Wednesday, July 23, 2008

Sharm 2/3

الجزء الثاني من صور الرحلة


مغاصات شرم الشيخ

طبعا الغوص نوعين

Scuba diving

و

Free diving

الاولى بسلندر وتنزل تحت

والثانيه بالنظاره وانبوب التنفس من فوق واذا تبي تغوص تحت شوي

شرم الشيخ فيها مغاصات وايد

من أهمها 3 مغاصات

راس محمد وتيران وبلو هول في منطقة دهب

راس محمد وفيها محمية طبيعيه ومايسمحون للمراكب ترسي فيها

ولذلك مرجانها طبيعي وصحي وألوانه حلوه

=========

الرحلة الأولى: راس محمد


طبعا مراكبهم مصنوعه بمصر

طابقين أو 3..شبه يخت

فيها قعده تحت وفوق والقعده التحتيه مثل الصاله

فيها قعده وتلفزيون ومسجله ومكيف

بس ولا شي فيهم يشتغل طبعا

وفيها المطبخ اللي يسوون فيه غدى الرحله














هذا الجلاس بوت

أرضيت جام وتشوف تحتك الحياة البحريه


طبعا هذا شسالفته

إحنا رحنا راس محمد 3 مرات

المره الأخيره المشرف على الرحله لعب لعبه

انت شلون تحجز رحلة

تروح المكتب وتدفع الفلوس وتاخذ وصل بالمبلغ

لكن المشرف الفهلوي راح لهالشخص واخذ منه فلوس كاش بيوم الرحله عشان يوديه

وبدون وصل بالفلوس

عشان المكتب مايدري شالسالفه والمشرف مع راعي الطراد يقسمون الفلوس بينهم والمكتب يطلع منها

لكن ربك

الاخ اللي بالصوره دفع ل4 أشخاص

وياب وياه 3 يهال

يوم ركبونا المركب

الشرطه اللي مسؤوله عن التصاريح ماوافقت نطلع وقالت المركب فيه عدد زايد

غير بدل ماكو فايده

والمشرف فاحت ريحته

ونزلنا من الطراد

وصارت لويه

والمشرف قط كلمه وماسوت عليه

قال للأخ اللي بالصوره انت السبب

جدام الناس

طبعا احمد بدير مات

قام يصرخ مثل المينون

دنا اوديك في داهيه

بوليس السياحه

وصارت لمه

وكان في وحده مصريه متينه وقصيره

ولسان مو صج

ولك ان تتخيل

مسخره

ماسوت عليه الجيه

شقوه بالنص

واللي مايشتري يتفرج

مسخره وضحك

اخر شي نزلونا بمركبين

وردوا فلوسنا

يعني الطلعه ابلاش

لا ونزلوا الكل بسلندرات

يعني غوص من قلب

واخوكم نزل غطستين عميقتين

سعرهم 75 دولار

ابلاش

شعليك

رحلة وماكل غاطس ابلاش

وفوقهم عرض ولمه من المصريين

لا ويقولي هالمصري انا عايش بنيويورك

ويقول لعياله مين احسن نيويورك ولا ايجبت

ياعمي شكله فريجكم بالقاهره اسمه نيويوك

=====================

الرحله الثانيه: تيران










حمام سباحه

مو صج

نزلت 30 متر

واشوف اللي يسبحون فوق واضحين

هني بالخليج العربي

فوق 12 متر ماتشوف شي



كابتن الغوص

مولود وعاش بالكويت لي

1994

غنى لنا النشيد الوطني

وياشيخنا يابن صباح ياراعي الراي السديد

وتحسه مبينه عله النعمه وشايف خير من الديره

مو مثل الباجين


=====================

الرحله الثالثه: دهب والبلو هول


طبعا دهب مثل ماقنا بالموضوع السابق منطقه منفصله عن شرم الشيخ

ساعه بالسياره

وهالرحله فيها اكثر من شغله

الاولى يدخلون فيك سفاري

وبعدين نوصل لركوب الجمال

ونروح فيها ال

Blue hole

اي الفتحه الزرقاء

وبعدين نتسوق في مدينة دهب

واخر شي نروح بحر لاجون

مو طبيعي طبعا البحر

جنه



استراحه




هالجبل

على اليمين العلم المصري

وعلى الشمال مقبرة اليهود اللي ماتوا بحرب اكتوبر



طبعا اكبر غلطه ان كنا لابسين مايوهاتنا للرحلة

وركبا الجمل

وعليكم الحسبه






Blue hole
الفتحه الزرقاء

عمقها 120 متر

اتيي من على اليال

كله مرجان

تدش من خلال ممر صخري

وتسبح بهالممر الضيق

فجأه توصل الدائره مالت البلو هول

120 متر

ماتشوف شي تحتك

وفيه مرجان هني وهناك

طبعا البلو هول هذي فيها بلاوي تحت

وفيها مثل القوس الصخري

من القاع

وممتد لحد الستين متر فوق

يعني نصف المسافه من سطح البحر الى القاع

الغواصين ينزلون 60 متر ويدشون هالقوس

ويطلعون من الناحية الثانيه

وهالشي زين حق السيرة الذاتيه مالتهم مالت الغوص

بس المشكله ان اللي يغوص فوق الخمسين متر

بعضهم يطيح غشيان

وعشان جذي وايد من اللي نزلوا هناك ماتوا



هذي الشواهد مالت اللي ماتوا بالبلو هول

بعضهم ميت السنه اللي فاتت

مدينة دهب

نسخه مصغر من نعمه باي
طبعا للأسف ماصورت الضابط اللي كان قاعد على احد الاكشاك بالمدينه ويدخن وكاره عمره

رتبته نسر وسيفين

يعني لواء

بالشوارع مقططين

اما العقدا والمقدمين

هذيله اللي يعدون اللي بالرحلات

اما اما اما الشرطه العاديين اللي مو ضباط

مع لبسهم الابيض وتنحانهم

جنهم ممرضين معاهم مسدس

مسخره الوضع

لاجون

خيـــــــــــــــــــــال



وبس نتابع اخر جزء بعدين

20 comments:

ButterFlier said...

nice pics

sij 3alaikom bil 3afya :)

mo3ath said...

شكلك حللت مايوهك لوووووووول

اهم شي المصري يعني لاعبها وانتوا الربحانين :)

دنا اوديك في داهيه لوووووووول

بالعافيه عليك الرحلة البلاش والله شهيتني

ولد الديرة said...

خوش شيء

تيران وصنافير ترى سعوديتين بس تالي عطوهم مصر

اهم شيء المايوه وانت فوق البعير

تنكر وازلين ما ينفع معاك الحين

JooJ o MaJooJ said...

صباح الورد..ظحكت على انكم لابسين مايوهات عالجمل عسى ماحاشكم بوزليقة لوول...وسعت سدري وانا مالي خلق الدووام خفطينة الرحلة يالا إلي بعدو :D
jooj P.S:lesh matzorne in our blog???

العرزالــــــه said...

butter

حبيب قلبي الله يعافيك
:)

العرزالــــــه said...

معاذ

اي المصري

من صجك

قلت له مشكور

العرض مالك يسوى التأخير بالرحله قعد يضحك

اال نيو يورك اال

العرزالــــــه said...

ولد الديره

توني ادري انهم للسعوديه والله

عاد كان ويانا شباب سعوديين وقالولي ان في منطقه تبعد 100 كم عن المدينه على البحر الاحمر اسمه الريس

يقولون بحرها احلى من شرم ومرجانها اروع

المهم الوازلين

مالت شياب يالشايب

:)

العرزالــــــه said...

جوج وماجوج

بس بوزليقه

كل شي

وحاضرين نتشرف بالمرور

Eng_Q8 said...

الحمدلله على السلامه يالرفيق

عليك بالعافيه

JooJ o MaJooJ said...

thanx sweety 3al mroor :) 3ad
maye7tay agool kel maraah wanagez lool :P
yen6bg 3alena el mathal 3arftk men gerdk :P

هذيان said...

العرزاله

مصري وعياله في نيويورك
انزين عياله اشينقالهم
مصري وإلا أمريكي
أعتقد
مكري ؟؟؟
المهم شلون القعده بالفورسيزون هناك صاد عن الأزعاج

عواااااااااااافي
:))))))))

someone_q8 said...

السلام عليكم
الحمدالله على السلامة اخوي العروالة
وعليكم بألف عافية و زين سويت بهالسفرة
بس البحر مو طبيعي مال 24 سباحة

العرزالــــــه said...

مهندسنا

هلا بالحب والله

الله يعافيك ابوي

:)

العرزالــــــه said...

جوج وماجوج

حاضرين للطيبين ونتشرف والله :)

العرزالــــــه said...

هذيان

هلا بالطيبه :)

اي والله عاد انا ويا الربع شدعوه خلينا

ياعمي وينك وين نيويورك

اطلع منها بس

والفورسيزن مادشينا غرفه بس شفناه من داخل يعني ممراته والرسبشن وكلينا بالمطعم الايطالي

ياهذيان وايد وايد هادي وليتاته اللي بين الشاليهات يالله تشوفينها

يبيله ناس ملوت مزاج جذي

:)

العرزالــــــه said...

Some1 q8

الله يسلمك حبيب قلبي :)

اي والله عاد 24 ساعه كنا نسبح

نرد من البحر ندور الحمام سباحه والعكس

قطيت 3 كيلو

وطبعا لاتشوف السمار مال البحر

:)

-mate said...

الله يونسك بالعافية، إخووي =)
آنا عندي ليسن من سنتين منقعة وشارب مايه ولا غوصة إلا غوصة الليسن ..

وحسيت فيكم لما ركبتوا البعارين بالمايوهات :p

العرزالــــــه said...

-mate

الله يعافيك حبيب قلبي :)

انا جذي عندي ليسن متقدم بعد يكون كلش

ومن الدوام سنتين مو نازل

بس لما نزلت قلت بيــــه ويني عن هالشعور من زمان!

كويــتي لايــعه كبــده said...

"طبعا اكبر غلطه ان كنا لابسين مايوهاتنا للرحلة

وركبا الجمل

وعليكم الحسبه"

:)

ما ابي اتطنز

شكلك مو ناقص


...بس حلوه "الجمل"
أخاف دعاية للوطني
أكيد مو بعير
:)

العرزالــــــه said...

كويتي لايعه كبده

جمل بعير ناقه أباعر اللي اهو المهم اني رحت فيها

:p