابر وغيره ابن الحرامي
صابر واهو ميت على التعليم وغيره عندهم ومهملين
صابر وعنده الموهبه والعزيمه وغيره اييله معاشه بدون ابداع..او حتى دوام
صابر واهو بدون..هويه
شفرقني عنهم يبا؟
==========================
طبعا مانقول اهم ملائكه
ومنهم وايد حراميه وغرقوا الديره بالمخدرات
وطبعا يمكن هالشي من العازه
بس النقطه ان مو كلهم ملائكه وفي منهم قاعدين يضرون الديره
وعلى فكره في وايد ناس اغنى مني ومنك هالشريطيه واللي عند التلفونات يطلعون خير ماشاء الله
==========================

انزين
على النقيض
الكلام عن الدقه في التجنيس
ورفض تجنيس كل من هب ودب مو شغله عيب
نعم مافيها عيب
وغلط اللي يقول الديره مليانه خير وكلهم امية الف جنسهم لعدة اسباب

اولا..السالفه مو حلاو..ولا من تمسكن تمكن -->اللي مضيعتنا ككويتيين طول عمرنا..انت اذا ابوك من سنين كان طيب او ساذج ودخل ناس فقاره بيتكم مو معناته بعد عشرين سنه الابناء يطالبونكم بحصه من الورث علبونا اهم شويه..الورث ورثكم ومافيها عيب او عدم انسانيه
ثانيا المسأله أمنيه..اذا بنجس كل من هب ودب باجر بتصير السالفه سايبه وكل من بيي بكرت زياره ويقط الاوراق الرسميه وتعالوا جنسوني
ثالثا..في الف حل وحل غير التجنيس وشوفوا دول العالم تعطي حق اللجوء السياسي ومعامله انسانيه تفوق اي دوله ومع ذلك ماااا ياخذ الجنسيه يعني السالفه مو اني يا اقطهم بالشوارع وما اعترف فيهم كبشر او اني اجنسهم واسويهم درجه اولى!

رابعا..حتى الدول اللي تجنس..تطلب شروط قد تكون صعبه وتعجيزيه لوايد ناس ويتمون وافدين طول عمرهم

خامسا..اغلب النواب اللي قاعدين يطالبون بالتجنيس قاعدين يسوون هالشي مو من انسانيتهم الزايده ولكن حق الاصوات وهم حق رضى القبيله اللي تبي عيالها يتجنسون حتى لو كانوا عراقيين او غيره الى وقت قريب
=========================

ليش الشرطه؟

أول ماتبدي تشغلهم..تشغلهم بمكان يحفظ القانون واهم خارجين عنه؟
منو بيسمع كلامهم؟
ومنو يضمن انهم مايفرغون اللي فيهم بهالمكان؟
وفوق هذا شوفوا صورهم والتزاحم والفوضى..هل ممكن انهم يطبقون النظام ؟
============================

خلاصة الحجي..

البدون بشر مثلنا ويحن قلبنا عليهم ونتأسف لحالهم ويكسرون الخاطر
ونبي اوضاعهم اتعدل بأقرب وقت
الحلول كثيره..بس ديرتكم ماتبي تحل هالمشاكل
من بين الحلول واللي طرحه الأخ حمد بمدونته ميدان قلمي
ان انييب محكمه دوليه عشان الانصاف ومايصير فيها لعب وتحقق
واللي يستحق يبا جنسوه وانا والله راح اكون اول من يوقف معاهم
واللي قاعدين يخربون على غيرها ويستعبطون هم يشوفون لهم حل
يطلعون جناسيهم الاصليه او يعطونهم جنسيه مالها قيمه غير الحياة والعمل الى ان يثبت نفسه مثلا بعد عشر او عشرين سنه ممكن عياله ياخذون وضع احسن
عشان اللي يطمع يعرف انه مو مستفيد الا لما يفيد الديره ويثبت نفسه
او غيرهم من الحلول
===========================

بدون اي تمسخر او طنازه

بس بالصدفه مريت يم كلية الشرطه يوم تقديم البدون
ياجماعه اطل بالويوه..مو كويتيين..السوداني سوداني والعراقي عراقي والايراني ايراني ابي اشوف واحد اقول اي هذا شكله كويتي ماكو
عاد عقبها شفت الجريده وشفت صورة المقترضين وصورة البدون
سبحان الله ذكرت اعلانات دعم المنتجات الكويتيه على طول

============================

على الهامش:

مو دافعا عن نوريه الصبيح ولاراح اناقش استجوابها
والاستجواب حق دستوري لكل نائب لكن ياجماعه..المفروض الاستجواب يكون للأسباب الصحيحه
يكون للخوف على البلد يكون لأنهم شايفين عيوب وخلل
وبدون زعل من الاخوان البدو
بس اخر جم سنه كل الاستجوابات او التهديد بالاستجواب من النواب البدو بس للوزراء الحضر
وهم ما ادافع عنهم لكن هل الوزراء البدو ملائكه؟
بتقولولي مو بس النواب البدو حتى الحضر قاعدين يستجوبون الحضر اقولكم اي مو هذا اللي نبيه..ليش النواب البدو مايستجوبون البدو؟
وسامحونا على الاطاله والقصور

28 comments:

Mohammad Al-Yousifi said...

لا يجنسونهم بس عالأقل يعاملونهم كبشر

سدرة العشـــاق said...

تسلم ايديك و يسلم راسك و يسلم عمرك كله .... طلعت اللي بقلبي عسى الله يريح قلبك دنيا و آخره بسالفة البدون

و يا ريت الناس تفهم اللي نقصده و مثل ما قلت هالمسألة تحتاج القلب و العقــــــل

و الله يعطيك العافية و بيض الله ويهك

:)

الزين said...

انا مع كله مطقوق

عاملوهم كبشر

وعجبنى طرحك للموضوع

وايد منطقى وصح

بعيد عن التحيز

يعطيك العافية

ButterFlier said...

مطقوق صح

بو حامد said...

للأسف ان كلامك صحيح القبلية والعنصرية تنهش بأجسادنا احيانا دون ان نشعر واحيانا نتعمد بها ، اذا كان بيت الشعب وهو المجلس مازال يفرق في الاستجوابات بين البدو والحضر فماذا تتوقع من العامه ؟

---

البدون فعلا ما طرحه الاخوان كله مطقوق وحمد حل طيب

محكمه دوليه

يا اخي محكمه كويتيه راضين

وكذلك يجب معاملتهم كبشر

العرزالــــــه said...

ملاحظه لكل الاخوان

مو بس انتوا مع مطقوق

انا بعد وياه وكاتب هالشي بالموضوع

ياتجنسونهم ياتعطونهم جنسيه بدون امتيازات كامله وعمل وطبعا معاه راتب لين يثبت الواحد نفسه عقب عشر او عشرين سنه

عشان اللي يطمع يفكر اكثر من مره

حلم جميل بوطن أفضل said...

قضية البدون قضية إنسانية في المقام الأول و الأخير و ليست قانونية. جربت الحكومة جميع الحلول القانونية و لم تنجح

دعني أسألك .. لو عندنا مجرم و خائن و يستحق الإعدام. هل يجوز ان نمنعه من الزواج؟ فكيف نمنع البجون من ذلك

الحل بيد الحكومة متى أرادت و أصدقت النية. تجنيس من يستحق و تحتاجه الدولة من أصحاب الشهادات

إعطاء إقامة دائمة أو شراء جوازات للباقين

في دولة لا توجد فيها ضرائب و تمنح العطايا يمنة و يساراً الأكيد سيطمع ابلجنسية لذا نقول حان وقت الضرائب حتى يخشى من هم على شاكلة البدون بالطمع من الجنسية الكويتية

لكن أعيد و أذكر .. المسألة إنسانية في المقام الأول .. هؤلاء بشر قبل كل شئ .. المسألة إنسانية .. مثلما قال مطقوق .. عاملوهم كبشر

الحكومة لن تقبل بتدويل القضية لأن هذا التدخل الخارجي سيفرض عليها من يجب عليها تجنيسه. الحكومة تريد أن تبقى خيوط القضية في يديها و تخشى من العوامل الخارجية

Q80 Blogger said...

انت حطت امثله لناس موجودين .. ما اقولك مو موجودين
في وايد منهم حتى كويتي مايعرفون يسولفون

بس تدري متى تغيرت نظرتي عن البدون

لما سافرت كندا

واختلط مع وايد بدون مسافرين ياخذون الجنسية الكنديه

تره في وايد منهم .. من عوايل مشهوره بالكويت .. وصج صج ماتفرق بينهم
اصلا عندي مشكله .. كل ما تعرفنا على كويتي يدرس على حسابه بكندا .. نعاني لأنه ماندري الريال بدون ولا كويتي
ماتصيدهم كلش
كويتيين بالشكل بالعيشه بالاهل

صدقني اعرف ناس اهلهم كلهم كويتيين .. ما عدا اهما

عرفت 3 .. تجنسوا بآخر التجنيسات
آخرها واحد تجنس السنه الي طافت

صراحه استانست لهم .. لأنهم صج يستحقون الجنسيه

أولا لأني قبل لا اعرفهم أعلام الكويت امعلقه على سياييرهم وعلى بيوتهم .. والله مايحبون غير الكويت ولا يعرفون غيرها
ويقولون انجبرنا وسافرنا عنها

لا واهما مهندسين ودكاتره

ولا يدرون ليش ماعندهم جنسيه .. انولدو مثل ما قلت جذي

صدقني شي غريب

طبعا في غيرهم .. شايفهم بكندا وايد .. كلام مايعرفون يتكلمون .. ويقولون احنا كويتيين

السالفه بنظري وايد معقده

لكن أأكدلك .. صدقني في وايد وايد بدون غير عن الي نسمع عنهم .. انهم متسللين وجذي

لي يومك هذا .. اعرف ثلاثه كل اسبوع يلعبون معانه كره
ماعندهم بعثات .. والكل شاك مايدري هذيل كويتيين ولا لأ
ولا راح انعرف .. وايد يقولون هذيل بدون
بس والله على اسلوبهم واشكالهم واسامي عوايلهم .. ماتصيدهم كلش

أتحدى أقوى كويتي .. الي حاس انه خبره .. اييلي اهني .. واراوي اشكال .. وابي يحددلي هذيل بدون ولا كويتيين

بالنسبه لي
ماني شايف اي حلول للأسف

لأنه حرام ترك هل بشر بدون اي حلول بالديره

وهم مايصير تجنيس اي واحد .. لأنه باجر كل الوافدين بيخشون جناسيهم ويقولون احنا بدون

السالفه وايد معقده

شكرا على الموضوع
آسف على الإطالة

Salah said...

الناس اللي شفتهم في الصورة هذي اكسروا خاطري

لكنهم لوعوا جبد البعض

اهني المشكلة

وين الانسانية

حتى ما كو تعاطف؟

مرات أشوف متشرد نايم في شوارع لندن

أول شي أفكر فيه: أقول حرام انسان يعيش بالصورة هذي

مع ان هذا المتشرد اهو اللي يايبه حق نفسه

اهو اللي أدمن على الخمور والمخدرات

بس أقول حرام مالازم يظل جذيه

محد قال جنسوا غير المستحق

لكن عاملوا البقية بطريقة انسانية

مشكلة البدون أو المتواجدين بصورة غير شرعية موجودة في كل دول العالم لكن أوضاعهم هي الأسوأ في الكويت


أدري ان دمي صاير ثقيل عليك
بس تحملني
أمون
;-)

Unknown said...

كلامك ذهب
واختصار مطقوق صحيح

تبيهم يبتعدون عن الجرايم؟
مو بس بالتجنيس

الثقافة يا عرزالة
صدقنيى البني ادم لما يتعلم ويتثقف يبتعد عن المشاكل وتقل اخطاءه

ولكن هذيل مثل ما قلت لا علم
ولا حياة شلون ما تبي يطلع منهم كل هالسلبيات؟
اما ملوت الشرطة فالشرط ان امه تكون كويتية وهذيل حالتهم استثانئية

تظل القضية انسانية اكثر من سياسية
اذا ما يبون يصلحون اوضاعهم
الامارات طلبتهم
وقطر طلبتهم
ولكن ليش ما رضت الكويت ؟

العرزالــــــه said...

شكرا لكل اللي علق واللي ماعلق

والحمدلله ان احنا متفقين على الاساسيات

انا كان القصد من الموضوع ان نتناقش نقاش هادي بدون الدخول بالنيات لأن اغلب النقاشات بهالموضوع تكون حاده وفيها طعن بالنيات

فالحمدلله ان طلعنا متفاهمين وعندنا نفس التصور مع بعض الاختلافات البسيطه وغير الجوهريه

مطقوق
الله يهداك انا تعبت وانا اكتب واخر شي انت اللي كليت الجو :)

سدره
حياج الله باي وقت وزين ان متفقين لهالدرجه :)

زوزوتا
حياج الله يالطيبه واحنا حاضرين :)

بتر
وانت صح :)

بوحامد
الحكومه والشسمه اهم اللي يبون هالشغله :)

حلم جميل
بس المشكله ان بالنهايه غصب عليهم راح يصير تدويل للمشكله ماشفتوا قناة المستقله والبدون اللي يطلعون

بلوقر
وانا اعرف بدون وناس حديثي التجنيس وهم بكندا
وانا معاك ومثل ماقلت لك ماتفرق بينهم واهم مظلومين اللي بجيلنا
:)

صلاح
مهما تباينت اراءنا شويه تبقى اخ عزيز وغالي ومايكمل الموضوع من غير تعليقك القيم
:)

العرزالــــــه said...

مشاري
انت مو معقول!!!!!
هذا سادس مادري عاشر موضوع اعلق فيه بنفس اللحظه اللي تعلق فيها اشوف تعليقي والا انت وراي على طول
حبيبي انت :))

بس انا عندي سؤال لك ولجم واحد ذكروا نفس نقطتك

متى طلبتهم دول الخليج؟

bo9ali7 said...

بصراحة اللي يتوقع ان مئات من المراهقين بنظمون نفسهم بنفسهم ما يشوف شر

يبا الشرهة على وزارة الداخلية اللي مو قادرة لا تنظم الديرة ولا قادرة تنظم نفسها

الشغلة الثانية
ترى هذيل ابناء كويتيات

يعني على حسبتكم نص ولاء حق الكويت مضمون

اخر شي
اللي يعتقد ان جلب شرطة اسيوية احسن من ابناء الكويتيات هم ما يشوف شر
على الاقل هذيل مواليد الكويت و مالهم ذنب ان ابهاتهم "قطوا جناسيهم" وماتوا

شقران said...

أخي العزيز العرزاله

تحية طيبة

حقيقة الموضوع مهم ومعقد وتشعباته كثيرة وشواهُده حية أمام الناظرين وسأحاول أن ادلي بدلوي علّ أن اضيف جديد عليك وعلى الأخوه أصحاب الردود أعلاه وسأحاول أن اختصر قدر الامكان

بداية اتفق بالمجمل مع ماطرحته
أنت والأخوة كله مطقوق وحلم جميل بوطن اجمل وكويتي بلوقر والعزيز صالح

بالنسبة للفقرة الأولى لموضوعك

فشخصيّا أعرف بدون من قبيلة معروفة جدا وهو من اهل البادية (بادية الكويت اقصد) ولم يتقدم للجنسية لنفسه إلآ بعد سنوات من صدور قانون الجنسية ولكن عرضت عليه الجنسية في المادة الثانية فرفضها وقال أنا ابن هذه الأرض تعطوني الثانية وفلان وعلان اللي دخلوا الكويت البارح تعطونهم الأولى وطبعا الشخص أصبح جد وأهو للحين بدون؟؟؟
طبعا راح تقول أين والده...والده متوفي منذ اربعينيّات القرن الماضي وأنت تعلم أن أغلب البدو في تلك الحقبه الى فترة الستينات كانت علاقتهم مع المدينة قليلة جدا فمنهم من شارك في الغوص (وهم قليلون جدا)أو للتطبيب لبعض للحالات المستعصية في المستشفى الامريكاني أو للنزول الى ساحة الصفاة كل ستة شهور على الأقل للبيع والشراء..كما لم يكونوا كلهم ينزلون للمدينة وإنما ينزل شخصين او ثلاثة لقضاء الحاجيّات ومن ثم الرجوع الى البادية وسأروي لك هنا حادثة مضخكة حصلت لإبن عم والدي وهو حي يرزق..يقول:أخذنا السمن وبعض الصوف ووبر الإبل لنبيعه في السوق واشترينا بثمنه بعض الحاجيّات اللي موصينا فيها ربعنا لكن تأخر الوقت فذهبنا الى بر الشامية (قبل أن تصبح منطقة طبعا) ونزلنا.. فيقول احسسنا بالبرد فرأينا مجموعه من الأخشاب فأخذنا بعضها وشبينا النار وسوينا عشا خفيف وشاي...ونمنا..وماقعدنا إلآ الحرس حوالينا وربطونا وودونا قصر نايف ومادرينا إلآ داش علينا عبدالله الأحمد(رحمه الله) فقال لنا تسرقون الخشب؟؟
قلنا اي خشب..أحنا شبينا نار ولاسرقنا خشب؟؟
قال الخشب الي شبيتوا ناركم فيه كان خاص بأعمال بيوت أو احد التجار مايذكر بالضبط ..المهم يقول قوم يا عبدالله الأحمد والحرس ولسبونا بهالخيازرين على رجولنا لين ماقمنا نشوف نجوم القايلة :)

نرجع للموضوع

بالنسبة للفقرة الثانية (اشلون تيمعوا

اتمنى لو تطلع على تقرير لجنة تقصي الحقائق الكويتية حول الغزو العراقي واللي شكلها مجلس الأمة92

وراح تعرف إن المشكلة لم تكن مشكلة وفود فقط؟؟؟

أما عن أمن الحدود...فكيف تريد لأمن الحدود أن ينصلح وقد كان وزير الداخلية والدفاع آنذاك لا يعلم شيئا عن مسؤوليّاته؟؟؟

الفقرة الثالثة والمعنونة بالمشكلة شنو..اتفق معاك كليّا

أما فقرة ليش الشرطة
فهذي بروحها راح افردلها موضوع في مدونتي (كثرة المواضيع اللي وعدت فيها..الله يعينا ونوفي) لأن القضية ليست قبول البدون وإنما القضية لماذا طفشّ ابناء البلد من هذه الوزارة المهمة جدا والمسؤولة عن امننا بشكل مباشر؟؟؟

أما قضية الصور اللي وضعتها
فلاتعليق

ناتي الى الخاتمة واللتي كانت بعنوان على الهامش

اخي العزيز اتفق معك بتساؤلك ولكن عندي تفاصيل سأطرحها

أولا..أنا اتفق معك في تساؤلك وأيده في ان بعض الوزراء عندهم حصانه والسبب التداخل القبلي والمصالح الانتخابية الضيقة


ثانيا..لافرق عندي بين الكويتيين جميعا فجميعنا متساوون لإنها مبادئ لا اتجاوزها ولا اجزّؤها حسب هواي

وتعليقو هو

المشكلة أن الطبقة السياسية(بجميع اطيافها) اصبحت متطرفة في مصالحها الى درجة انها تجاوزت مبادئها والشواهد كثيرة ولكن سأطرح لك مثال واحد.. صحيح أن هناك غض طرف من قبل النواب البدو على تجاوزات الوزراء البدو(حسبي الله عليك يالعرزالة لا احب هذه التقسيمات ولكنك تجبرنا على ذلك) ولكن هناك ايضا غض طرف حسب تداخل العلاقات العائلية مثل عملية تدوير الحميضي واللتي كانت محاولة للالتفات على اهم اداة رقابية (لاتقل لي هناك سابقة سعود الناصر..سأقول لك هناك فرق كبير بين الأمرين) فبعض النواب ممن يصفون انفسهم بحماة الدستور لم ينبسوا ببنت شفه حين حصل الامر الى أن تم الحديث عن استقالة الحميضي فبدؤا يتكلمون

اذا فالعملية أكبر من استجواب بدوي الى بدوي كما قلت ولكنها أزمة طبقة سياسية(قبلية مذهبية عائلية) متعصبة الى حد تجاوز المبادئ..ثم نرجع ونتساءل كيف وصلت الامور الى هذا الحد..من الذي أوصل الطبقة السياسية الى هذا المستوى من التفكير السطحي..واعتقد انك تعلم الاجابة


وآسف جدا على الاطالة ولكن الموضوع مهم

ولك مني خالص التحية القلبية

أخوك المحـــــب/

شــقـــــران

العرزالــــــه said...

بوصالح

مانقول ينظمون نفسهم بس على الاقل مايصير التدافع بهالشكل بتقولي يبون رزقهم اقولك ميخالف اتفق وياك واعذرهم بعض الشيء لكن الملاحظه هني لأنهم باجر اهم اللي بينظمون النظام

نقطه حلوه

بعدين انا ما حسبت الولاء بشي وبالعكس قلت ان نص الكويتيين مايستحقون الجنسيه والعكس صحيح وقلت ان البدون لايرى غير الكويت بلد يفديها بروحه وحتى ماحددت اذا امه كويتيه والا لا

وبالتالي انا بالعكس اثق بولاء بعضهم وماعندي (حسبه)

:)

اخر شي بالعكس من قال انييب شرطه اسيويه؟ مستحيل نرضى بهالشي

العرزالــــــه said...

شقران

اتفق مع كل ماقلته جملة وتفصيلا مايحتاج حتى اعقب او اناقش

بس شغله وحده..نعم بعض النواب الحضر ايضا لديهم عنصريه وعلى قولتك الديره صارت جذي من تصير قضيه يحس فيها طرف ان الطرف الثاني واقف بهالجانب على طول يقف الجانب الاخر ويقعد ينظر له

متى نحس ان كلنا كويتيين ومايجمعنا الا الكويت؟ الله اعلم

بس تدري؟ على ان احنا مدونين فقط لاغير لكنك نموذج ماراح انساه

انا ماتوقعت ان في بدوي ممكن ماتاخذه العصبيه بهالمسائل لأن مع احترامي كل اللي ناقشتهم عندهم تعصب ولو طفيف

فالحمدلله ان الاجيال الصاعده من كل العروق والمذاهب لديها من الابناء العاقلين وان شاء الله احنا اللي بنرد الكويت الى سابق عهدها واحسن حينما كانت الكويت اولا واخرا

تحياتي :))

شقران said...

العزيز العرزالة
مساء الخير
نسأل الله أن يقدرك ويقدرني وبقية المدونين لما فيه صالح الكويت وأهلها

أما بخصوص التعصب..فصدقني العالم كله يتجه للتطرف..انظر لحال الدول من حولنا..من يقود الولايات المتحدة...من فاز بانتخابات الرئاسة في فرنسا...من يقود طهران..من الذي انتصر بالنتخابات التشريعية في المانيا وبقية دول اوربا..من يحرك باكستان..من الذي يعبث في لبنان...أليس جميعهم إن لم يكن كلهم من اليمين المتطرف والمتعصب للأعراق أو الدين؟؟؟

عزيزي العرزالة إنها ازمة دولية واقليمية وليست محلية فقط



اللهم احفظ الكويت واهلها

أخوك المحـــــب/

شــقـــــران

Carlos said...

السلام عليكم
أتمنى ان تتقبل نقدي لمقالتك بسعة صدر
بعد ان اطلعت على مقالك تبين لي مع الاسف انك لا تعلم الكثيير عن قضية البدون ولا عن تاريخ و معالم و قانون و تراث الكويت
انت قلت " الشياب الكويتيين يقولون: كنا نروح البر بالشتا..كشته..ولما كنا نروح فوق شمال الكويت كنا نشوف هالعشيش (بيوت من القش اذا ماني غلطان) وفيهم هالنازحين من الشمال شكثرهم وكنا نقول للي ويانا هذيله بسوون مشاكل بالكويت ومحد كان يصدقنا
"
اخي اولا ماكان اكو اي عشة او عشيش في بر شمال الكويت العشيش كانت موجودة في مناطق الشدادية و صيهد العوازم و الوفرة فقط وروح شوف مواقع هالمناطق وين عن بر شمال الكويت ارجو انك تتأكد عن اصل هذوله الشياب وان كانو فعلا متواجدين في ذاك الزمن في بر الكويت ام الاهواز؟؟
ثاني شيئ انت ما تعرف العشة ولا شلون مبنية انت تخيلتها و خيالك خانك او وداك افريقيا اخي الكويت بيئة صحراوية مو ادغال و احراش قولي وين اكو قش بالكويت

وسامحونا

Carlos said...

عفوا نسيت معلومة مهمة ان غالبية سكان العشيش هم العوائل الكويتية البدوية وان اماكن سكن البدون فكانو يستأجرون الملاحق والبيوت الايلة للسقوط في الحساوي وخيطان والمنطقة العاشرة لان غالبيتهم اتو الكويت على اخر ايام العشيش ما لحقو على العز

" تأخرو "

العرزالــــــه said...

اخوي كارلوس

اشكرك على مرورك ونقدك "الساخر" مع الاحتفاظ بحق الرد بنفس الاسلوب

انا ماقلت ان اللي كتبته حقائق وانما معلومات شبه اكيده

وبما ان مافي مصادر واللي موجوده مو ثقه حتى الان من اللي شفته فماعندي غير الشياب اللي اثق فيهم لأنهم مصدر تأريخ حي للي صار بالكويت

فاهي وحده من الثنتين يا اتييب مصادر موثوقه تدعم كلامك والا كل واحد له رايه اللي نحترمه

تحياتي :)

شقران said...

أخي العزيز كارلوس

يبدوا أن معلوماتك عن البدون لا تتعدى مايطرح في الدواوين

أما معلوماتك عن العشيش تنقصها الدقة

فالعشيش كان موجودا في مناطق عديدة من الكويت (شمال وسط جنوب) وتركز أغلبها في منطقتين هما صيهد العوازم والشدادية واللتي
كان يسكنها والدي في منتصف الخمسينات وتحديدا الفترة من 1956 الى 1959
وكان العشيش كذلك في منطقة الوفرة وكان هناك عشيش شمال الجهراء والقريب من بر المطلاع ، اذا فمعلومة أخونا العرزالة صحيحة

لكنك رجعت ونفيت وجود العشيش عندما تهكمت وقلت أننا في الكويت وليس في افريقيا حتى يكون عندنا قـش ، وهذا تناقض غريب؟؟

أخي العزيز
مصطلح العشيش كان يطلق اصطلاحا للبيوت المتراصة واللتي كانت للعيش فيها بعد أن ترك جزء من أهل البادية الرعي واتجهوا للوظائف واللتي كان اغلبها في الشرطة والجيش وبعض الدوائر الحكومية،وقد كانت مادتها الاساسية عباره عن صفائح (الشينكو) ذو اللون الرصاصي وليس من القش كما تفضلت وتهكمت

مع خالص التحية

Carlos said...

والله أنتو أبخص و يعطيكم الف عافية

هذيان said...

أخي العرزالة
الجنسية الكويتية لمن تعطى أما للكويتي المستحق لهاعن طريق والده . أو لفئة البدون من هي فئة البدون نحن في الكويت مجتمع صغير فجميع الكويتيين يعرفون بعض . أذا فئة البدون فئة غير كويتية. لماذا تزايدة هذة الفئة وأصرت على الأستمرار في هذا الوضع لأنها شاهدت فئة منها جنست فهي تتستمر على أمل أنه ممكن أن تأخذ الجنسية حتى لو كانت دون حق فهم على ثقة أن لا يوجد لدينا قانون لا ينهك ويستثنى حتى لو كانوا حملت قيد أمني نعم قيد أمني والواسطة فوق القانون ألا تعلم أن لكل نائب 5 أسماء في كشوف التجنيس . لكل تخيل أنه لو قيل أننا سوف نجنس البدون حتى تحل القضية لكن دون أمتيازات قرض الأسكان و الراتب التقاعدي وهذة الأمور لقالوا لك موافقين وبعد أخذها رأيت مظاهرة تخرج من شمال تطالب بالمساواة وتتدخل الأمم المتحدة والأعلام الخارجي ...وربعنا أبد ما يخافون من أعلام خارجي ويعطونهم اللي يبونه... يا عمي أتركها على الله

Unknown said...

حبيبى العرزالة
ارجع حق ارشيف الصحافة في بداية ومنتصف التسعينيات
عندما اشتدت القضية
اذكر جيدا ما تناقل بأن قطر والامارات

واعتقد ان قطر استبدلت فيهم السوادنيين والافارقة

لزيادة التركيبة السكانية

في أكثر من حل ويمكن الاتيان بهم وفصل الكلمة أما ان الرحيل اليوم وغير اليوم لا يوجد
العديد منهم يريد الذهاب لكندا او اى دولة كانت ويملك المادة ولكن لا يوجد لهم منفذ للخروج

تحياتى لك
والقلوب شواهد :)

Unknown said...

السلام عليكم ورحمة الله وبركاته
أنا صار معاي موقف ووحبيت أنقله لكم قبل لا أبدي رأيي بالموضوع
الموقف إللي صارلي في دوامي القديم بأحد الشركات الإستثمارية بالكويت
كان عندنا بالشركة مندوب سوري وفي بطاقته المدنية مدون فيها الجنسية سوري
بس اللبس واللهجة كويتية ولا يمكن تقول عنه سوري
سألته في يوم من الأيام عن السر في المظهر الكويتي
فرد علي وقالي أنا من مواليد عشيش الدوحة بالكويت
وعمي بدون!!!
أستغربت من جوابه وسألته: شلون أنت سوري وعمك بدون
قالي إحنا بالأساس كنا عايشين بالكويت على ان إحنا بدون وعمي دخل الكويت أثناء حرب التحرير سنة 1991 مع قوات التحالف
بس ما كرموه وما عطوه الجنسية وبدأوا يعاملونه معاملة سيئة للغاية
فقرر أنه يرجع سوريا وقمنا إحنا بالكشف عن جوازاتنا للإحتفاظ بواظائفنا بالكويت لأنه لقينا أن لو ظلينا بدون فراح نعاني لمدة غير معلومة ويتم إضطهادنا
وعلى هالأساس بنيت رأيي وهو
لو يتم حل المشكلة بمنح الإقامة الدائمة لفئة البدون بالكويت دون تجنيسهم على أن تسحب جميع الإمتيازات التي يتمتع فيها البدون بالسابق
ويتم فرض ضريبة دخل على جميع الحاصلين على الإقامة الدائمة مقابل إمتياز معين وهو عدم الحاجة لوجود كفيل على أن تكون الدولة هي الكفيل لجميع الحاصلين على الإقامة الدائمة مقابل ضريبة الدخل والتي تغطي جميع المصاريف والتكاليف التي من الممكن أن تتحملها الدولة مقابل إصدارها للإقامة الدائمة
في هذه الحالة لن يتقدم إلى طلب الإقامة الدائمة إلا من له القدرة على تقديم خدمات أو إنتاجية لدولة الكويت
من وظائف حكومية أو بالقطاع الخاص أو إقامة المشاريع الخاصة والتي تعتبر قيمة مضافة للدولة
وفي هذه الحالة نكون قدمنا حل لا يكلف الدولة أي شي بل بالعكس يوفر مصدر دخل إضافي للدولة ونقضي على المقيمين في دولة الكويت بصورة غير قانونية

Ahmed al fadli said...

انا من مواليد الكويت وعندي احصاء 65 شو ماتجمستيجي الإيراني يأخذ الجنسيه من السيف يستلمها وانا الحين بسويسرا صار لي15 سنه انتم احسن من سويسرا بس انتم ناس انانيين وحاقدين وراح تدمرون الكويت في حقدكم أنا أعرف عراقيين وايرانيين استلم الجنسيه الكويتيه ماعمددندهم احصاء 1980 ماعندهم

Ahmed al fadli said...

مواليد الكويت وعندي احصاء 65 شو ماتجنست تيجي الإيراني يأخذ الجنسيه من السيف يستلمها وانا الحين بسويسرا صار لي15 سنه انتم احسن من سويسرا بس انتم ناس انانيين وحاقدين وراح تدمرون الكويت في حقدكم أنا أعرف عراقيين وايرانيين استلم الجنسيه الكويتيه ماعمددندهم احصاء 1980 ماعندهم

Ahmed al fadli said...

انا من مواليد الكويت وعندي احصاء 65 شو ماتجمستيجي الإيراني يأخذ الجنسيه من السيف يستلمها وانا الحين بسويسرا صار لي15 سنه انتم احسن من سويسرا بس انتم ناس انانيين وحاقدين وراح تدمرون الكويت في حقدكم أنا أعرف عراقيين وايرانيين استلم الجنسيه الكويتيه ماعمددندهم احصاء 1980 ماعندهم