عندي اعتقاد قديم بأن المستهلك الكويتي غبي
والامثله كثيره
مثلا
وكالات السيارات
تشتري سياره بعشرين الف أو اكثر
تروح مايعاملونك عدل
هذا اذا عطوك ويه
ومايصلحون السياره عدل
هذا اذا صلحوها
ويحسبون عليك التكلفه مع انها على الكفاله
واذا ييت بتدفع مبلغ وقدره الف دينار مثلا..على شي مايسوى بالسياره
تلقى الموظف ولا معطيك ويه
ليش
لأن في 10 اغبياء غيرك واقفين ينطرون وبيدفعون مثلك واكثر
وكالات التلفون
توك شاريه
يخترب
ولا من يدري عنك
اي اخوي يصير خير
وكالات الالكترونيات
شاري لاب توب يخترب واهو باغلى اثمانه ولا من يعوضك
محلات الملابس
يشترون بضاعتهم بالدولار
ومايغيرون بملصق السعر الا العمله
يعني اللي بعشرين دولار يشيلون كلمة دولار ويحطون دينار اشكره عيني عينك
واللي مدوبل السعر مرتين وثلاث واربع وسايتات الانترنت للشركات الاصليه تشهد
الكافيهات
كل يوم زايدين السعر وعلى اي شي يحاسبونك
توصل المواصيل زيادة الكراميل على المشروب اغلى من المشروب نفسه
توقف عند اي كاشير
تشتري شغله تافهه من اي مكان سعرها المفروض بسيط
لو تسمع الكاشير واهو يقول الحساب خمس دنانير..ممكن انك تكون سامعها خمسين دينار وتطلعهم بدون اعتراض
وتلقى موظف الكاشير مبقق عيونه مو مصدق ان في ناس بهالغباء
محرومين من ابسط حقوقنا كمستهلكين من كفالة دافعين قيمتها..وحماية من النصب والغلاء اللي ماله معنى..من تعامل راقي يعادل مادفعناه في اي سلعه
يعاملونا كأنا ماخذين الاشياء منهم ابلاش
والامثله لاحصر لها
تدرون شالسبب
او بعض الاسباب
انا اقولكم
لما الفلوس اتيي بدون مجهود
لما الفلوس يحصلها اللي تعب فيها واللي ماتعب فيها
هني الواحد مايحس بقيمتها ويبدى يصرفها بدون تفكير
لما تصير عندك حماية مستهلك الله بالخير وماعندهم غير كلمة انتوا اشتكوا وشوفوا شنسوي ولايسوون شي
لما تصير عندك غرفة تجاره بنظام حاميها حراميها
ولما تصير في ناس مايهمها اللي يصير ومستعده تدفع
هني يصير المستهلك الكويتي غبي
وباختصار
اذا مو عاجبك كل اللي طاف فبالطقاق
لأن اذا انا وانت بنحتر وبنقاطع هالاماكن
ففي مليون اهبل راح يعوض مكانا وبالعكس نكون وفرنا عليهم الزحمة والخير وايد
ولاحول ولاقوة الا بالله
62 comments:
حماية المستهلك نايمين
يا عمي الديره كلها يبيلها حماية مستهلك
اللي يسمع كل واحد يم بينه بير نفط شالغلا اللي على اللي يسوى و اللي ما يسوى
و على قولنك إذا بنحتر و نقاطع في مليون دثوي بغطي مكانا
إنزين طرحت المشكلة و الحل ؟
الفورد طلعوا لي قرون
من اول ما خذيت الاسكيب اول ما طلع، و انا اقول لهم الكراسي فيهم مشكلة و في شي بالمكينة اتحرك، و يدقون علي طبعا يتشكروني من اول زلمة عندهم لين المسئول عن تجميع السيارة ما ادري باي ديرة، المهم كرسي السيارة انكسر، و كراسي المكينة نفس الشي، و صلحت اول مرة، و صار نفس الشي و قلت لهم نفس المشاكل ردت، و انكسر كرسي المكينة، و حاولوا يبدلون لي المكينة بكبرها الفطاحل، طلعت سيارتي بغزوة كبرى و رحت حق اقرب لحام، و لحمت كراسي الزفت و بعت السيارة
و الحمدلله، الله يلعن فورد و لا يوفقهم بشي
اهم و المازدا خدمة العملاء جنه مدخلينهم كورس التميت فايت
teslam eeedik
ولا تنسى احد الاسباب
البريستيج
طال عمرك
العزيز عرزاله
عندي واحد من الربع من هواة العبث بالسيايير لقى دوج موديل 76 اشتراه و رحنا نجربه بالليل و الا تفتيش الشرطي مد ايده بدون ما يطالعنا وقال الاجازة و الدفتر و هوية اللي يمك
عطاه صاحبنا الدفتر
شك بوم و الا ملتفت صوبنا
انتم كويتيين
سؤال اشمعني بره اذا سافرنا نقعد نكاسر
و هالشي معروف عنا
و اشمعني ايام الدراسة بره تسوق سيارة عادية و تي شيرت عادي و جينز عادي
العيب مو بغرفة التجارة و لا البضاعة العيب فينا و البريستيج اللي لازم ما ينهز
totally agreed
اقدر اقول اني اوافقك باغلب الي قلته بس ما تهقا ان التاجر لازم يقدم الخدمات الي مطلوبه منه بشكل كامل حتى لو الناس ما تطالب او ما تدري بس لهدف واحد انه الشركة و بالتالي المردود المادي يتطور
wl-10% 7g elservice blm6a3m 3ad mn zen el5dma, shy y8hr =\
أنا من زمان ملاحظ إن القطاع الخاص صار مثل الحكومة، لازم واسطة علشان تخلص اللي تبيه
انا اعتقد ان اللي ذكرته كله وغيره وايد بسبة الاحتكار
ليش عندنا شركة أو شخص محتكر السلعة
ليش بس الزياني يبيع فيراري
ليش بس الشايع يفتح ستاربكس بالشرق الاوسط
ليش بس المعوشرجي يفتح مكدونالدز
بره الكويت الوضع مو جذي
لا ويصير عندك فرعين مكدونالدز بنفس الشارع ينافسون بعض
لما الواحد يعرف ان له منافسين يتعلم الادب مع الناس لكن اذا تبي بي ام وين بتشتريها يعني من شارع خالد بن الوليد؟؟ قلنا اوكي واي وكالة بتوديها؟؟ فهمت شقصد
العزراله
إرفعي صوتك بمساندة الحملة الوطنية لإقرار قانون الحقوق المدنية والقانونية للبدون
http://www.aldaronline.com/
http://bedoonateej.blogspot.com/2008/10/blog-post.html
موضوع مميز كالعاده ما شاء الله
:)
بجانب ما تفضلت به وتفضل به الاخوان
المستهلك الكويتي يعاني من مشكله
أولا:
يعتقد ان فشله وما تسوا يتكلم عن غلاء اي سلعه بسيطة او اي مبالغ اخذت منه دون وجه حق
!!
والموضوع موضوع حق ومبدأ
وليس موضوع بخل
التاجر اللي في البدايه ياخذ منك ميتين فلس زياده دون وجه حق سيكون باب ليرفع كل الاسعار طالما انك راضي ولم تعبر عن اي اعتراض
ثانيا:
نعاني من ثقافه محبطة
اذا قلت حق شخص اشتكي
يقول ومنو بيسمعني؟
ومنو بيتحرك؟
واشدعوة صوتي بيسوي شي؟
اوكي..ابدا بنفسك ،وثق اعتراضك وكل مستنداتك وما قمت به في حماية المستهلك
ثم
انشر بالجريدة
لياخذ الموضوع مساحته بالراي العام وتجبر جماعه المستهلكين على ان يتجرئو في نشر شكواهم
وبالمقابل الطرف الاخر يقدر ان المستهلك ليس مغيب عقليا ويمكن ببساطة استغفاله
ايييييييييييييييييييييييييي
والله
الخبز والكرسي
قبل لا تشتري اي شي
حول قيمته الى عدد الخبز اللي ممكن تشتريه بنفس المبلغ
وبعدها قرر تشتري او لا
.....
اذا شركة عنفصت في ضمان السلعة او تصليحها
حط لك كرسي عند الباب واشتكي للزباين
او على الاقل ارفع صوتك لما تتكلم عشان الناس تسمع المشكلة على الهواء مباشرة
تنفع احيانا هذه الطريقة
لكن احنا ما نحب الفشيلة جدام الناس
.....
تقولها : ابجم القميص
ترد : 250 دينار
تقولها : وي غالي
ترد : لا شو غالي ... هيدي رخيص كنا نبيعو بـ 350
وشوفيه بيلبأ عليكي
تستحتي وتشتريه
واللي تبيع القميص وتقول عنه رخيص معاشها 220
ليش تستحين منها ؟
بلانا منا وفينا يا الحبيب
والله المستعان
البوست يضيق الخلق
:S
صدقــــــــــــــــــــــت
الف مرة صدقــــت،،،،
يبيلنا *رالف نادر* كويتي يقر لنا نظام حقيقي لحماية المستهلك،،،،يوعي هالأمــة التعبانة،،،
صح لسانــــك :)))
حماية المستهلك جهة حكومية يسري عليها ما يسري على الجهات الأخرى من تخلف اداري
العيب فينا كشعب مستهلك
لا نعرف كيف نحفظ حقوقنا ولا ندافع عنها
ابسط شيء تلقى الناس ما تحتفظ باوراق الكفالة اصلاً
على فكرة مسألة خيسة نفس البياعين للأسف اصبحت سمة عالمية
صح كلامك
بس للامانة حماية المستهلك مو نايمين وبالعكس ممتازين بس الوعي مفقود
ولكن فعلا احنا ندفع بدون ما نفكر
وهذا اللى مخلي الحلوين يدوسون ببطونا
بس انت الصراحة دايس ببطونهم من العصبية :)
السلام عليكم
اخوي العرزالة , اذا رب البيت موافق وقاعد يشوف كل شيء و معطيهم الضوء الاخضر ... بتقول لأ ؟؟
راح تعترض وتعترض واتسوي لوية اتهقى راح ينزلون الاسعار
الايد الوحده ما اتصفق ياخوي , المفروض حملة كبيرة واتخصص بهالحملة اكثر من شركة اتحددها وتكتب اسماءها عشان الناس اتعرف ان اصحاب هالشركات شافطه فلوس الاوادم , وننطر فترة زمنيه وانشوف منو اللي يلتزم واللي مو هامه شيء
بالنسبة لحماية المستهلك على فكرة تره الشباب مو امقصرين لكن العيب فينا احنا انا مانروح لهم وانبلغ عن زيادة اي سعر , وانا شخصيا صارت معاي اكثر من قضية على محل وخذيت حقي منهم بفضل الله ثم بفضل حماية المستهلك
العيب فينا اللي ما نشتكي ولا انروح
لو يعرفون ياخذون موقف
بكل امور حياتهم
جان صار لكلمنتا هيبه
شوف الغلا اللى حولنا
و هم يشترون
الحمدلله و الشكر
ساعات نتغاضى عن
المستويات المتدنية للخدمة
و ذلك لان اللي يشتكي يشرب من البحر
في اغلب الاحيان
فعلا لو كانت هناك هيئة محترمة تحقق في الشكاوى , لحرص جميع التجار على تدريب موظفيهم
و تحذيرهم من الزلات و عدم تقديم مستوى ممتاز للخدمة
مانتوفاني
مهندسنا
اي والله
shahad
اي على قولة عبدالحسين في باي باي لندن
مي مميه نو ووتر
بترول لول
اكزومبي
لاتحدني على الشر وتخليني اكتب اسامي الشركات اللي ابالي
بترفلاي
اخيرا
بو وليد
طبعا
طبعا
طبعا
مليون مره
Chief
:)
لندني
التجار مو بروحهم الملامين صح
بس هم مايصير كل التجار ماكو ضمير
Diver
خل يقدم الخدمات الاساسيه
او على الاقل اللي يطالبه فيها الزبون
تالي يقدم خدمه كامله من نفسه
يبا هالحجي بالدول المتطوره
مو ربعنا
مولان
صح
تصدق طافتني هالخدمه
انا سامع ان مو من حق المطاعم يحطونها وان اذا طالبتهم يشيلونها من الفاتوره يشيلونها
فهد العسكر
بالضبط
قطاع خاص
وتدفع من جيبك
وهم اهو شغله مفروض مافيه روتين لأن ممكن يتفنش
وعلى قولتك
زوز
تصدقين نقطه مهمه طافت علي
فعلا لومافي احتكار جان الخدمه ممكن تتغير
بس هم بيني وبينج
في محلات تبيع نفس البضاعه ومع ذلك يتنافسون بالخياس
بدون عتيق
امر على المواقع ان شاء الله
:))
استكانه
بالضبط
فينا حيا
نستحي من ناس مايستحون منا
نستحي من بياعين يمثلون علينا دور الكلاس واهم معاشهم ما ايي عشر البضاعه اللي قاعد يسوقون لها
غير طبعا الاحباط على قولتج هذا موضوعه اكبر من موضوعنا
حمودي
اخخ بس
ابو لطيف
لول عاد مو خبز
شدعوه
بس تصدق
انا من المؤيدين لنقطتك
ومثل ماقلت لاستكانه
البياعين يحرجونك ويطالعونك من فوق لي تحت واهو ماعنده خمسين فلس بحسابه
سيليزيه
شدعوه
:P
q8mirror
يبيلنا تطبيق ولو على مستحى للقوانين والله
:)
زوز
بعد راسي
لاتعبين نفسج على شي مايسوى
:)
ولد الديره
اي والله هم بعض الناس عليهم مشكله وحركات
يعني ورقة الكفاله مو وياك وقاطها
بروحهم واهي وياك يطنشونك
مشاري
والله كل اللي سمعت سوالفهم يقولون ان ماخذوا منهم الا الكلام
وليش مادوس ابطنهم
شقونا شق بالتعامل والاسعار
:P
Some1
ياليت تكشف الاسماء
لكن للأسف
اسامي تجار المخدرات
واسامي المتاجرين بالبشر محد تجرأ يكشف اسمائهم
وينهم وين التجار
اما حماية المستهلك
فوالله كل اللي سمعته غير
بس كل شي جايز
:)
براقش
وهم الناس تشتري
وهم في هبل ماراح يوقفون
مو عشان جذي قلت اخر البوست بالطقاق فينا لأن محد بيهتم
مانتوفاني
المشكله مو بيدنا
نعصب ونشتكي مره مرتين
تالي نشوف محد معطينا ويه فعلى قولتك نتغاضى بس مو بكيفنا
خوش تدوينة :)
قواك الله
المشاكل وايد .!!
بس وين الحلول
منطلقه بطموحي
حياج الله
:)
بانوراما
على حسب المشكله
هالمشكله بايدنا جزء من حلها
نقاطع هالاماكن الجشعه والغير محترمه
علشان جذي قالوا
انه
القانون لا يحمي المغفلين
لا والحين طالعين لك هالمطاعم بسالفة تدفع مقابل الخدمه
ولا يعني سيرفس ب 2 ونص شي جذي واحنا ياغافلين لكم الله
قالوا في قانون يمنع انك تدفع مقابل الخدمه اذا ماكانت مكتوبه بالمنيو
بس اصحاب المطاعم ماصدقوا طبعوا منيو يديد مكتوب فيه قيمة الخدمه
والخافي اعظم
مشكلتين .. عقليتنا اللي ما تنبهر الا للسعر الغالي ..و المشكلة الثانية الإحتكار :)
فج الإحتكار و شوف اشلون يصيرون اوادم :)
لحول ولا قوة الا بالله
هم (مستهلك) و عله و مايبي يفكر و هم (غبي)
:S
peace
خل يصير في قانون اول!
كويتيه حساويه
يقولون لك حق تعترض ويشيلونها من الفاتوره بس عمري ماجربتها
بوتشخيص
اسمع هالسالفه
واحد كان يبيع ملابس بسعر معقول
ومحد شرا منه
جرب يضاعف السعر 3 مرات
طاروا بنفس اليوم
قصه حقيقيه :)
وطن النهار
اي والله!!
من آمرك ؟
قال محد نهاني
اعتقد الحل بالآخرة
:)
والله بالله كل كلامك في البوست عدل
واصح كلمه انكتبت
انه الفلوس اللي تيي من غير مجهود
صاحبها ما يحس بقيمتها
للاسف احنا السبب
لا من التاجر النصاب
ولا البايع الجشع
ولاااااا احد
!!
احنا السبب
:\
سجل عندك...
لما تبي تشترك بالشوتايم مثلا المندوب يجي لي عندك واذا نويت تنهي لاشتراك لازم تحضر بنفسك ولازم ولازم
وينقلونك من باقة الى أخرى بكيف ابوهم ووو
الردود استخفاف بعقل الساؤل مثل السستم جذيه والكمبيوتر يقول والله هذا من دبي ووو
طبعا لا تسأل عن المالك
ليش يهتم فيك اذا...
1- القانون يحمي التاجر لا المستهلك
2- الوعي الاستهلاكي العام في الحضيض
تردي مستوى الخدمة بالدولة بجميع مجالاتها جعل العامة تتوقع نفس الشيء من الخدمات التجارية والتجار فهموها ويستغل الغباء السائد ولا يكلف نفسه بما هو غير مجبر عليه
وصلت بهم كسر القانون
البنوك... أخذ القرض كم يستغرق؟
أخذ شهادة مديونية كم تستغرق؟ (اسبوعين واذا ما تراجعهم يطنشون)
البنوك لا تحترم الوكالة الرسمية من قبل الدولة وفقط الوكالة البنكية الداخلية التي هم مصدرها
المطاعم... (هذه حلوة عندي) غير تكلفة الأكل هناك 10% عادة مقابل الخدمة. ليش انت يوم بعتني الأكل كنت متوقع اني بآكلة على قاعة المطبخ؟! طبعا بتجيبة الى الطاولة. بالمستقبل نتوقع ندفع أرضية على الطاولة بعد!؟!
طال ما ان المستهلك غبي يصير أكثر
يمكن نشتري السيارة بمبلغ وقدرة واذا تبي تواير لازم تدفع زيادة
شخصيا مربح أرامكس وملاكها الأردنيين ومشتري تقريبا كل حاجاتي من الانترنت بأفضل الأسعار وبجودة غير موجودة بالسوق المحلي
لو بس يوصلون الماجلة كان حتى الجمعية وغلاء تجارها النصابين عطيناها طاف
نصيحة من أخ... لا تعطي فلوسك الا للي يستاهل مو شرط يخسر من مقاطعتك (وهو بالفعل لن يخسر) لكن ما تزيده من حلالك وانت كاره
امبيه والله احس انت طلعت الي بقلبي كله
انا دايما اخوي يقول نفس الكلام يقول انتوا مقصه الكل يقص عليكم
الفربتشينو بمصر ب 800 فلس
وبالكويت 1.600 العادي الي يلوع الجبد مع الاضافا يصير 2 واكثر
مع انه نفس المالك الشايع
وغيره وغيره وغيره نتكلم عن شنو وشنو
محد قاعد يتكلم :(
Post a Comment