Wednesday, May 13, 2009

Q

شركات التنظيف

مو معطين البنغاليه معاشاتهم من 4 شهور

واقامتهم خالصه من 5 شهور

يقولون لهم اللي يدفع غرامة تأخير اقامته (اللي المفروض الشركه تجددها اصلا) يقعد ويكمل شغل واللي مايجدد الشرطه تاخذه وترده ديرته

انزين خلونا من سالفة ان اللي المفروض يجدد اقامتهم اهي الشركه اللي يايبتهم واذا تأخرت المفروض اهي تدفع الغرامة لأن غلطتها

من وين يدفعون والشركه اصلا مو معطيتهم معاشاتهم؟9

ويقولون اخر شي ليش البنغال مجرمين

والله حرام حرااام

21 comments:

حياتي هدف مو عبث said...

أول شي هذا مو عذر إن يصيرون مجرمين
المفروض يروحون حق راعي الشركة ولا اللي يابهم
ويقتلونة جذي ممكن أطلق عليهم ونعم المجرمين
وهممم لو تفكر يروحون يشتكون حق منو؟

كويــتي لايــعه كبــده said...

روح يا الذمم الهيفي دوتي اللي المولتي-مليونير يشيل بذمته ظلم آلاف المساكين فقط لأنه يعلم أنه فوق القانون ولن يمس

بيوت وسيارات لأولاده ومجوهرات للمدام من أفلاس المستضعفين والناس تجامله في الاعراس وتعتبره كشخة وتبي تتقرب منه

يا سلام

العرزالــــــه said...

حياتي

اتفق معاج 100%

مو عذر والسرقه سرق

بس هم لاتنسين

سرقة اللي ماعنده ياكل غير عن سرقة المرتاح

خاصة اذا كان في احد حاده عليها

وبعدين منو بيسمع لهم؟ اصلا اللي اييهم ماعنده اقامه قبل لايشتكي مسفرينه

العرزالــــــه said...

كويتي

ليتها كانت واحد او شركه وحده

ليتها ثم ليتها ثم ليتها!

اغلب الشركات اذا مو كلها جذي

:\

Yin مدام said...

للأسف عمى قلوبهم الفلس

وظلم الناس لا يغفره الله سبحانه إلا بعفو المظلوم للظالم

الله سبحانه وتعالى العدل
ومن عدالته أنه حين يحاسب لا يعاقب الناس بمساواة الجريمة لا وألف لا
بل سبحانه عز وجل يرعى ظروفها وأسبابها
وفي قصص كثيرة للنبي (ص) وآله وصحابته تدل على أن على القاضي أو الحكم النظر لجميع الظروف قبل النطق بالعقاب


يعني إللي يبوق خبزة ياكلها ولا يمد إيده للناس لأن ما عنده فلس ولا صرف له معاش لمدة 4 شهور نفس اللي يبوق ويظلم ويحرم الناس من أموالهم القليلة وعنده بدل المليون ملايين ؟؟؟؟


ما في احترام للقانون لأن يندر تطبيقه فضاعت هيبته


للأسف

قواك الله يا العرزالة

العرزالــــــه said...

مدام

اللي يبوقون الملايين ظلما ومن غير حاجه الف من يدافع عنهم

واللي يبوقون القليل مظلومين ومن حاجه الف من يهاجمهم

بلد المتناقضات انا دايما اقول

أبو جيج يدور نعاله said...

و يقولون ليش الديرة كأنها مصابة بلعنة و العياذ بالله


ما إتشوفون شنو قاعدين يسوون بالبشر؟؟


إستعباد عينى عينك


قبل فترة كلمنى قريبى عن حادثة صارت له بمقر عمله فى أرقى شركات الكويت و أغناها...فقد سمعوا صراخ و أصوات ضرب و توجهوا لمكتب المدير و إلا هو منقض على البنغالى و شغال عليه طراقات

متهمة بسرقة


سرقة شنو تتوقعون؟؟


موبايل؟

محفظته؟

لابتوب؟؟

ساعته؟؟


تخيلوا

موزع كهرباء بلاستيكى قديم و مغبر..ما يسوى 250 فلس

يعنى البنغالى ليش مد إيده و سرق الموزع الرخيص و ترك كل الأشياء الثمينة أمامه إذا فعلا هو حرامى و ما عنده ضمير؟

ماذا ستفعله الربع دينار؟؟

غير شراء خبز أو طعام رخيص يسد جوعه بنهاية الإسبوع ..لأنه مافيه أحد يشفق عليه و يناوله النص و الربع دينار ليعيش عليهم بعد إنتهاء الدوام...فالراتب مجمد من اشهر و لم يستلم فلسا واحدا


فى شى أبشع من هذا؟؟

مثل ما ذكرت...البنغالى مو مستلم معاشه من أشهر طويلة...حتى الزبالة تكرمون ما إتخلونهم ياكلون منها...شلون ما يمدون إيدهم و يسرقون التوافه لسد جوعهم؟


شسوون؟؟؟

لن تحل أى من مشاكلنا إذا ما تم إعطاء هؤلاء المساكين حقوقهم أولا

Deema said...

أنا أقول لازم نسوي مظاهرة للدفاع عن حقوق البنغالية

و كل من هو بالطبقة العاملة، و التي حسب الإحصائيات طاقة العلالي
٨٥٪ من نسبة المقيمين ذوي الدخل المحدود

mtfa2el said...

مرة كنت أسولف مع البنغالي اللي عندنا بالدوام أيام ما سووا مظاهرات
فكنت أتغشمر معاه أقول له بنغالي كلوه سوي مشاكل
قالي بكل بساطة ..انت عطي بنغالي فلوس مال اهو ماكو مشكل ما يعطي فلوس لازم في مشكل

اللي صاير بالكويت مع العمالة الوافدة بكل بساطة عبودية و ارجاع لزمن الرقيق الأول
تجار الإقامات ما في رادع لهم و الناس أكثر ما يصارخون و يبون يصلحون على سالفة تيار سياسي و الخبة ربعنا ما عندهم الا هذا ليبرالي و هذا اسلامي و طق مطاقق بينهم و بين بعض و ناسين هالمواضيع الانسانية اللي ما تحتمل أي تأخير بحلها

و لا تنسى طبعا وضع البدون بالكويت ..ظلم و عدم احساس بالانسانية على أصوله في هالديرة
ربعنا بدال لا يطبقون القانون على البدون اللي مستحق يعطونه و اللي مو مستحق يقولوله مالك حق و يسكرون هالملف المشين مرة وحدة
ماخذين هالورقة ابتزاز كل شوي يعطون فئة معينة محسوبة على هالنائب و لا محسوبة على هالنائب
و الفئة الكبرى عايشين بقمة الظلم على أمل انهم في يوم من الأيام يحصلون الجنسية

هذا الوضع مو حرااام ؟؟
و انا اتمم على كلامك ما الومهم لما يصيرون مجرمين
لما تحط واحد بوضع انه غصب يدورله لقمة عيش ولا غصب يلقى طريقة يستر فيها أهله لا تقوله ذيك الحزة عيب عليك تبوق

انا ودي أي واحد يقرا يطق فرة بالصليبية و الجهرا و يشوف البيوت الشعبية هناك و الناس شلون عايشة
عشان الناس تعرف شلون الوضع قنبلة موقوتة ناطرة الانفجار


طولت ما عليه بس هالموضوع وايد يحرني

بومريوم said...
This comment has been removed by the author.
بومريوم said...

و الله يا الغالى النظرة هذى للبنغالية من 80% من شعبنا المصون

راح احط تعليق كتبتة عند المدون دوكاتى...هو يناقش نفس المسألة بس من الضفة الاخري

العزيز دوكاتى
ما الومك..بس خلنا نفر الكرسي و نقعد الصوب الثانى
انا دوامى 12 ساعة..الراتب 30 دينار..و كل الرسوم على
و وقت التجديد يبى الكفيل منى 300 الى 500 دينار..يعنى آخر السنة أطلع مطلوب

بديرتى عايلة على الاقل فيها 5 أشخاص معتمدة على..يعنى هالامية فلس ممكن توكل لها نفر هناك
يعنى انا عندى ثلاث حلول
1- أقول السلام عليكم يمكن أحد
يطيعنى ربع او أمية فلس

2- اشتغل بصناعة اعادة التدوير و اجمع قواطي

3- ابوق او اسوى شى مو زين

تظل الطرارة..مع انها منظر مو حضارى احسن الموجود

لو بيدى..البس اللى كافلة البلسوت الاصفر يوم و اخليه يفتر عشان يعرف ان الله حق
و تقبل الاطالة:)
07 May 2009 11:50
----------------------
بعدين انا طالع الحداق الاسبوع الياى و ابى جم احداثية طيبة منك:)

Mamloo7a Q8ia said...

مساكين هالعمال
:(
وحسبي الله على اللي قاعدين
يسوون فيهم جذي

للاسف ان اكو ناس مثل هالظالمين عندنا
وحوبة هالعمال صابت البلد باللعنه

والخير يخص والشر يعم
وشرهم عم علينا يا وخيي الغالي

العرزالــــــه said...

بوجيج

ولو اكبر من هالسالفه مسويها كويتي جان ماتجرأ ذاك حتى يكلمه

مشكله معتبرينهم مو اوادم

وفعلا كلامك 100% صح الاوضاع ماتتعدل اذا مانرحم غيرنا

ارحم ترحم

العرزالــــــه said...

ديمه

عاد تصدقين؟

والله ابالي اروح اشتكي بالمخفر باسمهم

مساكين يخافون

العرزالــــــه said...

متفائل

بالعكس ماطولت وكلامك فيه اضافة وقلت اللي انا ماقلته

فعلا فعلا فعلا انشغلنا بتوافه الامور كل واحد يقط له كلمتين ويرد بيتهم مريح

والمشاكل الانسانيه الحقيقيه ولاندري عنها

العرزالــــــه said...

بومريوم

هم انا علقت عند الريال لأن في واحد منهم كان باط جبدي

بس عدل كلامك الشي مايعم عليهم كلهم الباجين صج مساكين ومحتاجين

وعلى الاحداثيات

دزلي ايميل بالمكان والوقت اللي بتروحله ونوع وحجم السمجه اللي تبيها لووول

العرزالــــــه said...

مملوحه

تصدقين توقفت عند جمله مهمة جدا جدا

شرهم عم علينا

والله صاجه واللله

Anonymous said...

موضوع البنغاليين وموضوع الخدم بشكل عام مصيبة ومعور قلبي وماودي ابطلة اخاف انصدم من الواقع

العرزالــــــه said...

حمودي

مساكين وجريمه اللي قاعد تصير فيهم

سوق المناخ said...

الظلم ظلمات يوم القيامة .. يا ويلهم من ربهم

العرزالــــــه said...

سوق المناخ

بعدددد

:\