Friday, February 1, 2008

الهويات القاتله

انا ويا واحد من ربعي بكافيتيريا الدوام..قاعدين بطاولتنا شحلونا..قمت بحط لي أكل من البوفيه..أحد الأنواع كان فطاير وبيتزا..واكو بيتزا مطرّفه على جنب..قمت وخذيتها بايدي
ماوعيت الا هندي من وراي يمسك القفشه العوده او الملقط مال الفطاير او الاكل ويطق فيه على الحديد معصب ويزفني يقولي مايصير جذي تمسك الاكل وتوصخه بايديك
طبعا انا اول شي مافهمت وحسبته قاعد يحذرني ان الاكل وصخ كوني ماخذيت الا اللي بالطرف اللي طالعه من الحافظه الحراريه ومالمست شي..ييت بشكره وانا مستغرب من عصبيته بس لما كمل هني انا استوعبت وطلعت له بانو
هني قلبت 180 درجه عصبت عصبت
تم يراددني! انا ماتحملت وبقدرة قادر قلبت الرجل الاخضر وصراخي وصل كركوك
طبعا اهو لما شافني وصلت مرحلة هتك عرض طنها شوي وسكت
==============================
قعدت متنرفز ومتضايق من نفسي وباقي الموظفين يقولولي ماعليه انت الكبير اصلا هذا مو صاحي وكلنا متهاوشين معاه مثلك
ودار بيني وبين رفيجي الحوار التالي:
انا: ياخي ماحب جذي..انا مو نوعي جذي ولا احب اغلط على احد او اصرخ..بس اهو الله يهداه شنو مو صاحي؟
رفيجي: عادي يبا كبر راسك
انا: تصدق..لوما انه اكبر مني بالسن ومتغرب ومابي احس اني ظلمته جان قتلته..شفته شلون موصاحي ويزفني واهو يطق بالملقط على الحديده؟
رفيجي: اي شفته موصاحي حتى انا ذاك اليوم سوالي شي جذي وزفيته
==============================
بعد فتره وبعد ماهدّيت شوي..رديت اسولف لرفيجي
انا: سمعت عن كتاب اسمه الهويات القاتله؟
رفيجي: لا والله شنو هذا
انا: كتاب مألفه واحد لبناني..انا ماقريته بس اللي اعرفه ان يدور حول هوياتنا وشلون تأثر بحياتنا
رفيجي: شلون يعني؟
انا: يعني مثلا..انا اشترك معاك بالمذهب بس اختلف معاك بالعرق..ورفيجنا فلان يختلف معاك بالمذهب بس يشترك معاك بالعرق
رفيجي: انزين؟ (وليلحين موفاهم شعلاقة كلامي باللي صار وشأبي أوصله)ز
انا:احنا ساعات نستميت بالدفاع عن أصلنا ومذهبنا..بس هل في يوم من الأيام سألنا نفسنا ليش نسوي هالشي؟في ناس متأكده ان اصلها او مذهبها احسن شي..انزين..والباجي؟
رفيجي: مادري!
انا: اوضح لك بصورة ثانيه..تعتقد لو اللي مساع كويتي..جان ردة فعلي كانت نفسها؟
رفيجي يبتسم ومستانس على اللي اقوله
انا: انا اعتقد ان ردة فعلي مساع..واللي الناس تسويه بالدفاع المستميت عن أصلها ومعتقداتها ماهو الا محاولة للحفاظ على احترام النفس وتقديرها..الناس ماتقبل ان الواحد يشكك لوبكلمه فيها وباللي تمثله..والواحد مايرضى يفكر حتى باحتمالية ان في شي غلط بدينه او مذهبه او معتقده او اهله تدري ليش؟
رفيجي: ليش؟
انا: لأن أي محاولة من هالنوع بتخليه يفكر ان اهله فيهم غلط وبالتالي جذوره فيها غلط وبالتالي اهو كإنسان غلط ولاقيمة للحياة آنذاك
رفيجي: ممكن
انا: يعني بتقنعني ان كل واحد قاعد يدافع عن مذهبه ومعتقداته واصله عارف اهو شقاعد يتكلم عنه وعارف يحط المعايير الصحيحه للمقارنه بين مايمثله هو وبين مايمثله الاخرين؟اغلبنا يصكون اذانيهم ولايبون يقرون ولاحتى يسمعون اي شي يخالف اللي يمثلونه وتلقاهم ينتقدون اللي يخالفهم ويشرشحونه..فقط لأنه اقترب من التشكيك او التساؤل حول مايمثلونه هالناس
رفيجي: والله هم ممكن
انا:ازيدك من الشعر بيت
حتى الدراسه اللي ندرسها..والشغل اللي نشتغله..ينطبق عليهم نفس الكلام! وايد ناس مايدرون او مايعرفون يقنعون غيرهم ليش دراستهم وشغلهم احسن..هذا اذا اهم نفسهم مقتنعين..ومع ذلك متمسكين بهالفكره وان اهم احسن شي!
ازيدك بيت ثاني من الشعر
رفيجي: قول
انا: تذكر صاحبنا فلان؟ اللي راسب بالدراسه وليلحين قاعد يحاول يتخرج؟ تذكر شلون يتكلم عن حلم الدراسه بذيج الدوله اللي اصلا ماتقبل احد بهالتخصص؟ فمابالك واهو راسب؟ تذكر شلون يسولف انهم يبونه وناطرينه يتخرج؟
رفيجي: اي ضحكني يحليله..الله يعطيه اللي اباله ماتدري..بس اهو حساس من هالموضوع
انا: اي ماقلنا شي الله يوفقه بس انت وانا ندري ان من سابع المستحيلات يقبلونه لأنه راسب ومعدله نازل وبعيدن القوانين ماتسمح انه يروح..تدري ليش اهو حساس من هالموضوع؟ لأن الموضوع الوحيد اللي يعوض النقص اللي فيه ويحسسه انه متساوي مع باقي الناس ومع ربعه المتفوقين واللي سبقوه بالدراسه والوظايف..الموضوع الوحيد اللي يرد له احترام الذات وقيمة الحياة بالنسبه له
رفيجي: اي انا لاحظت جذي
انا: وترى غاية غالبية الناس ان يحسون انهم مو اقل من غيرهم ولذلك يحاولون يتمسكون بأي حلم لوصغير ولو مستحيل ويعيشونه ليل نهار ويصدقونه بس عشان يحسون انهم من ساير البشر ومافيهم نقص..وهذيله بيني وبينك انا ما احب اتحرش فيهم او اشكك بأحلامهم وأقول ماتصير
رفيجي: ليش؟ عادي نسولف احنا
انا: انت تقول جذي..بس انا اشوف ان حرام اقطع اخر حبل اهو متمسك فيه يحسسه بقيمته
رفيجي: بس لازم نقولهم عن اخطائهم!
انا: ما اختلف وياك..بس اذا السالفه ماراح توصلنا لنتيجه..انا افضل نتغاضى عنها ونمشي وياهم كأنا مصدقين..هني نريحهم ونونسهم
رفيجي: والله انت عليك افكار مادري شلون بس هم صح مساكين والله
================
وانتهى الحوار بنظرات لذلك الهندي البياع وكل مافيني يقولي : آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآبيه
================
تم بحمد الله بغرة هلا فبراير من عام 2008
أقلد حلم جميل و فهد العسكر

32 comments:

على نفسها جنت براقش said...

حبيت اسبق بلوقر كويتى

و احل المركز الاول

على نفسها جنت براقش said...
This comment has been removed by the author.
على نفسها جنت براقش said...

q8o_blogger

:P


2

على نفسها جنت براقش said...

عرزالة انا لو مكانك
ابرد جبدى و ازفة

و لا انقهر
:)

Anonymous said...

با با انت يسوي غلط و يمسك بيزا بإيد ما انت هذا تخلف انت ما يعرف اتكيت ما كويتي...ليش كله هندي ما في مخ كويتي الحين ما في مخ ..معلوم

اخوي انت اللى غلطان و تبي تزف الريال طبعاً في اي مكان عام يجب التقيد بالأعراف العالمية يعني لو كنت في بوسطن او اوكلند او في ريسبشن راح تمد ايدك و تلمس اي نوع من الطعام بدون ملقط ...طبعاً بخلاف الأصناف التي يمكنك اخدها بيدك
بغض النظر عن حبة البيتزا سبب الخلاف اللى كانت متطرفة

آسف للأطاله و لكن هذا الشيء ضروري حتي نصبح مركز مالي و تجاري و خدماتي عالمي سنة 2050

تحياتي

بو محمد said...
This comment has been removed by the author.
بو محمد said...

أخي العرزالة
عندي تعليق على بعض النقاط إن امكن
1- صحيح أن البتزل أو الفطيرة كانت الأخيرة و انت الذي سيأكلها لكن ذالك لا يعني أن النقطة التي أثارها الأخ الهندي غلط، قد يكون أسلوبه أو الطريقة التي طلب منك استخدام المنقاش فيها غلط و لكن هذا لا يغلطه، الذي حدث معاك يحدث مع الكثير من الكويتيين للأسف و هو عدم التدقيق في جوهر الفكرة و التأثر سلبا أو إيجابا بالكلام الذي يقال كون المصدر محل تقدير أو تسفيه، و الدليل ما ذكرت أخي الفاضل من تعليقات الأخوة زملائك و مع جل احترامي و تقديري لشخصك الغالي و زملائك الكرام لو حدث لهم هذا الموقف من شخص أوروبي والا أمريكي تهقى بينطقون بحرف؟؟؟؟ و الحمد لله أكثر الكويتيين وصلوا أمريكا و أوروبا و شافوا اشلون لي صار الحال ماكو كيري ميري و خشمك إذنك و العم بو فلان و طال عمرك و آنه ولد فلان اشلون العالم يمشون صح، أنصحك يا أخي العزيز أن تتريث في كل مواقفك و لا تنظر للأشخاص بنظرة تنقيص كما هو الحال عند الأغلبية فالحق يأتي من الرجل و لا تختزل صفات الحق ملامح الرجل لا عرقيته وطيب الفعايل مو بالجنسية أو السنخية لا يا خوي، هذا طبع، و عندي لك قصة:
طال عمرك و عسى الله يحفظك مره كانت عندي معاملة تجديد دفتر سيارتي في أحد مراكز خدمة المواطن و يوم وصل دوري قالت لي الإخت الموظفة إن علي مخالفة لازم أروح أدفعها بالمرور و أييب براءة ذمة و أرد لها، سويت كل هذا و رديت حق المركز بس كان الوقت حروة صلاة الظهر، المهم، عطيت الإخت الموظفة نفسها الأوراق و خلصت كل شي جان تقول "روح حق الضابط(ما أذكر رتبته) خل يوقها و خلاص"، و رحت له، طقيت الباب و دشيت والا أشوف شي يلوع الكبد الصراحة، الحبيب مرتز ورا المكتب و وحدة من الموظفات قاعده قباله على المكتب (مو الكرسي لأ المكتب)و تهز ريولها تقول سعاد حسني، يوم شافني قال " اشتبي نعم"، قلت سلامتك أخوي توقيعك، قال تعال باجر الدوام خلص، قلت خير ؟
قال "أقول لك باجر"، قلت يا معود كله توقيع و المعاملة خاصه ليش تبي تعننيني؟، قال"اشفيك ترادد؟؟ قلت لك باجر، قلت الله يرحم والدينك كلها توقيع و الإخت ناطرتني أرد لها و انخلص، قال"ماكو، الدوام انتهى و تعال باجر" و أخوك مو شاب ظو ألا أظرس عليه، خليته و طلعت و فوضت أمري لله ، عند باب مكتبه ناداني الصبي ماله وهو بنغالي و قال"بابا جيب ورق" و أخذ من ايدي الأوراق و دخل وقعهم و رد و قال "هذا ماكو مخ" ضحت و قلت إي و الله يا بهي (أخوي) ماكو مخ و ماكو أخلاق بعد و رحت حق الإخت و خلصت و ياها المعاملة و شكرت البنغالي اللي ما اخد مني فلس حمر
يالله اقبض هذا بنغالي إللي ربعه تارسين الديرن بلاوي و الثاني كويتي من طينتي و أهله معروفين بس فرق مابين الأثنين و رجولتهم و أخلاقهم مع العلم ترى وقت الدوام ما كان منتهي بي ليش اني كلمته بأدب تمادى
أدري عورت عويناتك و راسك بهالقصة بس انصحك نصيحة أخوية، لا تطالع أحد من فوق و خل عزتك بثوبك مبنية على الحق و الكبير هو الله
و سامحني إذا كلامي شوي أذاك و أسأل الله التوفيق لك و للجميع إن شاء الله

Fahad Al Askr said...

كشخة دوامك، فيه كافتيريا تبيع بيتزا وفطاير

بالعافية

Mohammad Al-Yousifi said...

خوش كلام

بس صاحبك قبلوه بالجامعة الفلانية و توه راح هناك يداوم

لا تحش فيه رجاء

:P

Peace said...

الاحساس بالنقص
سبب وايد من المشاكل

اللي الواحد يحاول يعوض النقص اللي فيه و يحاول يطلعه بشي ثاني
و يبالغ فيه

العرزالــــــه said...

براقش

اي المركز الاول الا احتليتي لين الرابع

مسكين الولد هون مامر

وبعدين من قالج مازفيته مسكين الا شرشحته اسلافه

:)

العرزالــــــه said...

دافنشي

احنا كنا قاعدين بكافتيريا الدوام بالليل وفي 2 3 موظفين والاكل ابلاش الله لايوريك والمكان الله بالخير يعني مو لونتر والا الشيراتون والاكل تاكله اتسمم بنفس اللحظه

وبعدين كندا باريس بيفيرلي هيلز انا اذا هلقت هلقت مااااافي

:)

العرزالــــــه said...

بوحمود

شكلك ماقريت باقي الموضوع لأني اتفق معاك لو شخص كويتي قالي هالكلام ماراح ارد عليه بنفس الاسلوب وانا الهدف من الموضوع ابين شلون احنا ساعات نسوي اشياء بدون مانحس بس عشان نحس باحترامنا لذاتنا ومكانتنا الللي مالازم تنهز ومن بينها ان مايصير هندي يزفنا


وقصتك تضحك وتنرفز بنفس الوقت وتيبيكال كويتي اللي رحت له الله لايبارك بابليسه

انا ذكرت قصه شبيهه بموضوع عن المصريين راجع الارشيف طال عمرك

:)

العرزالــــــه said...

بوعسكر

مثل ماقلت حق دافنشي

الاكل ابلاش وبالسرداب وكله هنود فالله لايوريك البوفيه

تاكله يودونك العنايه المركزه على طول

:)

العرزالــــــه said...

مطقوق

يبا يبا يبا من قالك ان قصدي شسمه وين راح فكرك

بتودينا بداهيه لوول

لاقصدي واحد ثاني وتصدق اهو لويسمع السالفه بيعرف على طول انا اقصد منو

:)

العرزالــــــه said...

Peace

اي طبعا واقظب عاد من الامثله عندنا بالكويت النقص واصل لي الستار والجذب ماله والي

عشان جذي ماحب اروح وايد دواوين

ولد الديرة said...

عرزالتنا

عسى البيتزا تسوى بس

شوف عزيزي

فيه فرق كبير جدا بين البيتزا و المعتقدات والمذاهب

اعرف شنو اللي ودك تحققه بس البون شاسع و العم اصمخ و اطرم و عمي

بديت اشك ان براقش اهي سعود صاهود :P

حلم جميل بوطن أفضل said...

أخرج بره الدائرة

حاول أن تكون مختلفاً

حاول أن تكون أفضل ممن سبقك

حاول أن تستمتع و لو لم تقتنع

فقط حاول

هذا يكفي

+++++++++++++++++++++++++++++++++++

في عملي السابق كنت أحترم العامل في المطبخ كثيراً و أدافع عنه ، لأنه كان لا يخشى أحد و يقول كلمة الحق و يؤدي عمله بإخلاص و حصل له موقف مع مديرنا العود و وقفنا معه و لحسن الحظ مديرنا إقتنع

من يومها و هو كبير في عيوننا

يجب أن تبتسم لهذا العامل كل يوم لكي يعلم بان ما قام به هو الشئ الصح

على نفسها جنت براقش said...

من بعد اذنك عرزالة

شوف يا ولد الديرة

الشك ولا اليقين

خليك محتار

:)

بو محمد said...

أخي العزيز العرزاله
إقبل اعتذاري الخاص بشخصك الكريم و عن عدم التدقيق بدرجة أكبر في الكلام نظرا لألتفاتي لتعليقات الموظفين
على الموقف بشكل أكبر

ولد الديرة said...

براقش

بعد اذنك العرزالة

امرك الاحد سوق التيار اشرب زعتر

العرزالــــــه said...

ولد الديره وبراقش

اذنكم معاكم

العرزالــــــه said...

حلم جميل

معاك بالخروج من الدائره..المشكله الواحد مايحس بروحه واهو فيها ويتأثر بمن حوله ويسير على قوانينهم لو غلط

اما عامل الكافيتيريا فمع اني زودتها معاه بس مايعني انه زين وكلامه عدل واسلوبه خوش خوش!

بالعكس ليحلين اقولك كان وايد قليل ادب ومو محترم بس مايعني ان المفروض ارد عليه بنفس الطريقه ولا اني ابتسم له

بذبحه اصلا

:p

العرزالــــــه said...

بوحمود


شالحجي اعتذر لك وتعتذر لي اخوان مابينا هالكلام بس بغيت ابين لك انك فهمتني غلط ذاتس اول

:)

Unknown said...

والله يا عزيزي شقولك بس كلام منطقي عن الكتاب اللى تكلمت عنه
المهم شبعت والا لا ؟
:)

بولمعه said...

بولمعه محتاج تشجيع كونه مدون يديد
شجعه خلا يتحدى
:P

الخيلاء said...

اتفق مع الكلام 100%

و الي فيه نقص التعامل معاه صعب جدا الانك مهما اتحاول ترضيه مايرضى و يحس انه بعد ناقصه شي ..

و المشكله اذا صار هالانسان مسؤول و بدال لايطور بمكان عمله بيطور بنفسه و بيسد النفص الي يحس فيه


و ماسوت عليك هالبيتزا ;p

bass said...

عرزالة

أغلب الموظفين يقولون مو صاحي ؟
شيء غريب ليش أعتقد أن كان كلامة صحيح لازم ما تستخدم يدك حتى لو أخر وحده ؟
تدري شنو كان يمر فيه ذاك اليوم ، أحتمال واصلة خبر حزين لاحد أفراد عائلتة أو تم توبيخة من رئيسة في العمل فكان تصرف ألي بدر منه ، الابنسامة صدقة و الصدقة تدفع الشر
أبعده عنى جميعاااا

العرزالــــــه said...

بوعبدالله

اي الحمدلله من الغثى كليت لين قلت بس

العرزالــــــه said...

بولمعه

حياك الله ولله يوفقك وتكون بين اخوانك

:)

العرزالــــــه said...

الخيلاء

حده طلعت من خشمي

عاد ماكليتها تصدقين

العرزالــــــه said...

بس

ماقلت كلامه موصح وهم قلت ان تصرفي معاه غلط

ياشباب اقروا الموضوع للآخر

:p

بس هم مايعني ان تصرفه كان صح

كان وقح

وبعدين اي ظرف كل من يقول انه وقح من زمان