Wednesday, December 26, 2007

ليس الفتى من قال كان ابي * ان الفتى من قال هائنذا

يا أيها الناس إنّا خلقناكم من ذكر وأنثى وجعلناكم شعوبا وقبائل لتعارفوا إنَّ أكرمكم عند الله أتقاكم - سورة الحجرات
قال رسول الله (ص) : ..ومن قتل تحت راية عمية ، يغضب للعصبة ، ويقاتل للعصبة ، فليس من أمتي .

قال رسول الله (ص) : لا فضل لعربي على أعجمي ولا لعجمي على عربي ولا أبيض على أسود ولا أسود على أبيض إلا بالتقوى الناس من آدم وآدم من تراب

رجلان من المهاجرين والأنصار تشاجرا فقال الانصاري يا للانصار وقال المهاجري يا للمهاجرين فسمع ذلك الرسول (ص) فقال: أفبدعوى الجاهلية وانا بين ظهرانيكم؟دعوها فانها منته
وقال (ص) فيما معناه أنا من بني عبدالمطلب أنا من خير النسب..فلاتتفاخروا بالانساب
وقال أيضا (ص): رب اشعث اغبر لو اقسم على الله لأبره
=================
بعد؟ أحط زياده والا كافي؟
أقولها دون أي مجاملة..أؤمن بكل ماسبق وزياده
أومن فعلا لاقولا..عندي أصدقاء واخوان من كل مكان بالدنيا..من الفقير المنتف..لين غيره
أؤمن فيما سبق..وما أقول هذا بنغالي والا هندي خله يولي..ولا أقول هذا كويتي ميخالف وانزل الناس منازلهم حسب معيار المساواة الرباني
ماكان ودي أقول اللي قلته..ولا أحب اقول فيني ومافيني..لأن احنا مو داشين معارض كل واحد يمدح نفسه
ولكن
لازم أبين بعض الامور واوضحها خاصة اني قاعد ابني علاقه معاكم
وخاصة اني تضايقت من سوء ظن البعض..واتهام البعض..وسوء فهم البعض لما ذكرت في مقالتي السابقه
ترا مافي أي سبب يدعوني للدخول إلى عالم المدونات أو الانترنت للنفاق أو للمجاملات أو للمزايدات..لأن أي واحد فينا ممكن يطبقها بالصج..ويوصل للتقدير "الملموس" والاعجاب بتواضعه مو هني مجرد شاشه واسامي محد فينا يعرف الثاني او يحس فيه
===================
فرق بين العنصريه..وبين المطالبه بتطبيق القوانين
يعني اذا انا سني..والغلط صار من شيعي او العكس..اسكت عشان لا اصير عنصري؟
اذا واحد حضري..وشاف واحد بدوي غلط او العكس ..يسكت عشان لايصير عنصري؟
يعني اذا واحد كويتي..وشاف الغلط من وافد..يسكت وينطم عشان يصير ادمي؟
يعني لازم نسكت واحنا نشوف السالفه قاعده تصير سبهلله بالديره عشان نصير انسانيين؟
==================
تبا لهاته تعاريف ثم تبا
يعني لازم ادافع عن الغلط عشان اصير ادمي وملك حقوق الانسان؟
لازم اجامل واكتب اشياء مو مقتنع فيها ولا اؤمن فيها بالصج عشان اصير خوش ريال؟
لازم اتفلسف وابين لكم اني انا اللي ميزان العدل عندي والمساواة يخليني اسفل بالكل او امدح الكل ولا افرق بين الزين والشين؟
لازم اطرح افكار عايمه ومالها معنى الا "شوفوني انا الانساني الحبيب"؟؟
لا والف لا
ما تعودت انخش ورا افكاري
ولا دشيت المدونات وحطيت لي مدونه الا عشان افيد واستفيد حسب فهمي
وعشان اقول ارائي بكل صراحه
===========
نعم العنصريه موجوده لدى البعض
لكن هذا البعض مو من فئه وحده
نعم الاحتقار والنظره الدونيه للغير موجود..لكن..هل هو من فئه وحده؟
============
بكل الاحوال
ماقلت اللي قلته الا لأني مليت من المزايدات ومن محاولات الظهور بمظهر الملائكه الاطهار
ماقلته الا عشان ابين ان ياجماعه..معالجة العنصريه لاتكون بازدراء كل صوت يحاول الاصلاح لمجرد اختلاف عرقه او مذهبه عن من يتحدث عنه
معالجة العنصريه لاتكون بالتكسب على حسابها والتحدث بما لانؤمن به لمجرد تلميع صورنا
معالجة العنصريه تكون بفهم نفسيات العنصريين..ومعرفة السبب الذي دفعهم لهذا الشعور
يكون بمعرفة ان العنصريه ليست محصوره بفئه محدده
=====================
اذا في احد يقول انا ولد بطنها ما ازوج الا اللي مثلي..ففي غيره اللي يقول انا بدوي او شيعي وما ازوج..والا لأن الاولي ذكر كلمة تسبب حساسية وكلمة بدوي وشيعي وغيره عادي؟مو كلهم فيهم عنصريه؟
المعالجه تكون بفهم ان اصل المشكله كما ذكر البعض ليست فيني وفيك وانما فيمن زرعها فينا على اختلاف مذاهبنا وعروقنا
المعالجه بفهم النفس البشريه وان مثل مافيها عقل فيها غريزه ومن شبه المستحيل القضاء على غريزة التعصب %100..لازم الواحد يخونه احساسه ساعات
================
انا اسف اذا طولت
اسف اذا غلطت
اسف اذا احد فهم كلامي على انه موجه له والكلام ترا ماله شغل بحد..بس قصدي ابين اشياء فيني
واسف اذا كلامي كان مو مرتب..لكني تركت العنان للكي بورد..يكتب اللي بقلبي..وانا اللي بقلبي..على كي بوردي وما اعرف اجامل
:)

35 comments:

Barrak said...

اكتب ياخوي

احلى الكلام اللي يصدر من القلب الى القلب


خلك بالعزاله واشجينا
مع ان الدنيا برد
بس بنتحمل لانك راقي

بوصالح said...

العرزالة

نحن عنصرين و بشدة

و ماعليك .. دربك خضر

ButterFlier said...

ehehehe\\

naawaf elfzai3 sayer ;p

bo9ali7 said...

تصحيح

‏وجعلناكم شعوبا وقبائل‏

Eng_Q8 said...

هدي اعصابك اشفيك قلبت انا

لا تحمق يا يبا

ندري بكل الي قلته والي يقول غير هالحجي خل يطق راسه بالطوفه

ولا تزعل روحك :)

bo rashed said...

عداك العيب ورايتك بيضه

وعلى فكره الصراحه والشفافيه هذي

ميزه مو الكل يقدر يمارسها

وانت كنت جدا واضح في رايك


تحياتي والسلام ختام

على نفسها جنت براقش said...

كلامك عين العقل

و مالك شغل فيهم

فتى الجبل said...

صح لسانك
تطبيق القانون أولا وثانيا وأخيرا
أمريكا ما تجنس أي كان
وقبل لا تجنس تعطي الجرين كارد
واذا لقوا مقيم غير شرعي ردوه ديرته
أوروبا ما تفتح أبوابها الا للمهاجرين الشرعيين واللي اييونهم عن طريج البحر اردونهم
يعني لازم نجنس الكل والا نصير عنصريين
لا نسكت على الغلط عشان ما نكون عنصريين
علي الخليفة..الخرافي..أحمد الفهد...الخ..كلهم حضر وسنة ما سكتنا عنهم لما غلطوا
حقوق الانسان على راسي من فوق بشرط عدم تجاوز القانون

سدرة العشـــاق said...

رايتك بيضة

و انا عنصرية بشدة
واللي مو فاهم مشكلة بفهمه مو بكلامك و الدليل انه وايد ناس فهموك من البوست اللي طاف و شنو تقصد فيه

يعطيك ألف عافية

:)

بو ناصر said...

يا خوي ما قلت شي غلط... إللي قلته عين الصواب لكن لازم تلاقي ناس فيهم أمراض و يؤولون المقصد الحقيقي. و إذا دفاعنا عن هويتنا يسمى عنصرية فالمفروض نفتخر بانا عنصريين

العرزاله said...

براك

الله يسلمك وماقصرت على مرورك وتعليقك :))

العرزاله said...

بوصالح

نعم..من اجل الكويت..فليسموها عنصريه..فليسموها ماشاؤوا

العرزاله said...

بترفلاي

مو احنا لو نفتك منه ومن اشكاله جان احنا بخير

العرزاله said...

بوصالح

جزاك الله خير على التنويه :)

العرزاله said...

مهندسنا

حبيبي انت ..انا مو معصب بس شوي يعني :))

العرزاله said...

مهندسنا

حبيبي انت ..انا مو معصب بس شوي يعني :))

العرزاله said...

بوراشد

واللي يحزنني ان على كثر ما احاول اكون واضح البعض لازال يفهمني غلط

عموما :))

العرزاله said...

براقش

عدل يالمسانده
:))))

العرزاله said...

فتى الجبل

مو بح صوتنا واحنا نقول هالكلام

اللي يسمع مافي ناس يبون الجنسيه الا بالكويت

لكن تدري بره شقران ويتحجون انجليزي لويلعنون ابو خامس ربعنا محد يتكلم لكن هني لا..يطلع لك 1000 واحد وواحد

العرزاله said...

سدرتنا

الله يعافيج :)

العرزاله said...

بوناصر

بالضبط..وهذا المقصد من كل كلامي

:)

Q8i_Blogger said...

تدري شنو المشكله !!

الشيعه يعلقون على سياييرهم اخضر
وابناء القبائل كل واحد كاتب رقم على سيارته يعني انا من القبيله الفلانيه
وعيال بطنها على قولتهم ماعندهم سالفه إلا التفاخر بهل موضوع

الي مو عنصري اهما سوو عنصري

بس ودي يا اخوي ماتلتفت لهم

واذا كان هجوم عالم اليوم كمثال من فكر قبلي

المفروض احنا مانقاطعهم لنفس السبب

نصير اكبر منهم

اما بالنسبه للتجنيس العشوائي
فقلتها المره الي طافت
انا معاك عنصري

عيل عراقي وايراني يشتغلون عند فلان الفلاني صارو كويتيين

مشكله
تحياتي

شـقـــــران said...

العزيز العرزالة
مساك الله بالخير

صدقني يا أخي أنا أعرف حميتك على الكويت
ومقالك الماضي لم تعمم فيه وإنما تكلمت عن شيء كلنا لمسناه وعرفناه وصرخاتك كانت تشبه صرخاتنا ولكن يبدو حصل سوء فهم بين من تقصد وبينك وكلكما أخوين عزيزين فوجب التوضيح

ورغم كرهي لمبدأ العنصرية ولكنها حميدة اذا كانت خوفا على البلد

وهذا مالمسته في موضوعك الماضي

فنحن مع مبدأ تجنيس من يستحق
ولكن
من لا يستحق ويتم تجنيسه بالتجاوز أو الواسطة فأني قلتها وأقولها الآن

إن الكويت لاتستحق هذا الأمر أن يحدث ويجب أن تكون لنا كلمة

ويجب أن لا يفتح الباب لشهوات بعض النواب وبعض المتنفذين

ونحن مع الحق..فهو أحق أن يتبع

فالمستحق كلنا معه
أما غير ذلك فلا وألف لا
لأنه سيـغـتـصـب حقا ليس له

والكويت أهم

اتمنى أن تكون وجهة نظري واضحة

مع خالص التحية القلبية

أخوك المحـــــب/

شــقـــــران

الخيلاء said...

فهم البعض للعنصريه بشكل خاطئ يجعلهم عنصرين دون ان يعوا هذه الحقيقه ..

ولا مانع من العنصريه اذا كانت لخير البلاد و العباد :)

العرزاله said...

بلوقر

اما سالفة النعرات واللزقات هذي..هم يايلها بموضوع بس انطر علي

اي والله..العراقي عراقي..والايراني ايراني..واليمني يمني واخر شي اذا احتجينا قالوا مو اوادم

العرزاله said...

شقران

موضوعي ماهو موجه للأخ العزيز كما تعتقد او يعتقد البعض..بالعكس اهو قال رايه وكتب موضوع وانا رديت ووصلت الفكره والسلام

ولكن

يمكن تعليقه وتعليق البعض في الموضوع السابق كان القشه اللي قصمت ظهر البعير لأن الكلام مثل ماذكرت كان بقلبي من فتره وانا اشوف الناس تزايد وتتهم بقصد او من غير قصد..ولما شفت السالفه وصلت لناس عزيزين علي مثل الاخ اللي تتكلم عنه..قررت اني انزل موضوعي لأوضح نفسي للكل

ولكن يبقى الموضوع كما قلت مو موجه لأحد والله يعلم بغلاة هالشخص وبغلاتكم..واني ماقصدت اشد بالكلام على اي واحد فيكم..وان شديت فالسموحع والعذر

تحياتي

العرزاله said...

الخيلاء

عنصريه حميده

:)

حلم جميل بوطن أفضل said...

يله عاد لا تصير دلوع يالعنصري

:)

ما يصير أحد يكلمك؟ صاير فلفل

صدقني ما كنت لأقول ما أقوله لولا إنني متأكد بأنك ستتقبل كلامي بصدر رحب

العرزاله said...

تمون يالحبيب والله تمون

:))

Selezya said...

فاهمينك والله :)

العرزاله said...

:)

Salah said...

أدري ان طاح الحطب

لكن حبيت أنقل اعتذاري اهني

لان العرزالة ما يستاهل الا كل خير

:)

العرزاله said...

بوصلوح

اعتذارك غير مقبول

لأن ماله داعي اصلا تعتذر

من صجي شالحجي

:))

esTeKaNa said...

رغم ان الموضوع قديم
الا أنه شدني
والله العظيم اني اقرا كل كلمة بالبوست واقول اي واله
صاج صاج
يزاك الله خير على هالبوست اللي يبرد القلب ودام هالأحاديث والأفكار عقيده في بالك ما تتغير ولا تتزحزح انطلق يا اخوي ولا يهمك أحد
:)
الله يحفظك يارب

العرزاله said...

حياج الله يا اختي والمكان مكانج :)