Thursday, October 9, 2008

المستهلك الكويتي

عندي اعتقاد قديم بأن المستهلك الكويتي غبي
والامثله كثيره
مثلا
وكالات السيارات
تشتري سياره بعشرين الف أو اكثر
تروح مايعاملونك عدل
هذا اذا عطوك ويه
ومايصلحون السياره عدل
هذا اذا صلحوها
ويحسبون عليك التكلفه مع انها على الكفاله
واذا ييت بتدفع مبلغ وقدره الف دينار مثلا..على شي مايسوى بالسياره
تلقى الموظف ولا معطيك ويه
ليش
لأن في 10 اغبياء غيرك واقفين ينطرون وبيدفعون مثلك واكثر
وكالات التلفون
توك شاريه
يخترب
ولا من يدري عنك
اي اخوي يصير خير
وكالات الالكترونيات
شاري لاب توب يخترب واهو باغلى اثمانه ولا من يعوضك
محلات الملابس
يشترون بضاعتهم بالدولار
ومايغيرون بملصق السعر الا العمله
يعني اللي بعشرين دولار يشيلون كلمة دولار ويحطون دينار اشكره عيني عينك
واللي مدوبل السعر مرتين وثلاث واربع وسايتات الانترنت للشركات الاصليه تشهد
الكافيهات
كل يوم زايدين السعر وعلى اي شي يحاسبونك
توصل المواصيل زيادة الكراميل على المشروب اغلى من المشروب نفسه
توقف عند اي كاشير
تشتري شغله تافهه من اي مكان سعرها المفروض بسيط
لو تسمع الكاشير واهو يقول الحساب خمس دنانير..ممكن انك تكون سامعها خمسين دينار وتطلعهم بدون اعتراض
وتلقى موظف الكاشير مبقق عيونه مو مصدق ان في ناس بهالغباء
محرومين من ابسط حقوقنا كمستهلكين من كفالة دافعين قيمتها..وحماية من النصب والغلاء اللي ماله معنى..من تعامل راقي يعادل مادفعناه في اي سلعه
يعاملونا كأنا ماخذين الاشياء منهم ابلاش
والامثله لاحصر لها
تدرون شالسبب
او بعض الاسباب
انا اقولكم
لما الفلوس اتيي بدون مجهود
لما الفلوس يحصلها اللي تعب فيها واللي ماتعب فيها
هني الواحد مايحس بقيمتها ويبدى يصرفها بدون تفكير
لما تصير عندك حماية مستهلك الله بالخير وماعندهم غير كلمة انتوا اشتكوا وشوفوا شنسوي ولايسوون شي
لما تصير عندك غرفة تجاره بنظام حاميها حراميها
ولما تصير في ناس مايهمها اللي يصير ومستعده تدفع
هني يصير المستهلك الكويتي غبي
وباختصار
اذا مو عاجبك كل اللي طاف فبالطقاق
لأن اذا انا وانت بنحتر وبنقاطع هالاماكن
ففي مليون اهبل راح يعوض مكانا وبالعكس نكون وفرنا عليهم الزحمة والخير وايد
ولاحول ولاقوة الا بالله

63 comments:

Eng_Q8 said...

حماية المستهلك نايمين

يا عمي الديره كلها يبيلها حماية مستهلك

shahad said...

اللي يسمع كل واحد يم بينه بير نفط شالغلا اللي على اللي يسوى و اللي ما يسوى
و على قولنك إذا بنحتر و نقاطع في مليون دثوي بغطي مكانا
إنزين طرحت المشكلة و الحل ؟

EXzombie said...

الفورد طلعوا لي قرون

من اول ما خذيت الاسكيب اول ما طلع، و انا اقول لهم الكراسي فيهم مشكلة و في شي بالمكينة اتحرك، و يدقون علي طبعا يتشكروني من اول زلمة عندهم لين المسئول عن تجميع السيارة ما ادري باي ديرة، المهم كرسي السيارة انكسر، و كراسي المكينة نفس الشي، و صلحت اول مرة، و صار نفس الشي و قلت لهم نفس المشاكل ردت، و انكسر كرسي المكينة، و حاولوا يبدلون لي المكينة بكبرها الفطاحل، طلعت سيارتي بغزوة كبرى و رحت حق اقرب لحام، و لحمت كراسي الزفت و بعت السيارة

و الحمدلله، الله يلعن فورد و لا يوفقهم بشي

اهم و المازدا خدمة العملاء جنه مدخلينهم كورس التميت فايت

ButterFlier said...

teslam eeedik

Enter-Q8 said...

ولا تنسى احد الاسباب
البريستيج
طال عمرك

العزيز عرزاله
عندي واحد من الربع من هواة العبث بالسيايير لقى دوج موديل 76 اشتراه و رحنا نجربه بالليل و الا تفتيش الشرطي مد ايده بدون ما يطالعنا وقال الاجازة و الدفتر و هوية اللي يمك
عطاه صاحبنا الدفتر
شك بوم و الا ملتفت صوبنا
انتم كويتيين

سؤال اشمعني بره اذا سافرنا نقعد نكاسر
و هالشي معروف عنا
و اشمعني ايام الدراسة بره تسوق سيارة عادية و تي شيرت عادي و جينز عادي
العيب مو بغرفة التجارة و لا البضاعة العيب فينا و البريستيج اللي لازم ما ينهز 

ChiefQ8 said...

totally agreed

LonDonY said...

لو احطك مكان "اصحاب الوكالات" واشيل منك الضمير.. بهدف تحقيق الربحية

سؤال: ما راح اتسوي سواتهم؟؟

قولي لأ ؟


طيب هل المفروض -انا وانت- نلوم التجار ام .. نلوم من تررركهم وتخاذل في القيام في واجبه وقصر في حفظ حقوق الناس؟

Diver said...

اقدر اقول اني اوافقك باغلب الي قلته بس ما تهقا ان التاجر لازم يقدم الخدمات الي مطلوبه منه بشكل كامل حتى لو الناس ما تطالب او ما تدري بس لهدف واحد انه الشركة و بالتالي المردود المادي يتطور

MuLaN said...

wl-10% 7g elservice blm6a3m 3ad mn zen el5dma, shy y8hr =\

Fahad Al Askr said...

أنا من زمان ملاحظ إن القطاع الخاص صار مثل الحكومة، لازم واسطة علشان تخلص اللي تبيه

ZooZ "3grbgr" said...

انا اعتقد ان اللي ذكرته كله وغيره وايد بسبة الاحتكار

ليش عندنا شركة أو شخص محتكر السلعة
ليش بس الزياني يبيع فيراري
ليش بس الشايع يفتح ستاربكس بالشرق الاوسط
ليش بس المعوشرجي يفتح مكدونالدز

بره الكويت الوضع مو جذي
لا ويصير عندك فرعين مكدونالدز بنفس الشارع ينافسون بعض

لما الواحد يعرف ان له منافسين يتعلم الادب مع الناس لكن اذا تبي بي ام وين بتشتريها يعني من شارع خالد بن الوليد؟؟ قلنا اوكي واي وكالة بتوديها؟؟ فهمت شقصد

بدون عتيق said...

العزراله
إرفعي صوتك بمساندة الحملة الوطنية لإقرار قانون الحقوق المدنية والقانونية للبدون
http://www.aldaronline.com/


http://bedoonateej.blogspot.com/2008/10/blog-post.html

esTeKaNa said...

موضوع مميز كالعاده ما شاء الله
:)
بجانب ما تفضلت به وتفضل به الاخوان
المستهلك الكويتي يعاني من مشكله
أولا:
يعتقد ان فشله وما تسوا يتكلم عن غلاء اي سلعه بسيطة او اي مبالغ اخذت منه دون وجه حق
!!
والموضوع موضوع حق ومبدأ
وليس موضوع بخل
التاجر اللي في البدايه ياخذ منك ميتين فلس زياده دون وجه حق سيكون باب ليرفع كل الاسعار طالما انك راضي ولم تعبر عن اي اعتراض

ثانيا:
نعاني من ثقافه محبطة
اذا قلت حق شخص اشتكي
يقول ومنو بيسمعني؟
ومنو بيتحرك؟
واشدعوة صوتي بيسوي شي؟
اوكي..ابدا بنفسك ،وثق اعتراضك وكل مستنداتك وما قمت به في حماية المستهلك
ثم
انشر بالجريدة
لياخذ الموضوع مساحته بالراي العام وتجبر جماعه المستهلكين على ان يتجرئو في نشر شكواهم
وبالمقابل الطرف الاخر يقدر ان المستهلك ليس مغيب عقليا ويمكن ببساطة استغفاله

حمودي said...

ايييييييييييييييييييييييييي
والله

ابو لطيف said...

الخبز والكرسي

قبل لا تشتري اي شي

حول قيمته الى عدد الخبز اللي ممكن تشتريه بنفس المبلغ

وبعدها قرر تشتري او لا

.....

اذا شركة عنفصت في ضمان السلعة او تصليحها

حط لك كرسي عند الباب واشتكي للزباين
او على الاقل ارفع صوتك لما تتكلم عشان الناس تسمع المشكلة على الهواء مباشرة

تنفع احيانا هذه الطريقة


لكن احنا ما نحب الفشيلة جدام الناس

.....

تقولها : ابجم القميص
ترد : 250 دينار

تقولها : وي غالي
ترد : لا شو غالي ... هيدي رخيص كنا نبيعو بـ 350
وشوفيه بيلبأ عليكي

تستحتي وتشتريه

واللي تبيع القميص وتقول عنه رخيص معاشها 220

ليش تستحين منها ؟

بلانا منا وفينا يا الحبيب

والله المستعان

Selezya said...

البوست يضيق الخلق
:S

q8mirror said...

صدقــــــــــــــــــــــت

الف مرة صدقــــت،،،،

يبيلنا *رالف نادر* كويتي يقر لنا نظام حقيقي لحماية المستهلك،،،،يوعي هالأمــة التعبانة،،،


صح لسانــــك :)))

ZooZ "3grbgr" said...
This comment has been removed by the author.
ولد الديرة said...

حماية المستهلك جهة حكومية يسري عليها ما يسري على الجهات الأخرى من تخلف اداري

العيب فينا كشعب مستهلك

لا نعرف كيف نحفظ حقوقنا ولا ندافع عنها

ابسط شيء تلقى الناس ما تحتفظ باوراق الكفالة اصلاً

على فكرة مسألة خيسة نفس البياعين للأسف اصبحت سمة عالمية

Mishari said...

صح كلامك

بس للامانة حماية المستهلك مو نايمين وبالعكس ممتازين بس الوعي مفقود

ولكن فعلا احنا ندفع بدون ما نفكر

وهذا اللى مخلي الحلوين يدوسون ببطونا

بس انت الصراحة دايس ببطونهم من العصبية :)

someone_q8 said...

السلام عليكم
اخوي العرزالة , اذا رب البيت موافق وقاعد يشوف كل شيء و معطيهم الضوء الاخضر ... بتقول لأ ؟؟
راح تعترض وتعترض واتسوي لوية اتهقى راح ينزلون الاسعار
الايد الوحده ما اتصفق ياخوي , المفروض حملة كبيرة واتخصص بهالحملة اكثر من شركة اتحددها وتكتب اسماءها عشان الناس اتعرف ان اصحاب هالشركات شافطه فلوس الاوادم , وننطر فترة زمنيه وانشوف منو اللي يلتزم واللي مو هامه شيء



بالنسبة لحماية المستهلك على فكرة تره الشباب مو امقصرين لكن العيب فينا احنا انا مانروح لهم وانبلغ عن زيادة اي سعر , وانا شخصيا صارت معاي اكثر من قضية على محل وخذيت حقي منهم بفضل الله ثم بفضل حماية المستهلك
العيب فينا اللي ما نشتكي ولا انروح

على نفسها جنت براقش said...

لو يعرفون ياخذون موقف
بكل امور حياتهم

جان صار لكلمنتا هيبه


شوف الغلا اللى حولنا
و هم يشترون

الحمدلله و الشكر

mantovani said...

ساعات نتغاضى عن
المستويات المتدنية للخدمة
و ذلك لان اللي يشتكي يشرب من البحر
في اغلب الاحيان

فعلا لو كانت هناك هيئة محترمة تحقق في الشكاوى , لحرص جميع التجار على تدريب موظفيهم

و تحذيرهم من الزلات و عدم تقديم مستوى ممتاز للخدمة


مانتوفاني

mantovani said...
This comment has been removed by the author.
العرزالــــــه said...

مهندسنا

اي والله

العرزالــــــه said...

shahad

اي على قولة عبدالحسين في باي باي لندن

مي مميه نو ووتر

بترول لول

العرزالــــــه said...

اكزومبي

لاتحدني على الشر وتخليني اكتب اسامي الشركات اللي ابالي

العرزالــــــه said...

بترفلاي

اخيرا

العرزالــــــه said...

بو وليد

طبعا

طبعا

طبعا

مليون مره

العرزالــــــه said...

Chief

:)

العرزالــــــه said...

لندني

التجار مو بروحهم الملامين صح

بس هم مايصير كل التجار ماكو ضمير

العرزالــــــه said...

Diver

خل يقدم الخدمات الاساسيه

او على الاقل اللي يطالبه فيها الزبون

تالي يقدم خدمه كامله من نفسه

يبا هالحجي بالدول المتطوره

مو ربعنا

العرزالــــــه said...

مولان

صح

تصدق طافتني هالخدمه

انا سامع ان مو من حق المطاعم يحطونها وان اذا طالبتهم يشيلونها من الفاتوره يشيلونها

العرزالــــــه said...

فهد العسكر

بالضبط

قطاع خاص

وتدفع من جيبك

وهم اهو شغله مفروض مافيه روتين لأن ممكن يتفنش

وعلى قولتك

العرزالــــــه said...

زوز

تصدقين نقطه مهمه طافت علي

فعلا لومافي احتكار جان الخدمه ممكن تتغير

بس هم بيني وبينج

في محلات تبيع نفس البضاعه ومع ذلك يتنافسون بالخياس

العرزالــــــه said...

بدون عتيق

امر على المواقع ان شاء الله

:))

العرزالــــــه said...

استكانه

بالضبط

فينا حيا

نستحي من ناس مايستحون منا

نستحي من بياعين يمثلون علينا دور الكلاس واهم معاشهم ما ايي عشر البضاعه اللي قاعد يسوقون لها

غير طبعا الاحباط على قولتج هذا موضوعه اكبر من موضوعنا

العرزالــــــه said...

حمودي

اخخ بس

العرزالــــــه said...

ابو لطيف

لول عاد مو خبز

شدعوه

بس تصدق

انا من المؤيدين لنقطتك

ومثل ماقلت لاستكانه

البياعين يحرجونك ويطالعونك من فوق لي تحت واهو ماعنده خمسين فلس بحسابه

العرزالــــــه said...

سيليزيه

شدعوه

:P

العرزالــــــه said...

q8mirror

يبيلنا تطبيق ولو على مستحى للقوانين والله

:)

العرزالــــــه said...

زوز

بعد راسي

لاتعبين نفسج على شي مايسوى

:)

العرزالــــــه said...

ولد الديره

اي والله هم بعض الناس عليهم مشكله وحركات

يعني ورقة الكفاله مو وياك وقاطها

بروحهم واهي وياك يطنشونك

العرزالــــــه said...

مشاري

والله كل اللي سمعت سوالفهم يقولون ان ماخذوا منهم الا الكلام

وليش مادوس ابطنهم

شقونا شق بالتعامل والاسعار

:P

العرزالــــــه said...

Some1

ياليت تكشف الاسماء

لكن للأسف

اسامي تجار المخدرات

واسامي المتاجرين بالبشر محد تجرأ يكشف اسمائهم

وينهم وين التجار

اما حماية المستهلك

فوالله كل اللي سمعته غير

بس كل شي جايز

:)

العرزالــــــه said...

براقش

وهم الناس تشتري

وهم في هبل ماراح يوقفون

مو عشان جذي قلت اخر البوست بالطقاق فينا لأن محد بيهتم

العرزالــــــه said...

مانتوفاني

المشكله مو بيدنا

نعصب ونشتكي مره مرتين

تالي نشوف محد معطينا ويه فعلى قولتك نتغاضى بس مو بكيفنا

منطلقة بطموحي said...

خوش تدوينة :)
قواك الله

بانوراما said...

المشاكل وايد .!!

بس وين الحلول

العرزالــــــه said...

منطلقه بطموحي

حياج الله

:)

العرزالــــــه said...

بانوراما

على حسب المشكله

هالمشكله بايدنا جزء من حلها

نقاطع هالاماكن الجشعه والغير محترمه

Peace said...

علشان جذي قالوا
انه
القانون لا يحمي المغفلين

kuwaitya_7saweya said...

لا والحين طالعين لك هالمطاعم بسالفة تدفع مقابل الخدمه
ولا يعني سيرفس ب 2 ونص شي جذي واحنا ياغافلين لكم الله
قالوا في قانون يمنع انك تدفع مقابل الخدمه اذا ماكانت مكتوبه بالمنيو
بس اصحاب المطاعم ماصدقوا طبعوا منيو يديد مكتوب فيه قيمة الخدمه

والخافي اعظم

بوتشخيص said...

مشكلتين .. عقليتنا اللي ما تنبهر الا للسعر الغالي ..و المشكلة الثانية الإحتكار :)

فج الإحتكار و شوف اشلون يصيرون اوادم :)

wa6an-alnhar said...

لحول ولا قوة الا بالله

هم (مستهلك) و عله و مايبي يفكر و هم (غبي)

:S

العرزالــــــه said...

peace

خل يصير في قانون اول!

العرزالــــــه said...

كويتيه حساويه

يقولون لك حق تعترض ويشيلونها من الفاتوره بس عمري ماجربتها

العرزالــــــه said...

بوتشخيص

اسمع هالسالفه

واحد كان يبيع ملابس بسعر معقول

ومحد شرا منه

جرب يضاعف السعر 3 مرات

طاروا بنفس اليوم

قصه حقيقيه :)

العرزالــــــه said...

وطن النهار

اي والله!!

JiBLa CiTY said...

من آمرك ؟

قال محد نهاني

اعتقد الحل بالآخرة
:)

vancouver said...

والله بالله كل كلامك في البوست عدل

واصح كلمه انكتبت
انه الفلوس اللي تيي من غير مجهود
صاحبها ما يحس بقيمتها

للاسف احنا السبب
لا من التاجر النصاب
ولا البايع الجشع
ولاااااا احد
!!

احنا السبب
:\

كويــتي لايــعه كبــده said...

سجل عندك...

لما تبي تشترك بالشوتايم مثلا المندوب يجي لي عندك واذا نويت تنهي لاشتراك لازم تحضر بنفسك ولازم ولازم

وينقلونك من باقة الى أخرى بكيف ابوهم ووو

الردود استخفاف بعقل الساؤل مثل السستم جذيه والكمبيوتر يقول والله هذا من دبي ووو

طبعا لا تسأل عن المالك

ليش يهتم فيك اذا...
1- القانون يحمي التاجر لا المستهلك
2- الوعي الاستهلاكي العام في الحضيض

تردي مستوى الخدمة بالدولة بجميع مجالاتها جعل العامة تتوقع نفس الشيء من الخدمات التجارية والتجار فهموها ويستغل الغباء السائد ولا يكلف نفسه بما هو غير مجبر عليه

وصلت بهم كسر القانون
البنوك... أخذ القرض كم يستغرق؟
أخذ شهادة مديونية كم تستغرق؟ (اسبوعين واذا ما تراجعهم يطنشون)
البنوك لا تحترم الوكالة الرسمية من قبل الدولة وفقط الوكالة البنكية الداخلية التي هم مصدرها

المطاعم... (هذه حلوة عندي) غير تكلفة الأكل هناك 10% عادة مقابل الخدمة. ليش انت يوم بعتني الأكل كنت متوقع اني بآكلة على قاعة المطبخ؟! طبعا بتجيبة الى الطاولة. بالمستقبل نتوقع ندفع أرضية على الطاولة بعد!؟!

طال ما ان المستهلك غبي يصير أكثر

يمكن نشتري السيارة بمبلغ وقدرة واذا تبي تواير لازم تدفع زيادة

شخصيا مربح أرامكس وملاكها الأردنيين ومشتري تقريبا كل حاجاتي من الانترنت بأفضل الأسعار وبجودة غير موجودة بالسوق المحلي

لو بس يوصلون الماجلة كان حتى الجمعية وغلاء تجارها النصابين عطيناها طاف

نصيحة من أخ... لا تعطي فلوسك الا للي يستاهل مو شرط يخسر من مقاطعتك (وهو بالفعل لن يخسر) لكن ما تزيده من حلالك وانت كاره

Makintosh said...

امبيه والله احس انت طلعت الي بقلبي كله
انا دايما اخوي يقول نفس الكلام يقول انتوا مقصه الكل يقص عليكم

الفربتشينو بمصر ب 800 فلس
وبالكويت 1.600 العادي الي يلوع الجبد مع الاضافا يصير 2 واكثر
مع انه نفس المالك الشايع

وغيره وغيره وغيره نتكلم عن شنو وشنو

محد قاعد يتكلم :(