Friday, November 23, 2007

شتبي من حياتك؟

عطفا على البوست اللي طاف..حلوه عطفا؟ ناهيك؟
أوكي..

+++++++++++++++++++++++++++++
شتبي من الابتدائي وقبلها؟ تلعب وتنام

شتبي من المتوسط؟ نفس الشي وبآخر المتوسط إيي بعض الناس احساس بالمسؤوليه ووجوب اتخاذ قرار حول الخطوة التاليه..الثانويه..أي وحده وأي نزام عام والا مقررات؟
شتبي من الثانوي؟أي تشعيب وشلون أييب فيه أعلى معدل..وبآخرها تفكر أي جامعه أروح وأي تخصص

شتبي من الجامعه؟ شلون تنجح..وأي تشعيب تروح صح؟

شتبي بعد الجامعه؟..تدور وظيفه..

لقيت وظيفه؟ البعض يتزوج والبعض يكمل شغل عادي..

+++++++++++++++++++++++++

المصيبه ان وايد مايدرون انهم بهالفتره وصلوا الخطوه الثانيه بعد الدراسه..الخطوه الثانيه في حياتهم والأخيره..الخطوه المصيريه..

واللي لازم فيها يسألون روحهم السؤال الأزلي..السؤال الأخطر..السؤال اللي وبدون مبالغه يدفع بعض الناس إلى الاكتئاب والانتحار –على الاقل في الدول الغربيه-..

شتبي من حياتك؟

الحين خلصت من مرحلة الدراسه والتجهيز..ووصلت لمرحلة الانجاز وحصد ثمار دراستك وتربيتك..

شتبي من حياتك؟ شتبي من حياتك؟ شتبي من حياتك؟ اسأل نفسك مليون مره..لقيت إجابه؟

++++++++++++++++++++++++

أغلب الناس..ينولد تحت الساس..ويموت تحت الساس..وعلى قولة علماء النفس..ينولد انسان عادي ويعيش عادي ويموت عادي..وهذي حدود طاقة (غالبيتهم) لأن الدنيا مو كلها مبدعين..ولاحظ قلت (غالبيتهم) مو كلهم..لأن فيهم فئة ماتدري ان عندها مايجعلها من الفئه غير العادية..وهالفئه القليله للأسف وايد نلقاها منتشره بالكويت..حارقه مواهبها وقدراتها بالدواوين او القهاوي أو الطلعات..إلخ

وبعض الناس..يحرق نفسه جهده في غير ماينفعه..يشتط في نشاط سياسي واهو مو مال سياسه..أو في الرياضه..أو أو أو الخ وبالنهايه ضيع وقته وعمره..

والقله القليله؟ اللي حط جهده وفكره بالمكان السليم فأبدع..مع ان وايد منهم ناس (عاديين)

++++++++++++++++++++++++

أرد وأقول..شتبي من حياتك؟

إذا الله اعطاك عمر وصار عمرك 70 سنه وييت تطالع وراك وتشوف حياتك..شتبي تشوف؟

+++++++++++++++++++++++++

من وجهة نظري..على الانسان أولا تحديد اولوياته..

شنو اكثر اهتماماتك؟ وشنو ترتيبهم؟ربك ودينك؟ أهلك؟ ربعك؟ تجارتك ومالك؟ اجتماعيه؟ دينيه؟ علميه؟ الخ

ترتيب أولوياتك راح يرتب لك حياتك ويريحك..وبعدها؟

تحديد أهدافك أو هدفك الرئيسي والأهداف الثانويه..

وعن طريق ترتيب أولوياتك راح توصل لأهدافك..

+++++++++++++++++++++++++++

نقطه ثانيه للي يحبون التأجيل..

ذروة النشاط والانجاز هي مابين سن العشرين والاربعين..بعدها يبدي الانسان بحصد الثمار..

ترتيب حياتك على أسس سليمه يعني السعاده لأنك عارف إنت شتبي وشراح توصله..

ياما ناس بعد التقاعد يتمنون الموت ويحسون ان مابقى شي بالدنيا يستاهل لأنهم ماعرفوا الى الان شالهدف من حياتهم..

وياما ناس بسن الستين والسبعين وهم في قمة السعاده..أنجر ولازال ينجز ويرى ثمار هذا الانجاز..

+++++++++++++++++++++++++

نقطه هم مهمه..

على الانسان انه مايحوشه الهم والكدر واهو يفكر بمستقبله..يحاتي الوظيفه او المنصب والفرص..

الانسان يعمل ويخطط ويخلي الباجي على الله..

كل ميسر لما خلق له..

ويقال..علمت أن رزقي لن يأخذه أحد غيري فارتاح قلبي..
وعلمت أن عملي لن يعمل به أحد غيري فاشتغلت به..
++++++++++++++++++++++++++

يبقى السؤال..
شتبي من حياتك؟

15 comments:

fghdfhg said...

سؤال وايد مهم ...

ولازم نفكر فيه قبل ما تروح علينا :)

كبرنا تخرجنا اشتغلنا وبعدين :)

صح لكل انسان لازم طموحه مايتوقف عند حد معين ويستمر بالإنجاز وأعظم شي انك تزرع شي طول هالفتره الدراسيه وتحصده شي أعظم بالنهايه :)

شي حلو يكون لك موهبه وتستفيد منها وتاثر وتتأثر بهالمجتمع

مشكور أخوي على الطرح المميز واحنا صج بحاجه لمثل هالوقفه الجاده مع النفس

يشرفني اني أكون اول من يرد على هالموضوع ^.^

حلم جميل بوطن أفضل said...

أبي عيالي مستانسين و في وضع أفضل من اللي آنا فيه .. تعليماً إجتماعياً نفسياً مالياً .. من مجاميعه

..
..
..
..

و سبعة مليون دولار
..
بس
!!

Mohammad Al-Yousifi said...

رضا الله و رضا الوالدين و الأهل

و البقية تأتي

عاجـل said...

اتجوز واقعد بالبيت

Unknown said...

اذا تبي تعرف
التفت كل يوم وري ظهرك وشوف شنو حققت هل فى انجاز ؟

حتي لوكان بسيط او بالاصح مو شرط انجاز بالمعني السائد
هل احنا اضفنا الابتسامة حق احد؟

فتى الجبل said...

العرب ياخوي ما عندهم مستقبل
والمفروض يكون السؤال
اشتبي من يومك؟
العرب عايشين يومهم وبس

على نفسها جنت براقش said...

ابى اذا مرت سنين عمرى و كبرت
ما اندم على كل لحظه مرت على بحلوها و بمرها
ابى اترك بصمه
ابى السعادة
ابى القى عديل روحى معاى بكل لحظاتى الباقية

العرزالــــــه said...

الطيبه ذبحتني

وتأثر بالمجتمع..نعم

وانا اللي اتشرف بتعليقك ومرورك يالحبيب :))

حلم جميل

طموح كويتي أصلي (((:
الله يخليكم حق بعض بس ليش بالدولار؟

كله مطقوق

نفس تفكيري :)

عاجل
ياكويتي انت!!

مشاري

تصدق مشاري..اعتقد ان الانسان اسعد مايكون وقمة الانجاز انك تدخل الراحه والسرور لقلب غيرك

من فرج عن مسلم كربة فرج الله عنه بها كربة من كرب يوم القيامه
:)

فتى الجبل
وهذي النظره الضيقه القصيرة المدى اهي اللي مضيعتنا

الامريكان يقولون

حصدنا مازرع غيرنا ونزرع ليحصــــــــــــد غيرنااااااا

احنا نبي نحصد شغل غيرنا وشغلنا


براقش

تدرين انج قلتي كلمه بقلبي؟

ساحره؟؟

"اني اترك بصمه"

هذي جمله خالده يابراقش بسجلها لج :))

Salah said...

ما ودي أتحسف على شي

مابي أتحسف على ضياع وقت أو مجهود

اللي أبيه من حياتي أني أسوي كل شي أقدر عليه اذا كان مفيد طبعا

أتمنى أني أظل أتعلم الى اخر يوم بحياتي... أتعلم من الكتب ومن التاس ومن الجرايد ومن المدونات... واتمنى ان ما يمنعني الغرور والاعتقاد أني متعلم عن الاستمرار في التعلم

وأتمنى اني أجد الكنز الذي لا ينفى واللي يسمونه القناعة

شكرا

Anonymous said...

لي صار الي ابيه قلت لك
:)

Q80 Blogger said...

التفكير بهل سؤال ما اعتقد ما مر على اي شخص
والي يعرف جوابه وايد
بس منو يعرف الجواب الصحيح .. ويمشي عليه

تحليل جيد .. ويحرك المخ

تحياتي

Eng_Q8 said...

موضوع حلو ومهم
رضا الوالدين والرضا عن النفس
وانا بصراحه اذا التفت وراي وشفت احد تاثر بكلامي ومشى بالطريق الصحيح ونفع نفسه ونفع ديرته فهذا انجاز حياتي حتى لو كان بس واحد
هدفي هو مصلحة الكويت

Fahad Al Askr said...

سلامتك

مليونين دينار وشوف غبرتي بالمطار

bass said...

رضى الوالدين و اربي اولادي تربية صالحة ورضى زوجي و اذا ايصير 5 مليون دينار و بس

Um El-Zain said...

ان اكتشف نفسي و اسعدها عشان اقدر اسعد الي حوالي