شتبي من حياتك؟

عطفا على البوست اللي طاف..حلوه عطفا؟ ناهيك؟
أوكي..

+++++++++++++++++++++++++++++

شتبي من الابتدائي وقبلها؟ تلعب وتنام

شتبي من المتوسط؟ نفس الشي وبآخر المتوسط إيي بعض الناس احساس بالمسؤوليه ووجوب اتخاذ قرار حول الخطوة التاليه..الثانويه..أي وحده وأي نزام عام والا مقررات؟

شتبي من الثانوي؟أي تشعيب وشلون أييب فيه أعلى معدل..وبآخرها تفكر أي جامعه أروح وأي تخصص

شتبي من الجامعه؟ شلون تنجح..وأي تشعيب تروح صح؟

شتبي بعد الجامعه؟..تدور وظيفه..

لقيت وظيفه؟ البعض يتزوج والبعض يكمل شغل عادي..

+++++++++++++++++++++++++

المصيبه ان وايد مايدرون انهم بهالفتره وصلوا الخطوه الثانيه بعد الدراسه..الخطوه الثانيه في حياتهم والأخيره..الخطوه المصيريه..

واللي لازم فيها يسألون روحهم السؤال الأزلي..السؤال الأخطر..السؤال اللي وبدون مبالغه يدفع بعض الناس إلى الاكتئاب والانتحار –على الاقل في الدول الغربيه-..

شتبي من حياتك؟

الحين خلصت من مرحلة الدراسه والتجهيز..ووصلت لمرحلة الانجاز وحصد ثمار دراستك وتربيتك..

شتبي من حياتك؟ شتبي من حياتك؟ شتبي من حياتك؟ اسأل نفسك مليون مره..لقيت إجابه؟

++++++++++++++++++++++++

أغلب الناس..ينولد تحت الساس..ويموت تحت الساس..وعلى قولة علماء النفس..ينولد انسان عادي ويعيش عادي ويموت عادي..وهذي حدود طاقة (غالبيتهم) لأن الدنيا مو كلها مبدعين..ولاحظ قلت (غالبيتهم) مو كلهم..لأن فيهم فئة ماتدري ان عندها مايجعلها من الفئه غير العادية..وهالفئه القليله للأسف وايد نلقاها منتشره بالكويت..حارقه مواهبها وقدراتها بالدواوين او القهاوي أو الطلعات..إلخ

وبعض الناس..يحرق نفسه جهده في غير ماينفعه..يشتط في نشاط سياسي واهو مو مال سياسه..أو في الرياضه..أو أو أو الخ وبالنهايه ضيع وقته وعمره..

والقله القليله؟ اللي حط جهده وفكره بالمكان السليم فأبدع..مع ان وايد منهم ناس (عاديين)

++++++++++++++++++++++++

أرد وأقول..شتبي من حياتك؟

إذا الله اعطاك عمر وصار عمرك 70 سنه وييت تطالع وراك وتشوف حياتك..شتبي تشوف؟

+++++++++++++++++++++++++

من وجهة نظري..على الانسان أولا تحديد اولوياته..

شنو اكثر اهتماماتك؟ وشنو ترتيبهم؟ربك ودينك؟ أهلك؟ ربعك؟ تجارتك ومالك؟ اجتماعيه؟ دينيه؟ علميه؟ الخ

ترتيب أولوياتك راح يرتب لك حياتك ويريحك..وبعدها؟

تحديد أهدافك أو هدفك الرئيسي والأهداف الثانويه..

وعن طريق ترتيب أولوياتك راح توصل لأهدافك..

+++++++++++++++++++++++++++

نقطه ثانيه للي يحبون التأجيل..

ذروة النشاط والانجاز هي مابين سن العشرين والاربعين..بعدها يبدي الانسان بحصد الثمار..

ترتيب حياتك على أسس سليمه يعني السعاده لأنك عارف إنت شتبي وشراح توصله..

ياما ناس بعد التقاعد يتمنون الموت ويحسون ان مابقى شي بالدنيا يستاهل لأنهم ماعرفوا الى الان شالهدف من حياتهم..

وياما ناس بسن الستين والسبعين وهم في قمة السعاده..أنجر ولازال ينجز ويرى ثمار هذا الانجاز..

+++++++++++++++++++++++++

نقطه هم مهمه..

على الانسان انه مايحوشه الهم والكدر واهو يفكر بمستقبله..يحاتي الوظيفه او المنصب والفرص..

الانسان يعمل ويخطط ويخلي الباجي على الله..

كل ميسر لما خلق له..

ويقال..علمت أن رزقي لن يأخذه أحد غيري فارتاح قلبي..
وعلمت أن عملي لن يعمل به أحد غيري فاشتغلت به..

++++++++++++++++++++++++++

يبقى السؤال..

شتبي من حياتك؟